ಡಿ ಬಾಸ್‌ ಹೆಸರಿನ ಬೆಳ್ಳಿ ಕಡಗ

Team Udayavani, Jan 14, 2019, 6:17 AM IST

ದರ್ಶನ್‌ ಹುಟ್ಟುಹಬ್ಬ ಆಚರಿಸಿಕೊಳ್ಳುವುದಿಲ್ಲ ಎಂದು ಹೇಳಿಕೆ ನೀಡಿದ್ದು ಎಲ್ಲರಿಗೂ ಗೊತ್ತಿದೆ. ಆದರೆ, ಅಭಿಮಾನಿಗಳು ಮಾತ್ರ ಅಭಿಮಾನ ಮೆರೆಯುತ್ತಿದ್ದಾರೆ. ಅಂಬರೀಶ್‌ ಅವರ ಅಗಲಿಕೆ ಹಿನ್ನೆಲೆಯಲ್ಲಿ ಈ ಬಾರಿ ಬರ್ತ್‌ಡೇ ಸಂಭ್ರಮ ಇರುವುದಿಲ್ಲ ಎಂದು ದರ್ಶನ್‌ ಸ್ಪಷ್ಟನೆ ಕೊಟ್ಟರೂ, ಅಭಿಮಾನಿಗಳು ಇದೀಗ “ಡಿ ಬಾಸ್‌’ ಎಂದು ಬರೆದಿರುವ ಬೆಳ್ಳಿ ಕಡಗ ತೊಡೋಕೆ ಮುಂದಾಗಿದ್ದಾರೆ. ಪ್ರತಿ ಫೆಬ್ರವರಿ 16 ರ ದರ್ಶನ್‌ ಹುಟ್ಟುಹಬ್ಬದ ದಿನದಂದು ಅದೆಷ್ಟೋ ಅಭಿಮಾನಿಗಳು ಕೈ ಮೇಲೆ ದರ್ಶನ್‌ ಹೆಸರನ್ನು ಹಚ್ಚೆ ಹಾಕಿಸಿಕೊಂಡಿದ್ದುಂಟು,

ಅವರ ಭಾವಚಿತ್ರವನ್ನು ಎದೆಯ ಮೇಲೂ ಹಚ್ಚೆ ಹಾಕಿಸಿಕೊಂಡವರಿದ್ದಾರೆ. ಹೇರ್‌ಸ್ಟೈಲ್‌ನಲ್ಲೂ ದರ್ಶನ್‌ ಹೆಸರನ್ನು ಹಾಕಿಸಿಕೊಂಡ ಉದಾಹರಣೆಗಳಿಗೆ ಕಮ್ಮಿ ಇಲ್ಲ. ಈಗ ಹೊಸ ಟ್ರೆಂಡ್‌ ಅಂದರೆ, “ಡಿ ಬಾಸ್‌’ ಹೆಸರಿನ ಬೆಳ್ಳಿ ಕಡಗ ತೊಡುವ ಮೂಲಕ ಮತ್ತಷ್ಟು ಪ್ರೀತಿ ತೋರುತ್ತಿದ್ದಾರೆ. ಈಗಾಗಲೇ ಕೆಲ ಜ್ಯುವೆಲರಿ ಅಂಗಡಿಗಳಲ್ಲಿ “ಡಿ ಬಾಸ್‌’ ಹೆಸರಿನ ಬೆಳ್ಳಿ ಕಡಗ ಸಿಗುತ್ತಿದ್ದು, ಅಭಿಮಾನಿಗಳು ಖರೀದಿಸಿ, ಅದನ್ನು ತೊಡುವ ಮೂಲಕ ಅಭಿಮಾನ ಮೆರೆಯುತ್ತಿದ್ದಾರೆ.

ಇನ್ನು, ದರ್ಶನ್‌ ಈ ಹಿಂದೆ “ಉದಯವಾಣಿ’ ಜೊತೆ ಮಾತನಾಡಿ, “ನಾನು ಈ ಸಲ ಹುಟ್ಟುಹಬ್ಬ ಆಚರಿಸಿಕೊಳ್ಳಲ್ಲ. ನನ್ನ ಅಭಿಮಾನಿಗಳಿಗೂ ಅದನ್ನು ಹೇಳಿದ್ದೇನೆ. ಎಂದಿನ ಹುಟ್ಟುಹಬ್ಬದ ಸಂಭ್ರಮ ಈ ಸಲ ಇರುವುದಿಲ್ಲ. ಅಭಿಮಾನಿಗಳು ಈ ಬಾರಿ ನನ್ನ ಬರ್ತ್‌ಡೇ ಆಚರಿಸುವುದು ಬೇಡ. ಯಾರೇ ಕೇಕ್‌ ತಂದರೂ ಕಟ್‌ ಮಾಡುವುದಿಲ್ಲ. ಇದೊಂದು ವರ್ಷ ಆಚರಣೆ ಬೇಡ. ಮುಂದಿನ ವರ್ಷ ಎಂದಿನಂತೆಯೇ ಅಭಿಮಾನಿಗಳ ಜೊತೆ ಆಚರಣೆ ಮಾಡಿಕೊಳ್ತೀನಿ’ ಎಂದು ಹೇಳಿದ್ದರು.