ರೌಡಿಸಂ ಹಿನ್ನೆಲೆಯಲ್ಲಿ ಸೀಜರ್‌

Team Udayavani, Apr 8, 2018, 11:24 AM IST

ಚಿರಂಜೀವಿ ಸರ್ಜಾ ನಟನೆಯ “ಸಂಹಾರ’ ಚಿತ್ರ ಫೆಬ್ರವರಿಯಲ್ಲಿ ಬಿಡುಗಡೆಯಾಗಿತ್ತು. ಆ ಚಿತ್ರದಲ್ಲಿ ಅಂಧನಾಗಿ ಕಾಣಿಸಿಕೊಂಡಿದ್ದರು. ಈಗ ಚಿರಂಜೀವಿ ನಟನೆಯ ಮತ್ತೂಂದು ಚಿತ್ರ ಬಿಡುಗಡೆಗೆ ಸಿದ್ಧವಾಗಿದೆ. ಅದು “ಸೀಜರ್‌’. ಈ ಚಿತ್ರ ಫೆ.13 ರಂದು ತೆರೆಕಾಣುತ್ತಿದೆ. ಚಿರುಗೆ “ಸೀಜರ್‌’ ಮೇಲೆ ಸಾಕಷ್ಟು ನಿರೀಕ್ಷೆ ಇದೆ. ಅದಕ್ಕೆ ಕಾರಣ ಅವರ ಇಲ್ಲಿವರೆಗಿನ ಕೆರಿಯರ್‌ನಲ್ಲಿ ಮಾಡದಂತಹ ಹೊಸ ಬಗೆಯ ಪಾತ್ರ ಸೀಜರ್‌ನಲ್ಲಿ ಸಿಕ್ಕಿದೆಯಂತೆ.

ಅದು ಕಾರ್‌ ಸೀಜ್‌ ಮಾಡುವ ಪಾತ್ರ. ಚಿತ್ರದ ಹೆಸರಿಗೆ ತಕ್ಕಂತೆ ಇಲ್ಲಿ ಸೀಜರ್‌ ಆಗಿ ಕಾಣಿಸಿಕೊಂಡಿರುವ ಚಿರುಗೆ ಈ ಸಿನಿಮಾ ಮೇಲೆ ಸಾಕಷ್ಟು ವಿಶ್ವಾಸವಿದೆ. “ಕಥೆ ತುಂಬಾ ಚೆನ್ನಾಗಿದೆ. ಈ ತರಹದ ಪಾತ್ರ ನನಗೆ ಮೊದಲು. ಸಾಮಾನ್ಯವಾಗಿ ಹೀರೋಯಿಸಂನೊಂದಿಗೆ ಪಾತ್ರಗಳು ಸಾಗಿದರೆ ಈ ಸಿನಿಮಾದಲ್ಲಿ ನನ್ನ ಪಾತ್ರ ರೌಡಿಸಂ ಹಿನ್ನೆಲೆಯಲ್ಲಿ ನೆಗೆಟಿವ್‌ ಶೇಡ್‌ನ‌ಲ್ಲೇ ಸಾಗುತ್ತದೆ.

ನನಗೆ ಈ ತರಹದ ಸಿನಿಮಾ, ಪಾತ್ರ ತುಂಬಾ ಹೊಸದು. ನಿರ್ದೇಶಕರು ಅಂದುಕೊಂಡಂತೆ ಸಿನಿಮಾ ಕಟ್ಟಿಕೊಟ್ಟಿದ್ದಾರೆ’ ಎಂದು ಚಿತ್ರದ ಬಗ್ಗೆ ಮಾತನಾಡುತ್ತಾರೆ ಚಿರಂಜೀವಿ ಸರ್ಜಾ. ಈ ಸಿನಿಮಾದಲ್ಲಿ ಚಿರಂಜೀವಿ ಅವರ ಗೆಟಪ್‌ ಕೂಡಾ ಭಿನ್ನವಾಗಿದೆಯಂತೆ. ರಗಡ್‌ ಆಗಿ ಕಾಣಿಸಿಕೊಂಡಿದ್ದಾರೆ. ಅದಕ್ಕೆ ಕಾರಣ ಪಾತ್ರ. ಮೊದಲೇ ಹೇಳಿದಂತೆ ನೆಗೆಟಿವ್‌ ಶೇಡ್‌ನ‌ ಪಾತ್ರವಾದ್ದರಿಂದ ಅದಕ್ಕೆ ಪೂರಕವಾದ ಗೆಟಪ್‌ ಹಾಕಿದ್ದಾಗಿ ಹೇಳುತ್ತಾರೆ ಚಿರು. 

“ಸೀಜರ್‌’ನಲ್ಲಿ ರವಿಚಂದ್ರನ್‌ ಕೂಡಾ ಪ್ರಮುಖ ಪಾತ್ರ ಮಾಡಿದ್ದಾರೆ. ಅವರಿಗೊಂದು ಸ್ಪೆಷಲ್‌ ಸಾಂಗ್‌ ಕೂಡಾ ಇದೆ. ಚಿರು ಕೂಡಾ ಈ ಹಾಡಿನಲ್ಲಿ ಕಾಣಿಸಿಕೊಂಡಿದ್ದಾರೆ. ಮೊದಲ ಬಾರಿಗೆ ರವಿಚಂದ್ರನ್‌ ಜೊತೆ ತೆರೆಹಂಚಿಕೊಂಡಿರುವ ಚಿರು ಖುಷಿಯಾಗಿದ್ದಾರೆ. “ರವಿಚಂದ್ರನ್‌ ಅವರು ಸಿನಿಮಾದಲ್ಲಿ ನಟಿಸಿರೋದು ಖುಷಿಯ ವಿಚಾರ. ಅವರು ನಮ್ಮ ಸೆಟ್‌ನಲ್ಲಿ ಇದ್ದಷ್ಟು ದಿನ ಡಬಲ್‌ ಧಮಾಕಾ.

ಚಿತ್ರದಲ್ಲಿ ಅವರ ಪಾತ್ರ ಕೂಡಾ ಚೆನ್ನಾಗಿದೆ’ ಎನ್ನುತ್ತಾರೆ. ಇನ್ನು, “ಸೀಜರ್‌’ ಚಿತ್ರ ಹೊಸ ಇಮೇಜ್‌ ಕೊಡುವ ಸಿನಿಮಾವಾಗುತ್ತದೆ ಎಂಬ ವಿಶ್ವಾಸವೂ ಅವರಿಗಿದೆ. ಚಿರಂಜೀವಿ ಸರ್ಜಾ ಅವರ “ಅಮ್ಮಾ ಐ ಲವ್‌ ಯೂ’ ಚಿತ್ರ ಕೂಡಾ ಬಿಡುಗಡೆಯ ಹಂತಕ್ಕೆ ಬಂದಿದ್ದು, ಸದ್ಯ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳಲ್ಲಿ ನಿರತವಾಗಿದೆ. ಈ ಸಿನಿಮಾದ ಬಗ್ಗೆಯೂ ಚಿರುಗೆ ಸಾಕಷ್ಟು ನಿರೀಕ್ಷೆ ಇದ್ದು, ಈ ಚಿತ್ರ ತನಗೆ ಒಳ್ಳೆಯ ಹೆಸರು ತಂದುಕೊಡುತ್ತದೆ ಎಂಬ ವಿಶ್ವಾಸ ಚಿರುಗಿದೆ.