ಈ ವಾರ ತೆರೆಗೆ ಆರು ಚಿತ್ರಗಳು; ಮತ್ತೆ ರಂಗೇರಿದ ಸ್ಯಾಂಡಲ್‌ವುಡ್‌

ಹೊಸ ವರ್ಷದ ಆರಂಭದಲ್ಲಿ ಕೊಂಚ ಬಿಡುಗಡೆಗೆ ಹಿಂದೇಟು ಹಾಕುತ್ತಿದ್ದ ಕನ್ನಡ ಚಿತ್ರಗಳು ಈಗ ಒಂದರ ಹಿಂದೆ ಒಂದರಂತೆ ತೆರೆಗೆ ಬರಲು ತಯಾರಾಗುತ್ತಿವೆ. ಜನವರಿ 3 ರಂದು 2 ಚಿತ್ರಗಳು ಕನ್ನಡದಲ್ಲಿ ಬಿಡುಗಡೆಯಾಗಿದ್ದರೆ, ಜನವರಿ 10ರಂದು ಯಾವುದೇ ಚಿತ್ರಗಳು ಬಿಡುಗಡೆಯಾಗಿರಲಿಲ್ಲ. ಇನ್ನು ಜನವರಿ 17ರಂದು ಕೇವಲ ಮೂರು ಚಿತ್ರಗಳು ಮಾತ್ರ ಬಿಡುಗಡೆಯಾಗಿದ್ದವು.

ಕಳೆದ ವರ್ಷ ಸೆನ್ಸಾರ್‌ ಆಗಿರುವ ಹತ್ತಾರು ಚಿತ್ರಗಳು ಜನವರಿಯಲ್ಲಿ ತೆರೆಗೆ ಬರಬಹುದು ಎಂಬ ನಿರೀಕ್ಷೆಯಿದ್ದರೂ ಬಹುಭಾಷೆಯ ಕೆಲವು ಬಿಗ್‌ ಸ್ಟಾರ್‌ಗಳ, ಬಿಗ್‌ ಬಜೆಟ್‌ ಚಿತ್ರಗಳು ಸಂಕ್ರಾಂತಿಯ ವೇಳೆಗೆ ಒಂದರ ಹಿಂದೆ ಒಂದರಂತೆ ತೆರೆಗೆ ಬರುವ ಘೋಷಣೆ ಮಾಡಿದ್ದರಿಂದ, ಕನ್ನಡದಲ್ಲಿ ತೆರೆಗೆ ಬರಲು ತಯಾರಾಗಿದ್ದ ಹಲವು ಚಿತ್ರಗಳು ತಮ್ಮ ಬಿಡುಗಡೆಯನ್ನು ಕೆಲವಾರಗಳ ಕಾಲ ಮತ್ತೆ ಮುಂದೂಡುವಂತಾಗಿತ್ತು.

ಕಳೆದ ಕೆಲ ವಾರಗಳಿಂದ ಕರ್ನಾಟಕದ ಚಿತ್ರಮಂದಿರಗಳಲ್ಲಿ ಜೋರಾಗಿದ್ದ ಬಹುಭಾಷಾ ಸ್ಟಾರ್‌ ನಟರ ಚಿತ್ರಗಳ ಅಬ್ಬರ ಸ್ವಲ್ಪ ಮಟ್ಟಿಗೆ ಕಡಿಮೆಯಾಗುತ್ತಿದ್ದಂತೆ, ಈ ವಾರದಿಂದ ಮತ್ತೆ ಕನ್ನಡ ಚಿತ್ರಗಳ ಅಬ್ಬರ ಜೋರಾಗುವ ಲಕ್ಷಣಗಳು ಕಾಣುತ್ತಿದೆ. ಇದೇ ಶುಕ್ರವಾರ (ಜನವರಿ 24) “ಇಂಡಿಯಾ ವರ್ಸಸ್‌ ಇಂಗ್ಲೆಂಡ್‌’, “ನಾನು ಮತ್ತು ಗುಂಡ’, “ಗಡಿನಾಡು’, “ಕೃಥಾ’, “ಖಾಕಿ’, “ನಾವೆಲ್ರೂ ಹಾಫ್ ಬಾಯಿಲ್ಡ್‌’ ಸೇರಿದಂತೆ 6 ಚಿತ್ರಗಳು ತೆರೆಗೆ ಬರುವ ಘೋಷಣೆ ಮಾಡಿಕೊಂಡಿವೆ.

ಇದರ ಜೊತೆಗೆ ಇನ್ನೂ ಎರಡು-ಮೂರು ಚಿತ್ರಗಳು ಈ ವಾರವೇ ತೆರೆಗೆ ಬರಲು ಪ್ಲಾನ್‌ ಮಾಡಿಕೊಳ್ಳುತ್ತಿದ್ದು, ಈ ಚಿತ್ರಗಳು ಕೂಡ ಕೊನೆ ಕ್ಷಣದಲ್ಲಿ ತೆರೆಗೆ ಬಂದರೂ, ಬರಬಹುದು ಎನ್ನಲಾಗುತ್ತಿದೆ. ಒಟ್ಟಾರೆ ಚಿತ್ರೋದ್ಯಮದ ಮೂಲಗಳ ಮಾಹಿತಿಯ ಪ್ರಕಾರ ಕಳೆದ ಐದಾರು ತಿಂಗಳಿನಿಂದ ಸೆನ್ಸಾರ್‌ ಪ್ರಮಾಣಪತ್ರ ಪಡೆದುಕೊಂಡರೂ, ಥಿಯೇಟರ್‌ ಸಮಸ್ಯೆ ಮತ್ತಿತರ ಕಾರಣಗಳಿಂದ ಬಿಡುಗಡೆಯಾಗದೆ ಉಳಿದ ಬಹುತೇಕ ಚಿತ್ರಗಳು ಜನವರಿ, ಫೆಬ್ರವರಿ ಮತ್ತು ಮಾರ್ಚ್‌ ಅಂತ್ಯದೊಳಗೆ ತೆರೆಗೆ ಬರಲಿದ್ದು, ಇನ್ನು ಎರಡು-ಮೂರು ತಿಂಗಳು ಚಿತ್ರಮಂದಿರಗಳಲ್ಲಿ ಕನ್ನಡ ಚಿತ್ರಗಳ ಅದರಲ್ಲೂ ಹೊಸಬರ ಚಿತ್ರಗಳ ಸದ್ದು ಸ್ವಲ್ಪ ಜೋರಾಗಿಯೇ ಇರಲಿದೆ ಎನ್ನಲಾಗುತ್ತಿದೆ.