ನಾಯಕಿಯರ ಹುಡುಕಾಟದಲ್ಲಿ ಶಶಾಂಕ್‌

Team Udayavani, Oct 30, 2017, 10:27 AM IST

ನಿರ್ದೇಶಕ ಶಶಾಂಕ್‌ ಅವರ ಎರಡು ಚಿತ್ರಗಳು ಸೆಟ್ಟೇರಲು ಸಿದ್ಧವಾಗಿವೆ. ಒಂದು ಅವರ ನಿರ್ಮಾಣದ ಸಿನಿಮಾವಾದರೆ, ಇನ್ನೊಂದು ಅವರ ನಿರ್ದೇಶನದ ಸಿನಿಮಾ. ಹೌದು, ಶಶಾಂಕ್‌ ಅವರು “ತಾಯಿಗೆ ತಕ್ಕ ಮಗ’ ಸಿನಿಮಾವನ್ನು ನಿರ್ಮಿಸುತ್ತಿರುವ ವಿಷಯ ಗೊತ್ತೇ ಇದೆ. ಅಜೇಯ್‌ ರಾವ್‌ ಈ ಚಿತ್ರದ ನಾಯಕ. ವಿಶೇಷ ಅಂದರೆ “ತಾಯಿಗೆ ತಕ್ಕ ಮಗ’ ಚಿತ್ರ ಅಜೇಯ್‌ ರಾವ್‌ ಅವರ 25ನೇ ಸಿನಿಮಾ.

ಯಾವುದೇ ನಟನಿಗೂ 25ನೇ ಸಿನಿಮಾ ಎಂಬುದು ಕೆರಿಯರ್‌ನ ಮೈಲಿಗಲ್ಲು. ಈಗ ಅಜೇಯ್‌ ರಾವ್‌ ಕೂಡಾ “ತಾಯಿಗೆ ತಕ್ಕ ಮಗ’ ಚಿತ್ರದ ಮೇಲೆ ನಿರೀಕ್ಷೆ ಇಟ್ಟಿದ್ದಾರೆ. ಶಶಾಂಕ್‌ ಸಿನಿಮಾಸ್‌ನಡಿ ಈ ಸಿನಿಮಾ ನಿರ್ಮಾಣವಾಗುತ್ತಿದ್ದು, ಆರಂಭದಲ್ಲಿ ರಘು ಕೋವಿ ಎನ್ನುವವರು ಈ ಚಿತ್ರವನ್ನು ನಿರ್ದೇಶಿಸುತ್ತಾರೆಂದು ಹೇಳಲಾಗಿತ್ತು. ಈಗ “ತಾಯಿಗೆ ತಕ್ಕ ಮಗ’ ಚಿತ್ರದ ನಿರ್ದೇಶಕರು ಬದಲಾಗಿದ್ದಾರೆ.

ರಘು ಜಾಗಕ್ಕೆ ವೇದ್‌ಗುರು ಬಂದಿದ್ದಾರೆ. ಯಾರು ಈ ವೇದ್‌ಗುರು ಎಂದರೆ “ದಂಡಯಾತ್ರೆ’ ಸಿನಿಮಾ ಹೆಸರು ಹೇಳಬೇಕು. ಅಜೇಯ್‌ ರಾವ್‌ “ದಂಡಯಾತ್ರೆ’ ಎಂಬ ಸಿನಿಮಾದಲ್ಲಿ ನಟಿಸುವ ಸುದ್ದಿಯನ್ನು ಓದಿರಬಹುದು. ಆ ಚಿತ್ರ ಆರಂಭಿಸಿದ್ದು ಇದೇ ವೇದ್‌ಗುರು. ಈಗ ಅಜೇಯ್‌ ಜೊತೆ “ತಾಯಿಗೆ ತಕ್ಕ ಮಗ’ ಚಿತ್ರ ಮಾಡುತ್ತಿದ್ದಾರೆ. ಚಿತ್ರಕ್ಕೆ ನಾಯಕಿಯ ಆಯ್ಕೆಯೇ ಚಿತ್ರತಂಡಕ್ಕೆ ದೊಡ್ಡ ಕಗ್ಗಂಟಾಗಿದೆ.

ಚಿತ್ರೀಕರಣಕ್ಕೆ ಹೊರಡಲು ಅಣಿಯಾದರೂ ನಾಯಕಿ ಮಾತ್ರ ಫಿಕ್ಸ್‌ ಆಗಿಲ್ಲ. ಚಿತ್ರತಂಡ ಈಗಾಗಲೇ ಸುಮಾರು 100ಕ್ಕೂ ಹೆಚ್ಚು ಮಂದಿಯನ್ನು ಆಡಿಷನ್‌ ಮಾಡಿದ್ದು, ಯಾವ ನಟಿಯೂ ಅದರಲ್ಲಿ ಆಯ್ಕೆಯಾಗಿಲ್ಲ. ಅಲ್ಲಿಗೆ ಹೊಸಬರನ್ನು ಲಾಂಚ್‌ ಮಾಡಬೇಕೆಂಬ ಆಸೆಯನ್ನು ಚಿತ್ರತಂಡ ಕೈ ಬಿಟ್ಟಿದ್ದು, ಪ್ರಸ್ತುತ ಚಾಲ್ತಿಯಲ್ಲಿರುವ ನಟಿಯೇ ನಾಯಕಿಯಾಗುವ ಸಾಧ್ಯತೆ ಇದೆಯಂತೆ.

