ಅಪ್ಪನ ಹುಟ್ಟುಹಬ್ಬಕ್ಕೆ ಮಗನ ಹಾಡು

Team Udayavani, Dec 17, 2018, 11:34 AM IST

ನಿನ್ನೆ (ಡಿ. 16) ಮುಖ್ಯಮಂತ್ರಿ ಹೆಚ್‌.ಡಿ ಕುಮಾರಸ್ವಾಮಿಯವರ ಹುಟ್ಟುಹಬ್ಬ. ಇದೇ ವೇಳೆ “ಸೀತಾರಾಮ ಕಲ್ಯಾಣ’ ಚಿತ್ರತಂಡ ಕುಮಾರಸ್ವಾಮಿ ಅವರ ಜನ್ಮದಿನಕ್ಕೆ ವಿಶೇಷ ಉಡುಗೊರೆಯಾಗಿ ಚಿತ್ರದ ಹಾಡೊಂದನ್ನು ಬಿಡುಗಡೆ ಮಾಡಿದೆ. ಅನೂಪ್‌ ರುಬಿನ್ಸ್‌ ಸಂಗೀತ ಸಂಯೋಜಿಸಿರುವ ಈ ಹಾಡಿಗೆ ಕೆ. ಕಲ್ಯಾಣ್‌ ಸಾಹಿತ್ಯವಿದೆ.

ಸಂಚಿತ್‌ ಹೆಗ್ಡೆ ಈ ಹಾಡಿಗೆ ಧ್ವನಿಯಾಗಿದ್ದು, ಇದೀಗ ಈ ಹಾಡು ಸೋಷಿಯಲ್‌ ಮೀಡಿಯಾಗಳಲ್ಲಿ ಜೋರಾಗಿ ಹರಿದಾಡುತ್ತಿದೆ. ಇನ್ನು ತಂದೆಯ ಹುಟ್ಟುಹಬ್ಬ ಆಚರಿಸಿರುವ ನಿಖಿಲ್‌ ತಮ್ಮ ತಂದೆಯ ಬಗ್ಗೆ ಭಾವನಾತ್ಮಕಕ ನುಡಿಗಳನ್ನಾಡಿದ್ದಾರೆ. “ಆ ದೇವರು ನಿಮಗೆ ಆರೋಗ್ಯ, ನೆಮ್ಮದಿ ಕೊಟ್ಟು ಕಾಪಾಡಲಿ ಮುಖ್ಯವಾಗಿ ನಮ್ಮ ನಾಡಿಗೆ ನಿಮ್ಮ ಸೇವೆ ಸಲ್ಲಿಸಲು ಆ ದೇವರು ನಿಮಗೆ ಶಕ್ತಿ ತುಂಬಲಿ ಎಂದು ಆಶಿಸುತ್ತೇನೆ.

ನಿಮ್ಮ ಮಗನಾಗಿ ನಾನು ಹುಟ್ಟಿದ್ದು ನನ್ನ ಪುಣ್ಯ. ನೀವು ನನ್ನ ಜೀವನದ ನಿಜವಾದ ಹೀರೊ. ನೀವು ನನ್ನ ಪ್ರತಿ ಹೆಜ್ಜೆಗೂ ನೀಡುವ ಸಲಹೆ ನನ್ನನ್ನು ಸಮಾಜದಲ್ಲಿ ಉತ್ತಮ ವ್ಯಕ್ತಿಯಾಗಿ ಮಾಡುತ್ತಿದೆ. ಹಗಲು ರಾತ್ರಿ ಎಂದು ಭಾವಿಸದೆ ನಾಡಿನ ಅಭಿವೃದ್ಧಿಗಾಗಿ, ನಿಮ್ಮ ಆರೋಗ್ಯವನ್ನು ಲೆಕ್ಕಿಸದೆ ನೀವು ಮುನ್ನುಗ್ಗುವ ರೀತಿ ನಿಜವಾಗಿಯೂ ಎಲ್ಲರೂ ಮೆಚ್ಚುವಂತದ್ದು. ಲವ್‌ ಯು ಅಪ್ಪ’ ಎಂದು ಸೋಷಿಯಲ್‌ ಮೀಡಿಯಾದಲ್ಲಿ ಬರೆದುಕೊಂಡಿದ್ದಾರೆ ನಿಖಿಲ್‌.