ತಮಿಳಿನ ಖೈದಿ ರಿಮೇಕ್‌ನಲ್ಲಿ ಶಿವಣ್ಣ?

Team Udayavani, Mar 8, 2020, 1:01 PM IST

ಶಿವರಾಜಕುಮಾರ್‌ ಅವರ “ದ್ರೋಣ’ ಚಿತ್ರ ಬಿಡುಗಡೆಯಾಗಿದೆ. ಸಿನಿಮಾ ನೋಡಿದವರು ಶಿವಣ್ಣ ನಟನೆಯನ್ನು ಇಷ್ಟಪಡುತ್ತಿದ್ದಾರೆ. ಈ ನಡುವೆಯೇ ಶಿವಣ್ಣ ಸುತ್ತ ಹೊಸ ಸಿನಿಮಾವೊಂದರ ಸುದ್ದಿ ಜೋರಾಗಿ ಹರಿದಾಡುತ್ತಿದೆ. ಅದು “ಖೈದಿ’ ರಿಮೇಕ್‌ನಲ್ಲಿ. ಹೌದು, ತಮಿಳಿನಲ್ಲಿ ಕಾರ್ತಿ ನಟಿಸಿದ “ಖೈದಿ’ ಚಿತ್ರ ದೊಡ್ಡ ಮಟ್ಟದಲ್ಲಿ ಹಿಟ್‌ ಆಗಿತ್ತು. ಆ್ಯಕ್ಷನ್‌ ಥ್ರಿಲ್ಲರ್‌ ಆದ ಈ ಚಿತ್ರದಲ್ಲಿ ಭಾವನಾತ್ಮಕ ದೃಶ್ಯಗಳಿಗೂ ಹೆಚ್ಚಿನ ಮಹತ್ವವಿದ್ದು, ಪ್ರೇಕ್ಷಕರು ಈ ಚಿತ್ರಕ್ಕೆ ಫಿದಾ ಆಗಿದ್ದರು.

ಪರಿಣಾಮವಾಗಿ ಚಿತ್ರ ದೊಡ್ಡ ಮಟ್ಟದಲ್ಲಿ ಹಿಟ್‌ ಆಗಿತ್ತು. ಈಗ ಈ ಚಿತ್ರ ಕನ್ನಡಕ್ಕೆ ರಿಮೇಕ್‌ ಆಗುತ್ತಿದೆ ಎಂಬ ಸುದ್ದಿಯೊಂದು ಕೇಳಿಬರುತ್ತಿದೆ. “ಖೈದಿ’ ರಿಮೇಕ್‌ ನಲ್ಲಿ ಯಾರು ನಟಿಸುತ್ತಾರೆಂಬ ಕುತೂಹಲ ಸಹಜವಾಗಿಯೇ ಇರುತ್ತದೆ. ಇದಕ್ಕೆ ಸಿಕ್ಕ ಉತ್ತರ ಶಿವರಾಜಕುಮಾರ್‌.

ಹೌದು, “ಖೈದಿ’ ರಿಮೇಕ್‌ನಲ್ಲಿ ಶಿವಣ್ಣ ನಟಿಸಲಿದ್ದಾರಂತೆ. ಈ ಚಿತ್ರದ ಪಾತ್ರ ಅವರಿಗೆ ಚೆನ್ನಾಗಿ ಹೊಂದಿಕೆಯಾಗುವುದರಿಂದ ಚಿತ್ರತಂಡ ಅವರನ್ನೇ ಕೇಳಿಕೊಂಡಿದೆಯಂತೆ. ನಿಮಗೆ ಗೊತ್ತಿರುವಂತೆ ಶಿವಣ್ಣ ರೀಮೇಕ್‌ಗೆ 14 ವರ್ಷಗಳ ಹಿಂದೆಯೇ ಗುಡ್‌ ಬೈ ಹೇಳಿದ್ದರು. ಆದರೆ, ಇತ್ತೀಚೆಗೆ ಮಲಯಾಳಂನ “ಒಪ್ಪಂ’ ಸಿನಿಮಾದ ರಿಮೇಕ್‌ “ಕವಚ’ದಲ್ಲಿ ನಟಿಸಿದ್ದರು. ತಮಗೆ ತುಂಬಾ ಕಾಡಿದ ಹಾಗೂ ಮನಸ್ಸಿಗೆ ಹತ್ತಿರವಾಗುವ ಸಿನಿಮಾಗಳ ರಿಮೇಕ್‌ನಲ್ಲಿ ನಟಿಸಲು ನಾನು ಸಿದ್ಧ ಎಂದಿದ್ದರು. ಅದರಂತೆ ಈಗ ತಮಿಳಿನ “ಖೈದಿ’ಯಲ್ಲಿ ಶಿವಣ್ಣ ನಟಿಸಲಿದ್ದಾರೆಂಬ ಸುದ್ದಿ ಹರಿದಾಡುತ್ತಿದೆ. ಹಾಗಾದರೆ ಈ ಚಿತ್ರವನ್ನು ಯಾರು ನಿರ್ದೇಶಿಸುತ್ತಾರೆಂಬ ಪ್ರಶ್ನೆಗೆ ಉತ್ತರ ನಂದಕಿಶೋರ್‌.  ಸದ್ಯ “ಪೊಗರು’ ಚಿತ್ರ ನಿರ್ದೇಶಿಸುತ್ತಿರುವ ನಂದಕಿಶೋರ್‌ “ಖೈದಿ’ ರಿಮೇಕ್‌ ಮಾಡಲಿದ್ದಾರೆಂಬ ಸುದ್ದಿ ಗಾಂಧಿನಗರದಲ್ಲಿ ಹರಿದಾಡಿದೆ. ಆದರೆ, “ಖೈದಿ’ ಕನ್ನಡ ರಿಮೇಕ್‌ಗೆ ಸ್ಪಷ್ಟತೆ ಸಿಗಬೇಕಾದರೆ ಇನ್ನೂ ಸ್ವಲ್ಪ ದಿನ ಕಾಯಬೇಕು.