ಸಾರಿ ಕಾವೇರಿ ಫ‌ಸ್ಟ್‌ಲುಕ್‌ ಬಂತು

Team Udayavani, Aug 6, 2019, 3:03 AM IST

ಕನ್ನಡ ಚಿತ್ರರಂಗದಲ್ಲಿ ಹೊಸ ಪ್ರಯೋಗ, ಪ್ರಯತ್ನಗಳು ನಡೆಯುತ್ತಲೇ ಇರುತ್ತವೆ. ಈಗ ಆ ಸಾಲಿನಲ್ಲಿ ಬರುತ್ತಿರುವ ಮತ್ತೂಂದು ಚಿತ್ರ “ಸಾರಿ ಕಾವೇರಿ’. ಹೌದು, “ಸಾರಿ ಕಾವೇರಿ’ ಎಂಬ ಚಿತ್ರವೊಂದು ತಯಾರಾಗುತ್ತಿದ್ದು, ಈಗಾಗಲೇ ಚಿತ್ರದ ಫ‌ಸ್ಟ್‌ಲುಕ್‌ ಪೋಸ್ಟರ್‌ ಬಿಡುಗಡೆಯಾಗಿದೆ. ನಟ ನೀನಾಸಂ ಸತೀಶ್‌ ಚಿತ್ರದ ಪೋಸ್ಟರ್‌ ಬಿಡುಗಡೆ ಮಾಡಿದ್ದಾರೆ. ಈ ಚಿತ್ರವನ್ನು ಅಮಿತ್‌ ದೇಸಾಯಿ ಹಾಗೂ ಹರಿಪರಾಕ್‌ ನಿರ್ದೇಶಿಸುತ್ತಿದ್ದಾರೆ.

ನೈಜ ಘಟನಾವಳಿಗಳ ಸ್ಫೂರ್ತಿಯೊಂದಿಗೆ ಈ ಚಿತ್ರವನ್ನು ಮಾಡುತ್ತಿದ್ದಾರೆ. ಪುಟ್ಟ ಬಾಲಕಿ ಕಾವೇರಿಯ ಸುತ್ತ ಸಿನಿಮಾದ ಕಥೆ ಸಾಗಲಿದೆ. ಮಗಳ ಹುಟ್ಟುಹಬ್ಬಕ್ಕೆ ತಂದೆ ಕೊಡಿಸುವ ಕ್ಯಾಮರಾವೊಂದರಿಂದ ಆರಂಭದಲ್ಲಿ ಖುಷಿಪಡುವ, ಹಲವು ಸುಂದರ ಕ್ಷಣಗಳನ್ನು ಸೆರೆಹಿಡಿಯುವ ಕಾವೇರಿ, ಮುಂದೆ ಆ ಕ್ಯಾಮರಾದಿಂದಾಗಿ ತನ್ನದಲ್ಲದ ತಪ್ಪಿಗೆ ಸಿಲುಕುತ್ತಾಳೆ. ಕಾವೇರಿಗೆ ಎದುರಾಗುವ ಆ ಕಷ್ಟವೇನು ಸೇರಿದಂತೆ ಹಲವು ಅಂಶಗಳೊಂದಿಗೆ ಸಿನಿಮಾ ಸಾಗಲಿದೆ.

ಚಿತ್ರದಲ್ಲಿ ಕಾವೇರಿಯ ಪಾತ್ರದಲ್ಲಿ ಪ್ರಾಣ್ಯ ರಾವ್‌ ನಟಿಸುತ್ತಿದ್ದಾರೆ. ಉಳಿದಂತೆ ಅರವಿಂದ್‌, ರೂಪ, ಶರಣ್ಯ ಪ್ರಮುಖ ಪಾತ್ರ ಮಾಡುತ್ತಿದ್ದಾರೆ. ಚಿತ್ರಕ್ಕೆ ವಿ.ಮನೋಹರ್‌ ಸಂಗೀತ, ಮಗೇಶ್‌ ದೇವ್‌ ಛಾಯಾಗ್ರಹಣವಿದೆ. ಚಿತ್ರವನ್ನು ಎ.ಆರ್‌.ಎಮ್‌.ಮೂವೀಸ್‌ ನಿರ್ಮಿಸುತ್ತಿದೆ.