“ಸುಮಾರು 100ಕ್ಕೂ ಹೆಚ್ಚು ಮಂದಿಯನ್ನು ಆಡಿಷನ್‌ ಮಾಡಿದೆವು. ಆದರೆ, ಪಾತ್ರಕ್ಕೆ ಯಾರೂ ಸರಿ ಹೊಂದಿಲ್ಲ. ಒಬ್ಬರಲ್ಲಿ ಸೌಂದರ್ಯವಿದ್ದರೆ ನಟನೆ ಇರೋದಿಲ್ಲ. ನಟನೆ ಚೆನ್ನಾಗಿ ಮಾಡಿದರೆ ಪಾತ್ರಕ್ಕೆ ಬೇಕಾದ ಲುಕ್‌ ಇರೋದಿಲ್ಲ. ಹಾಗಾಗಿ, ಈಗ ಪ್ರಸ್ತುತ ಚಾಲ್ತಿಯಲ್ಲಿರುವ ನಟಿಯೊಬ್ಬರನ್ನೇ ನಾಯಕಿಯನ್ನಾಗಿಸುವ ಬಗ್ಗೆ ಆಲೋಚಿಸುತ್ತಿದ್ದೇವೆ’ ಎನ್ನುತ್ತಾರೆ ಶಶಾಂಕ್‌.

“ತಾಯಿಗೆ ತಕ್ಕ ಮಗ’ ಚಿತ್ರದಲ್ಲಿನ ತಾಯಿ ಪಾತ್ರ ಕೂಡಾ ಇನ್ನಷ್ಟೇ ಆಯ್ಕೆಯಾಗಬೇಕಿದೆ. ಈಗಾಗಲೇ ಬೇಡಿಕೆಯಲ್ಲಿರುವ ನಟಿಯೊಬ್ಬರಲ್ಲಿ ಮಾತುಕತೆ ನಡೆದಿದ್ದು, ಶೀಘ್ರದಲ್ಲೇ ಅಂತಿಮವಾಗಲಿದೆಯಂತೆ. ಇನ್ನು, ಪುನೀತ್‌ ರಾಜಕುಮಾರ್‌ ಅವರಿಗೂ ಶಶಾಂಕ್‌ ಸಿನಿಮಾ ಮಾಡುತ್ತಿರುವ ವಿಚಾರ ನಿಮಗೆ ಗೊತ್ತೇ. ಶಶಾಂಕ್‌ ನಿರ್ದೇಶನದ ಈ ಚಿತ್ರ ಪುನೀತ್‌ ಅವರ ಬ್ಯಾನರ್‌ನಲ್ಲೇ ಮೂಡಿಬರುವ ಸಾಧ್ಯತೆ ಇದೆ.

ಈ ಚಿತ್ರದ ಸ್ಕ್ರಿಪ್ಟ್ ಕೆಲಸ ಮುಗಿದಿದ್ದು, ಜನವರಿಯಿಂದ ಚಿತ್ರೀಕರಣ ಆರಂಭವಾಗಲಿದೆ. ಈ ಚಿತ್ರಕ್ಕೂ ಶಶಾಂಕ್‌ ನಾಯಕಿಯ ಹುಡುಕಾಟದಲ್ಲಿದ್ದಾರೆ ಶಶಾಂಕ್‌. ಆಡಿಷನ್‌ನಲ್ಲಿ ಹೊಸಬರು ಚೆನ್ನಾಗಿ ಪರ್‌ಫಾರ್ಮೆನ್ಸ್‌ ತೋರಿಸಿದ್ದರೆ ಅವರನ್ನೇ ಎರಡು ಸಿನಿಮಾಗಳಿಗೂ ನಾಯಕಿಯನ್ನಾಗಿಸುವ ಆಲೋಚನೆ ಕೂಡಾ ಶಶಾಂಕ್‌ ಅವರಿಗಿತ್ತಂತೆ. ಆದರೆ, ಆಡಿಷನ್‌ನಲ್ಲಿ ಯಾರೂ ಆಯ್ಕೆಯಾಗದ ಕಾರಣ ನಾಯಕಿಯರ ಹುಡುಕಾಟದಲ್ಲಿದ್ದಾರೆ ಶಶಾಂಕ್‌.