ವಿಷ್ಣುದಾದಾ ನೆನಪಿನಲ್ಲಿ ‘ನಾ ತುಂಬಾ ಹೊಸಬ ಬಾಸು’ ಸಾಂಗ್ ರಿಲೀಸ್

Team Udayavani, Feb 5, 2019, 4:50 AM IST

ಸ್ಯಾಂಡಲ್ ವುಡ್ ನ ಗಂಡುಗಲಿ ನಿರ್ಮಾಪಕ ಕೆ. ಮಂಜು ಅವರ ಪುತ್ರ ಶ್ರೇಯಸ್ ಮಂಜು ಅವರು ನಾಯಕನಾಗಿ ಸ್ಯಾಂಡಲ್ ವುಡ್ ಗೆ ಎಂಟ್ರಿಯಾಗಲು ರೆಡಿಯಾಗಿದ್ದಾರೆ. ‘ಪಡ್ಡೆ ಹುಲಿ’ ಎಂಬ ಚಿತ್ರದ ಮೂಲಕ ಶ್ರೇಯಸ್ ನಾಯಕ ನಟನಾಗಿ ಬೆಳ್ಳಿತೆರೆ ಪ್ರವೇಶಿಸುತ್ತಿದ್ದಾರೆ.

ಈ ಚಿತ್ರದ ಹೈಲೈಟ್ ಸಾಂಗ್ ‘ನಾ ತುಂಬಾ ಹೊಸಬ ಬಾಸು…’ ಇದೀಗ ಯೂ ಟ್ಯೂಬ್ ನಲ್ಲಿ ಬಿಡುಗಡೆಗೊಂಡು ಸಖತ್ ಸೌಂಡ್ ಮಾಡುತ್ತಿದೆ. ಚಿತ್ರದುರ್ಗದ ಕಲ್ಲಿನ ಕೋಟೆಯಲ್ಲಿ ಈ ಹಾಡಿನ ಚಿತ್ರೀಕರಣ ಕಲರ್ ಫುಲ್ ಆಗಿ ಚಿತ್ರೀಕರಣಗೊಂಡಿದೆ. ಈ ಹಾಡಿನ ಇನ್ನೊಂದು ವಿಶೇಷವೆಂದರೆ ಸಾಹಸಸಿಂಹ ಅಭಿನವ ಭಾರ್ಗವ ವಿಷ್ಣುವರ್ಧನ್ ಅವರಿಗೆ ಈ ಹಾಡನ್ನು ಸಮರ್ಪಿಸಲಾಗಿದೆ. ಮಾತ್ರವಲ್ಲದೆ ಈ ಹಾಡಿನಲ್ಲಿ ನಾಯಕ ನಟ ಶ್ರೇಯಸ್ ಅವರು ವಿಷ್ಣು ದಾದಾ ಅವರು ನಾಗರ ಹಾವಿನಲ್ಲಿ ನಿರ್ವಹಿಸಿದ್ದ ರಾಮಾಚಾರಿ ಪಾತ್ರದ ಗೆಟಪ್ಪಿನಲ್ಲಿ ಕಾಣಿಸಿಕೊಂಡಿರುವುದು.

PRK ಆಡಿಯೋ ಮೂಲಕ ಈ ಹಾಡು ಇದೀಗ ಯೂ ಟ್ಯೂಬ್ ನಲ್ಲಿ ಬಿಡುಗಡೆಗೊಂಡಿದ್ದು ಸಿನಿಪ್ರಿಯರ ಮನಗೆದ್ದಿದೆ. ಸ್ಯಾಂಡಲ್ ವುಡ್ ನ ಘಟಾನುಘಟಿ ನಾಯಕರು ಈ ಹಾಡನ್ನು ಕೇಳಿ ಮೆಚ್ಚುಗೆ ವ್ಯಕ್ತಪಡಿಸಿ ಶ್ರೇಯಸ್ ಗೆ ಶುಭ ಹಾರೈಸಿದ್ದಾರೆ. ಅಜನೀಶ್ ಲೋಕನಾಥ್ ಅವರ ಸಂಗೀತ ನಿರ್ದೇಶನದಲ್ಲಿ ಈ ಹಾಡು ಮೂಡಿಬಂದಿದೆ. ಡಾ. ವಿ ನಾಗೇಂದ್ರ ಪ್ರಸಾದ್ ಅವರು ಈ ಹಾಡನ್ನು ಬರೆದಿದ್ದಾರೆ. ಶೇಶಾಂಕ್ ಶೇಷಗಿರಿ ಈ ಹಾಡನ್ನು ಹಾಡಿದ್ದು, ಗುಬ್ಬಿ ಅವರು ರ್ಯಾಪ್ ಧ್ವನಿ ನೀಡಿದ್ದಾರೆ.