ಮಾತು ಮುಗಿಸಿದ 19ರ ವಯಸ್ಸು!

Team Udayavani, Jul 20, 2019, 3:00 AM IST

ಕನ್ನಡದಲ್ಲಿ ಈಗೀಗ ಬರುತ್ತಿರುವ ಚಿತ್ರಗಳ ಶೀರ್ಷಿಕೆಗಳನ್ನು ಸೂಕ್ಷ್ಮವಾಗಿ ಗಮನಿಸಿದರೆ, ವಿಶೇಷ ಎನಿಸುತ್ತವೆ. ಆದರೆ, ಚಿತ್ರಗಳು ಹಾಗೆಯೇ ಇರುತ್ತವೆಯಾ? ಇದಕ್ಕೆ ಚಿತ್ರಮಂದಿರದಲ್ಲಿ ಚಿತ್ರ ಬಂದ ಬಳಿಕವಷ್ಟೇ ಉತ್ತರ ಸಿಗಲಿದೆ. ಇಲ್ಲೊಂದು ಹೊಸಬರ ತಂಡ ಸೇರಿಕೊಂಡು ಈ ಹಿಂದೆ “19 ಏಜ್‌ ನಾನ್ಸೆನ್ಸ್‌’ ಎಂಬ ಸಿನಿಮಾ ಶುರುಮಾಡಿದ್ದು ಗೊತ್ತೇ ಇದೆ.

ಆ ಚಿತ್ರಕ್ಕೆ ಈಗ ಚಿತ್ರೀಕರಣ ಮುಗಿಸಿರುವ ಖುಷಿಯಲ್ಲಿದೆ ಚಿತ್ರತಂಡ. ಹೌದು, ಎಸ್‌.ಲೋಕೇಶ್‌ ನಿರ್ಮಾಣದ “19 ಏಜ್‌ ನಾನ್ಸೆನ್ಸ್‌’ ಚಿತ್ರದ ಚಿತ್ರೀಕರಣ ಪುಟ್ಟಣ್ಣ ಸ್ಟುಡಿಯೋ, ಮಂಚಿನಬೆಲೆ ಡ್ಯಾಂ, ಹಾಗೂ ನಗರದ ಸುತ್ತಮುತ್ತ ನಡೆದಿದೆ. ಚಿತ್ರದ ಪ್ರಮುಖ ಕಲಾವಿದರು ಪಾಲ್ಗೊಂಡಿದ್ದ ದೃಶ್ಯಗಳೊಂದಿಗೆ ಚಿತ್ರದ ಮಾತಿನ ಭಾಗ ಪೂರ್ಣಗೊಂಡಿದೆ.

ಎರಡು ಹಾಡು ಹಾಗು ಮೂರು ಫೈಟ್‌ ಬಾಕಿ ಉಳಿಸಿಕೊಂಡಿರುವ ಚಿತ್ರತಂಡ, ಸದ್ಯದಲ್ಲೇ ಅದನ್ನು ಪೂರ್ಣಗೊಳಿಸುವ ತಯಾರಿಯಲ್ಲಿದೆ. ಅಂದಹಾಗೆ, ಇದು ಲವ್‌ ಕಮ್‌ ಆಕ್ಷನ್‌ ಹೊಂದಿರುವ ಪ್ರೇಮಕಥಾಹಂದರ ಹೊಂದಿರುವ ಚಿತ್ರ. 19 ರಿಂದ 25 ವಯೋಮಿತಿ ಇರುವ ಹರೆಯದ ವಯಸ್ಸಿನ ನಾಯಕಿಯೊಬ್ಬಳ ಬದುಕಿನಲ್ಲಿ ನಡೆಯುವ ಘಟನೆಗಳೇ ಚಿತ್ರದ ಹೈಲೈಟ್‌ ಎಂಬುದು ತಂಡದ ಹೇಳಿಕೆ.

ಗಿಣಿ ಈ ಚಿತ್ರಕ್ಕೆ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದು ನಿರ್ದೇಶನ ಮಾಡಿದ್ದಾರೆ. ಜಿ.ವೆಟ್ರಿ ಅವರ ಛಾಯಾಗ್ರಹಣ ಚಿತ್ರಕ್ಕಿದೆ. ರವಿಚಂದ್ರನ್‌ ಅವರ ಸಂಕಲನವಿದೆ. ಶಿವು ಅವರ ಸಾಹಸವಿದೆ. ನಾಗೇಂದ್ರಪ್ರಸಾದ್‌ ಗೀತೆ ರಚಿಸಿದ್ದಾರೆ. ಚಿತ್ರದಲ್ಲಿ ಮನುಷ್‌, ಮಧುಮಿತ, ಬಾಲು, ಸೌಭಾಗ್ಯ, ಶ್ರೀಲಕ್ಷ್ಮೀ, ಕಾವ್ಯಾ ಪ್ರಕಾಶ್‌, ರಂಗಸ್ವಾಮಿ ಇತರರು ಇದ್ದಾರೆ.