ಮತ್ತೆ ಕಿರುತೆರೆಯತ್ತ ಶಿವರಾಜಕುಮಾರ್‌; ಯಾರಿ ನಂ.1 ಶಿವಣ್ಣ

Team Udayavani, Feb 6, 2018, 12:48 PM IST

ಶಿವರಾಜಕುಮಾರ್‌ ಅವರ ಕೈಯಲ್ಲಿರುವ ಸಿನಿಮಾಗಳನ್ನು ಲೆಕ್ಕಹಾಕುತ್ತಾ ಹೋದರೆ ಪಟ್ಟಿ ಬೆಳೆಯುತ್ತಾ ಹೋಗುತ್ತದೆ. ಹೀಗೆ ಚಿತ್ರೀಕರಣಗಳಲ್ಲಿ ಬಿಝಿ ಇರುವ ಶಿವಣ್ಣ ಈಗ ಮತ್ತೆ ಕಿರುತೆರೆಗೆ ಕಾಲಿಟ್ಟಿದ್ದಾರೆ. ಅದು ಟಾಕ್‌ ಶೋವೊಂದನ್ನು ನಡೆಸಿಕೊಡುವ ಮೂಲಕ. ಹೌದು, ಶಿವರಾಜಕುಮಾರ್‌ ಸ್ಟಾರ್‌ ಸುವರ್ಣ ವಾಹಿನಿಗೆ “ಯಾರಿ ನಂ 1 ಶಿವಣ್ಣ’ ಎಂಬ ಟಾಕ್‌ ಶೋವೊಂದನ್ನು ನಡೆಸಿಕೊಡಲಿದ್ದಾರೆ.

ಈಗಾಗಲೇ ನೀವು ಶಿವಣ್ಣ ಅವರನ್ನು ಸ್ಟಾರಾಗಿ, ಹ್ಯಾಟ್ರಿಕ್‌ ಹೀರೋ ಆಗಿ ಸೆಂಚುರಿ ಸ್ಟಾರ್‌ ಆಗಿ ನೋಡಿದ್ದೀರಿ. ಈ ಶೋನಲ್ಲಿ ಸೆಲೆಬ್ರೆಟಿಗಳ ಜೊತೆ ಹರಟುವ ಸಿಂಪಲ್‌ಮ್ಯಾನ್‌ ಆಗಿ ಶಿವಣ್ಣ ಕಾಣಿಸಿಕೊಳ್ಳಲಿದ್ದಾರೆ. ಈ ಹಿಂದೆ “ನಾನಿರುವುದೇ ನಿಮಗಾಗಿ’ ಎಂಬ ಶೋನಲ್ಲಿ ಶಿವಣ್ಣ ಕಾಣಿಸಿಕೊಂಡಿದ್ದರು. ಆ ನಂತರ ಕಿರುತೆರೆಯಿಂದ ದೂರವಿದ್ದ ಶಿವಣ್ಣ ಈ “ಯಾರಿ ನಂ.1 ಶಿವಣ್ಣ’ ಮೂಲಕ ಮತ್ತೆ ಬರುತ್ತಿದ್ದಾರೆ.

ಅಂದಹಾಗೆ, ಇದು ತೆಲುಗು ವೆಬ್‌ಸೀರೀಸ್‌ನ ಕನ್ನಡ ಅವತರಣಿಕೆ. ತೆಲುಗಿನಲ್ಲಿ “ನಂ.1 ಯಾರಿ ರಾಣಾ’ ಎಂಬ ವೆಬ್‌ ಸೀರೀಸ್‌ನ ಅವತರಣಿಕೆಯಾಗಿದೆ. ಈ ಶೋನಲ್ಲಿ ಶಿವರಾಜಕುಮಾರ್‌ ಚಿತ್ರರಂಗದ ಮಂದಿಯ ಜೊತೆ ಮಾತುಕತೆ ನಡೆಸಲಿದ್ದಾರೆ. ಇತ್ತೀಚೆಗೆ “ಯಾರಿ ನಂ.1 ಶಿವಣ್ಣ’ದ ಪ್ರೋಮೋ ಶೂಟ್‌ ಡಿಸ್ಟ್ರಿಕ್ಟ್ ಬಾರ್‌ನಲ್ಲಿ ನಡೆದಿದೆ.

ಮಾನಸ ಸರೋವರ ಪ್ರೋಮೋದಲ್ಲಿ ಶಿವಣ್ಣ:
ಶಿವರಾಜಕುಮಾರ್‌ ಅವರು ತಮ್ಮ ಹೋಂಬ್ಯಾನರ್‌ನಲ್ಲಿ “ಮಾನಸ ಸರೋವರ’ ಎಂಬ ಧಾರಾವಾಹಿ ನಿರ್ಮಿಸಲು ಹೊರಟಿರೋದು ನಿಮಗೆ ಗೊತ್ತೇ ಇದೆ. ಈಗ ಅದರ ಪ್ರೋಮೋ ಬಿಡುಗಡೆಯಾಗಿದ್ದು, ಅದರಲ್ಲಿ ಶಿವರಾಜಕುಮಾರ್‌ ಕೂಡಾ ಕಾಣಿಸಿಕೊಂಡಿದ್ದಾರೆ. ಅತಿ ಶೀಘ್ರದಲ್ಲಿ ಎಂದು ತಮ್ಮ ಅಭಿಮಾನಿಗಳಿಗೆ ಹೇಳುವಂತಹ ಪ್ರೋಮೋದಲ್ಲಿ ಶಿವಣ್ಣ ಕಾಣಿಸಿಕೊಂಡಿದ್ದಲ್ಲದೇ, ಸೂಪರ್‌ ಹಿಟ್‌ ಆದ ಸಿನಿಮಾ ಮುಂದೆ ಧಾರಾವಾಹಿಯಾಗಿ ಮೂಡಿಬರಲಿದೆ ಎಂದಿದ್ದಾರೆ.