ದರ್ಶನ್‌ಗಾಗಿ ಬಲುಪು ರೈಟ್ಸ್‌ ತಂದ ಶ್ರೀನಿವಾಸ್‌

Team Udayavani, Nov 7, 2017, 10:35 AM IST

ನಿರ್ಮಾಪಕ ಕನಕಪುರ ಶ್ರೀನಿವಾಸ್‌ ಸದ್ಯ ಖುಷಿಯಾಗಿದ್ದಾರೆ. ಆ ಖುಷಿಗೆ ಕಾರಣ “ಭರ್ಜರಿ’ ಎಂಬುದು ಎಲ್ಲರಿಗೂ ಗೊತ್ತಿರುವ ವಿಚಾರ. ಇಂತಿಪ್ಪ ಶ್ರೀನಿವಾಸ್‌ ಈಗ ಮತ್ತೂಬ್ಬ ಸ್ಟಾರ್‌ ನಟನಿಗೆ ಸಿನಿಮಾ ಮಾಡಲು ಆಲೋಚಿಸಿದ್ದಾರೆ. ಅದು ದರ್ಶನ್‌ಗೆ. ದರ್ಶನ್‌ಗೊಂದು ಸಿನಿಮಾ ಮಾಡಬೇಕೆಂಬುದು ಕನಕಪುರ ಶ್ರೀನಿವಾಸ್‌ ಅವರ ಆಸೆ.

ಅದಕ್ಕಾಗಿ ಅವರು ಒಂದು ಸಿನಿಮಾ ಕೂಡಾ ತಂದಿಟ್ಟಿದ್ದಾರೆ. ಹೌದು, ತೆಲುಗಿನ “ಬಲುಪು’ ಸಿನಿಮಾದ ರೀಮೇಕ್‌ ಹಕ್ಕನ್ನು ಖರೀದಿಸಿಟ್ಟುಕೊಂಡಿರುವ ಶ್ರೀನಿವಾಸ್‌, ಅದನ್ನು ದರ್ಶನ್‌ಗೆ ಮಾಡಬೇಕೆಂಬ ಆಲೋಚನೆಯಲ್ಲಿದ್ದಾರೆ. 2013ರಲ್ಲಿ ತೆರೆಕಂಡ “ಬಲುಪು’ ಚಿತ್ರದಲ್ಲಿ ರವಿತೇಜ ನಟಿಸಿದ್ದರು.

ಆ್ಯಕ್ಷನ್‌ ಕಾಮಿಡಿಯಾಗಿದ್ದ ಈ ಚಿತ್ರ ದೊಡ್ಡ ಮಟ್ಟದಲ್ಲಿ ಯಶಸ್ಸು ಕಂಡಿತ್ತು. ಆ ಚಿತ್ರವನ್ನು ಕನ್ನಡಕ್ಕೆ ಮಾಡುವ ಕನಸು ಕಾಣುತ್ತಿದ್ದಾರೆ ಶ್ರೀನಿವಾಸ್‌. ಎಲ್ಲಾ ಓಕೆ, ದರ್ಶನ್‌ ಒಪ್ಪಿದ್ದಾರಾ, ಯಾವಾಗ ಸಿನಿಮಾ ಯಾವಾಗಬಹುದೆಂದು ನೀವು ಕೇಳಿದರೆ ಸದ್ಯಕ್ಕೆ ಉತ್ತರವಿಲ್ಲ. ಏಕೆಂದರೆ, ದರ್ಶನ್‌ಗೆ ಸಿನಿಮಾ ಮಾಡಬೇಕೆಂಬುದು ಶ್ರೀನಿವಾಸ್‌ ಅವರ ಆಸೆ.

ಅದು ಮುಂದೆ ಈಡೇರುವ ವಿಶ್ವಾಸವೂ ಇದೆ. ಅದಕ್ಕಿಂತ ಹೆಚ್ಚಾಗಿ ದರ್ಶನ್‌ ಒಪ್ಪಿಕೊಂಡಿರುವ ಸಿನಿಮಾ ಮುಗಿಯಲು ಕಡಿಮೆ ಎಂದರೂ ಮೂರ್‍ನಾಲ್ಕು ವರ್ಷ ಬೇಕು. ಹಾಗಾಗಿ, ಮುಂದೆ ಸಿನಿಮಾ ಸೆಟ್ಟೇರಿದ ಮೇಲಷ್ಟೇ ಎಲ್ಲವೂ ಅಂತಿಮ. ಅಲ್ಲಿವರೆಗೆ “ಬಲುಪು’ ರೈಟ್ಸ್‌ ಶ್ರೀನಿವಾಸ್‌ ಅವರಲ್ಲಿರುತ್ತದೆ ಎನ್ನಬಹುದು.