ಸುದೀಪ್‌ ಸಿನಿಮಾ ಸದ್ಯಕ್ಕಿಲ್ಲ 

Team Udayavani, Jul 31, 2017, 10:51 AM IST

ಸಂತೋಷ್‌ ಆನಂದರಾಮ್‌ ನಿರ್ದೇಶನದ “ರಾಜ್‌ಕುಮಾರ’ ಚಿತ್ರದ ಶತದಿನ ಕಾರ್ಯಕ್ರಮ ಮೊನ್ನೆ ಮೊನ್ನೆಯಷ್ಟೇ ಅದ್ಧೂರಿಯಾಗಿ ನಡೆದಿದೆ. ಈಗ ಸಂತೋಷ್‌ ಆನಂದರಾಮ್‌ ಯಾವ ಸಿನಿಮಾ ಮಾಡುತ್ತಿದ್ದಾರೆಂಬುದು ಅನೇಕರು ಕುತೂಹಲ. ಈ ನಡುವೆಯೇ ಸಂತೋಷ್‌, ಸುದೀಪ್‌ಗೆ ಸಿನಿಮಾ ಮಾಡುತ್ತಾರೆ, ಹೊಂಬಾಳೆ ಪ್ರೊಡಕ್ಷನ್ಸ್‌ ಆ ಸಿನಿಮಾವನ್ನು ನಿರ್ಮಿಸುತ್ತಿದೆ ಎಂಬ ಸುದ್ದಿ ಜೋರಾಗಿ ಕೇಳಿಬರುತ್ತಿದೆ.

ಹಾಗಾದರೆ ಆ ಸಿನಿಮಾ ಯಾವತ್ತು ಆರಂಭವಾಗುತ್ತದೆ ಎಂದರೆ ಗೊತ್ತಿಲ್ಲ ಎಂಬ ಉತ್ತರ ಸಂತೋಷ್‌ ಆನಂದರಾಮ್‌ ಅವರಿಂದ ಬರುತ್ತದೆ. ಸದ್ಯ ಸಂತೋಷ್‌ ರಾಮ್‌ ಅವರ ಹೊಸ ಚಿತ್ರ ಆಗಸ್ಟ್‌ ಕೊನೆಯಲ್ಲಿ ಸೆಟ್ಟೇರಲಿದೆ. ಹಾಗಂತ ಈ ಚಿತ್ರದಲ್ಲಿ ಸುದೀಪ್‌ ನಟಿಸುತ್ತಿಲ್ಲ. ಬದಲಾಗಿ ಯಾರು ನಟಿಸುತ್ತಿದ್ದಾರೆಂಬುದನ್ನು ಸಂತೋಷ್‌ ಗೌಪ್ಯವಾಗಿಡುತ್ತಾರೆ. “ಸುದೀಪ್‌ ಅವರಿಗೆ ಸಿನಿಮಾ ಮಾಡಬೇಕೆಂಬುದು ಪ್ರತಿಯೊಬ್ಬ ನಿರ್ದೇಶಕನ ಕನಸು.

ನನಗೂ ಆ ಆಸೆ ಇದೆ. ಹಾಗಂತ ನಾನು ಅವರ ಜೊತೆ ಯಾವಾಗ ಸಿನಿಮಾ ಮಾಡುತ್ತೇನೆ ಗೊತ್ತಿಲ್ಲ. ಕಥೆ ರೆಡಿಯಾಗಬೇಕು, ಅದನ್ನು ಅವರಿಗೆ ರೀಡಿಂಗ್‌ ಕೊಡಬೇಕು, ಅದು ಓಕೆಯಾಗಬೇಕು. ಸದ್ಯ ನಾನು ಬೇರೆ ಪ್ರಾಜೆಕ್ಟ್ಗಳಲ್ಲಿ ತೊಡಗಿದ್ದೇನೆ. ಮುಂದಿನ ತಿಂಗಳಾಂತ್ಯದಲ್ಲಿ ಹೊಸ ಸಿನಿಮಾ ಆರಂಭವಾಗಬಹುದು. ಸುದೀಪ್‌ ಅವರು ಹೊಂಬಾಳೆಗೆ ಸಿನಿಮಾ ಮಾಡುತ್ತಿರೋದು ಹೌದು. ನಾನು ಕೂಡಾ ಸುದೀಪ್‌ ಅವರಿಗೆ ಸಿನಿಮಾ ಮಾಡುತ್ತೇನೆ. ಆದರೆ, ಯಾವಾಗ ಎಂಬುದು ಗೊತ್ತಿಲ್ಲ’ ಎನ್ನುವುದು ಸಂತೋಷ್‌ ಆನಂದರಾಮ್‌ ಮಾತು.

ಈ ನಡುವೆಯೇ ಸುದೀಪ್‌ ಹಾಗೂ ಸಂತೋಷ್‌ ಆನಂದರಾಮ್‌ ಅವರ ಚಿತ್ರಕ್ಕೆ “ಭಾರ್ಗವ’ ಎಂಬ ಟೈಟಲ್‌ ಇಡಲಾಗಿದೆ ಎಂಬ ಸುದ್ದಿಯೂ ಓಡಾಡುತ್ತಿದೆ. ಆದರೆ, ಸಂತೋಷ್‌ ಮಾತ್ರ ಈ ಸುದ್ದಿಯನ್ನು ಅಲ್ಲಗಳೆಯುತ್ತಾರೆ. “ಈ ಸುದ್ದಿಗಳು ಹೇಗೆ ಹುಟ್ಟಿಕೊಳ್ಳುತ್ತವೋ ಗೊತ್ತಿಲ್ಲ, ಸದ್ಯಕ್ಕೆ ನಾನು ಬೇರೆ ಪ್ರಾಜೆಕ್ಟ್ ಕಡೆ ಗಮನಹರಿಸುತ್ತಿದ್ದೇನೆ. ಒಮ್ಮೆ ಕಥೆ ಪಕ್ಕಾ ಆದ ನಂತರ ಸುದೀಪ್‌ ಅವರ ಬಳಿ ಹೋಗುತ್ತೇನೆ’ ಎನ್ನುತ್ತಾರೆ ಸಂತೋಷ್‌.