ಶತಕೋಟಿಗೊಬ್ಬ ಆಗ್ತಾರಾ ಸುದೀಪ್‌?

Team Udayavani, Dec 17, 2018, 11:34 AM IST

ನಿರ್ಮಾಪಕ ಸೂರಪ್ಪ ಬಾಬು ಅವರು ಕೋಟಿಗೊಬ್ಬ ಸೀರಿಸ್‌ ಬಿಟ್ಟು ಬರುವಂತೆ ಕಾಣುತ್ತಿಲ್ಲ. ವಿಷ್ಣುವರ್ಧನ್‌ ಅವರಿಗೆ “ಕೋಟಿಗೊಬ್ಬ’ ಸಿನಿಮಾ ಮಾಡಿದ್ದ ಸೂರಪ್ಪ ಬಾಬು ಅವರಿಗೆ ಆ ಚಿತ್ರ ದೊಡ್ಡ ಯಶಸ್ಸು ತಂದುಕೊಟ್ಟಿತ್ತು. ಆ ನಂತರ ಸುದೀಪ್‌ ಅವರು ನಾಯಕರಾಗಿದ್ದ “ಕೋಟಿಗೊಬ್ಬ-2′ ಚಿತ್ರ ಕೂಡಾ ಬಾಬು ಅವರಿಗೆ ಯಶಸ್ಸು ಕೊಟ್ಟ ಬೆನ್ನಲ್ಲೇ “ಕೋಟಿಗೊಬ್ಬ-3′ ಅನೌನ್ಸ್‌ ಮಾಡಿದರು.

ಆ ಚಿತ್ರದಲ್ಲೂ ಸುದೀಪ್‌ ಅವರು ನಾಯಕರಾಗಿ ನಟಿಸುತ್ತಿದ್ದಾರೆ. ಈಗಾಗಲೇ ಕೆಲವು ದಿನಗಳ ಚಿತ್ರೀಕರಣವಾಗಿದ್ದು, ಸಂಕ್ರಾಂತಿ ನಂತರ ಮತ್ತೆ “ಕೋಟಿಗೊಬ್ಬ-3′ ಆರಂಭವಾಗುತ್ತಿದೆ. ಈಗ ಬಾಬು “ಶತಕೋಟಿಗೊಬ್ಬ’ನ ಕನಸು ಕಾಣುತ್ತಿದ್ದಾರೆ. ಹೀಗೆಂದರೆ ನಿಮಗೆ ಆಶ್ಚರ್ಯವಾಗಬಹುದು. ಹೌದು, ನಿರ್ಮಾಪಕ ಸೂರಪ್ಪ ಬಾಬು ಅವರು “ಶತಕೋಟಿಗೊಬ್ಬ’ ಎಂಬ ಟೈಟಲ್‌ ರಿಜಿಸ್ಟರ್‌ ಮಾಡಿಸಿದ್ದಾರೆ.

ಈ ಮೂಲಕ ಮತ್ತೂಂದು “ಕೋಟಿಗೊಬ್ಬ’ ಸೀರಿಸ್‌ನ ಸಿನಿಮಾ ನಿರ್ಮಾಣ ಮಾಡಲು ಮುಂದಾದಂತಿದೆ. ಎಲ್ಲಾ ಓಕೆ, “ಶತಕೋಟಿಗೊಬ್ಬ’ ಚಿತ್ರಕ್ಕೆ ಯಾರು ನಾಯಕರಾಗುತ್ತಾರೆ ಎಂಬ ಪ್ರಶ್ನೆ ಬರಬಹುದು. ಆದರೆ, ಇದಕ್ಕೆ ಸದ್ಯಕ್ಕೆ ಉತ್ತರವಿಲ್ಲ. ಸದ್ಯ ಕೋಟಿಗೊಬ್ಬ ಸೀರೀಸ್‌ನಲ್ಲಿ ಸುದೀಪ್‌ ನಟಿಸುತ್ತಿರುವುದರಿಂದ “ಶತಕೋಟಿಗೊಬ್ಬ’ ಚಿತ್ರದಲ್ಲೂ ಸುದೀಪ್‌ ನಟಿಸಲಿದ್ದಾರೆಯೇ ಎಂದು ಅಭಿಮಾನಿಗಳು ಕೇಳಿದರೆ ಅದಕ್ಕೆ ಈಗಲೇ ಉತ್ತರಿಸುವುದು ಕಷ್ಟ.

ಏಕೆಂದರೆ ನಿರ್ಮಾಪಕ ಸೂರಪ್ಪ ಬಾಬು ಅವರು ಸದ್ಯ “ಕೋಟಿಗೊಬ್ಬ-3′ ನಿರ್ಮಾಣದಲ್ಲಿ ತೊಡಗಿದರೆ, ಸುದೀಪ್‌ ಕೂಡಾ “ಪೈಲ್ವಾನ್‌’, “ಕೋಟಿಗೊಬ್ಬ-3′ ಸೇರಿದಂತೆ ತಮ್ಮ ಕಮಿಟ್‌ಮೆಂಟ್‌ಗಳಲ್ಲಿ ಬಿಝಿ ಇದ್ದಾರೆ. ಒಂದು ವೇಳೆ ಸುದೀಪ್‌ ಬೇರೆ ಸಿನಿಮಾಗಳಲ್ಲಿ ಬಿಝಿಯಾದರೆ “ಶತಕೋಟಿಗೊಬ್ಬ’ ಯಾರಾಗುತ್ತಾರೆ ಎಂಬ ಕುತೂಹಲವೂ ಇದೆ. ಎಲ್ಲವೂ ಅಂತಿಮವಾಗಿ ಸಿನಿಮಾ ಸೆಟ್ಟೇರಿದಾಗ ಮಾತ್ರ ಆ ಕುತೂಹಲ ತಣಿಯಲಿದೆ.