ಶಶಿಕುಮಾರ್‌ ಪುತ್ರನ ಚಿತ್ರಕ್ಕೆ ಶಿವಣ್ಣ-ದರ್ಶನ್‌ ಕ್ಲಾಪ್‌

Team Udayavani, Sep 3, 2018, 11:23 AM IST

ನಟ ಶಶಿಕುಮಾರ್‌ ಪುತ್ರ ಆದಿತ್ಯ ಶಶಿಕುಮಾರ್‌ ಸಿನಿಮಾ ರಂಗಕ್ಕೆ ಕಾಲಿಟ್ಟಿರುವ ವಿಷಯ ಗೊತ್ತೇ ಇದೆ. ಆ ಚಿತ್ರಕ್ಕೆ “ಮೊಡವೆ’ ಎಂದು ಹೆಸರಿಟ್ಟಿರುವುದೂ ಗೊತ್ತು. ಭಾನುವಾರವಷ್ಟೇ “ಮೊಡವೆ’ ಚಿತ್ರಕ್ಕೆ ಮುಹೂರ್ತ ನಡೆದಿದೆ. ವಿಶೇಷವೆಂದರೆ, ಶಿವರಾಜಕುಮಾರ್‌ ಮತ್ತು ದರ್ಶನ್‌ ಇಬ್ಬರು ಸ್ಟಾರ್‌ಗಳು “ಮೊಡವೆ’ ಚಿತ್ರಕ್ಕೆ ಶುಭಹಾರೈಸಿದ್ದಾರೆ.

“ಮೊಡವೆ’ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಎಂಟ್ರಿಯಾಗುತ್ತಿರುವ ಆದಿತ್ಯ ಶಶಿಕುಮಾರ್‌ ಅವರ ಮೊದಲ ದೃಶ್ಯಕ್ಕೆ ಇಬ್ಬರೂ ಸ್ಟಾರ್‌ ನಟರು ಕ್ಲಾಪ್‌ ಮಾಡುವ ಆದಿತ್ಯನಿಗೆ ಶುಭಕೋರಿದ್ದಾರೆ. “ಮೊಡವೆ’ ಒಂದು ಅಪ್ಪಟ ಹಳ್ಳಿ ಹಿನ್ನೆಲೆಯಲ್ಲಿ ಸಾಗುವ ಕಥೆ. ಪಕ್ಕಾ ಮಾಸ್‌ ಮತ್ತು ಲವ್‌ಸ್ಟೋರಿ ಹೊಂದಿರುವ ಚಿತ್ರ. ಬಹುತೇಕ ಉತ್ತರ ಭಾಗದಲ್ಲಿ ನಡೆಯುವ ಕಥೆ ಇದಾಗಿರುವುದರಿಂದ ಹಂಪಿ, ಐಹೊಳೆ ಇನ್ನಿತರೆ ಕಡೆ ಚಿತ್ರೀಕರಣ ನಡೆಯಲಿದೆ.

ಸಿದ್ಧಾರ್ಥ್ ಈ ಚಿತ್ರದ ನಿರ್ದೇಶಕರು. ಈ ಚಿತ್ರಕ್ಕೆ ಅಪೂರ್ವ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಯೌವ್ವನಕ್ಕೆ ಬಂದ ಹುಡುಗ, ಹುಡುಗಿಯ ಪ್ರೇಮಕಥೆ ಇದಾಗಿರುವುದರಿಂದ ನಿರ್ದೇಶಕರು “ಮೊಡವೆ’ ಎಂದು ಹೆಸರಿಟ್ಟಿದ್ದಾರೆ. ಮುಹೂರ್ತ ಸಮಾರಂಭಕ್ಕೆ ಶಶಿಕುಮಾರ್‌ ಸೇರಿದಂತೆ ಚಿತ್ರರಂಗದ ಅನೇಕ ಗಣ್ಯರು ಆಗಮಿಸಿ, ಶುಭಹಾರೈಸಿದ್ದಾರೆ.