ಸುದೀಪ್‌-ಪುನೀತ್‌ ಡ್ಯಾನ್ಸ್‌ ಡ್ಯಾನ್ಸ್‌

Team Udayavani, Jul 9, 2017, 5:54 PM IST

ಅದೊಂದು ಫೋಟೋ ನಿಜಕ್ಕೂ ಅಂಥದ್ದೊಂದು ಸದ್ದು ಮಾಡುತ್ತೆ ಅಂತ ಯಾರೂ ಊಹಿಸಿರಲಿಲ್ಲ. ಟ್ವಿಟ್ಟರ್‌, ಫೇಸ್‌
ಬುಕ್‌, ವಾಟ್ಸಾಪ್‌ ಅಷ್ಟೇ ಅಲ್ಲ, ಕನ್ನಡ ಚಿತ್ರಂಗದಲ್ಲೂ ಆ ಫೋಟೋ ಅತಿಹೆಚ್ಚು ಸುದ್ದಿ ಮಾಡಿತು ಅಂದರೆ
ನಂಬಲೇಬೇಕು. ಅಷ್ಟಕ್ಕೂ ಅದು ಯಾವ ಫೋಟೋ ಅನ್ನೋ ಪ್ರಶ್ನೆ ಎದುರಾಗೋದು ಸಹಜ. ಅದಕ್ಕೆ ಉತ್ತರ.

ಕೆಳಗಿರುವ ಈ ಫೋಟೋ. ಇದು ಕಂಡುಬಂದದ್ದು “ರಾಜಕುಮಾರ’ ಶತದಿನೋತ್ಸವ ಸಮಾರಂಭದಲ್ಲಿ. ಅಷ್ಟಕ್ಕೂ ಅಲ್ಲಿ ಸುದೀಪ್‌ ಹಾಗೂ ಪುನೀತ್‌ ಇವರಿಬ್ಬರೂ ಹೀಗೆ ಒಟ್ಟಿಗೆ ಸ್ಟೆಪ್‌ ಹಾಕಿದ್ದು ಯಾಕಂದರೆ… ಪುನೀತ್‌ ಮೇಲೇರಿ ಮೈಕ್‌ ಹಿಡಿದು ಮಾತಿಗಿಳಿದರು.

“ನನಗೆ ಚಿಕ್ಕಂದಿನಿಂದಲೂ ಡ್ಯಾನ್ಸ್‌ ಅಂದರೆ ಇಷ್ಟ. ಅದರಲ್ಲೂ ನನಗೆ ಮೈಕೆಲ್‌ ಜಾಕ್ಸನ್‌ ಅಂದರೆ ತುಂಬಾ ಇಷ್ಟ. ಸೈಯದ್‌ ಜಾμÅ ಮತ್ತು ಶಿವಣ್ಣ ಅವರ ಡ್ಯಾನ್ಸ್‌ ಕೂಡ ನನಗಿಷ್ಟ. ಇವರೆಲ್ಲರೂ ನಮ್ಮ ಜನರೇಷನ್‌ನ ಡ್ಯಾನ್ಸರ್ ಅಂತ ಗುಣಗಾನ ಮಾಡಿ ಕೆಳಗಿದರು. ಕಾರ್ಯಕ್ರಮಕ್ಕೆ ಅತಿಥಿಯಾಗಿ ಬಂದಿದ್ದ ಸುದೀಪ್‌ ವೇದಿಕೆ ಏರಿದರು.

“ನಾನು “ರಾಜಕುಮಾರ’ ಸಿನಿಮಾ ನೋಡಿ ಪುನೀತ್‌ಗೆ ಕಾಲ್‌ ಮಾಡಿದೆ. ಏನಪ್ಪಾ, ನೀನು ಅಷ್ಟೊಂದು ಅದ್ಭುತವಾಗಿ ಸ್ಟೆಪ್‌ ಹಾಕಿದ್ದೀಯ ಅಂತ ಕೇಳಿದೆ. ನಾನೂ ಕೂಡ ಮನೆಯಲ್ಲೇ ಆ ರೀತಿ ಸ್ಟೆಪ್‌ ಹಾಕೋಕೆ ಟ್ರೈ ಮಾಡಿದೆ. ಆಗಲಿಲ್ಲ. ಆಗ ನನಗನಿಸಿದ್ದು ನಾನು ಪುನೀತ್‌ ಅವರಿಂದ ಡ್ಯಾನ್ಸ್‌ ಕಲೀಬೇಕು ಅಂತ’ ಹೀಗೆ ಸುದೀಪ್‌ ಹೇಳುತ್ತಲೇ, “ಗೊಂಬೆ ಹೇಳುತೈತೆ ಮತ್ತೆ ಹೇಳುತೈತೆ ನೀನೆ ರಾಜಕುಮಾರ..’ ಅಂತ ಪುನೀತ್‌ ಜತೆ ಕೈ ತೋರಿಸಿ ಹಾಡಿದರು ಸುದೀಪ್‌.
ಅಷ್ಟೊತ್ತಿಗೆ ನಿರೂಪಕರು ಪುನೀತ್‌ ಅವರನ್ನೂ ವೇದಿಕೆಗೆ ಕರೆದರು. ಪುನೀತ್‌ ಬಂದೊಡನೆ, ವೇದಿಕೆ ಮೇಲಿಂದಲೇ ಸುದೀಪ್‌ಗೆ ಡ್ಯಾನ್ಸ್‌ ಸ್ಟೆಪ್‌ ಹೇಳಿಕೊಡಿ, ಇಲ್ಲಿಂದಲೇ ಶುರುವಾಗಲಿ ಅನ್ನೋ ಮಾತುಗಳು ಕೇಳಿಬಂತು. ಆಗ, ಪುನೀತ್‌ ಜೊತೆ ಸುದೀಪ್‌ “ಅಪ್ಪು ಡ್ಯಾನ್ಸ್‌ ಅಪ್ಪು ಡ್ಯಾನ್ಸ್‌..’ ಹಾಡಿಗೆ ಸ್ಟೆಪ್‌ ಹಾಕಿದರು.

ಅವರಿಬ್ಬರ ಸ್ಟೆಪ್‌ ನೋಡಿದ ಅಭಿಮಾನಿಗಳು ಶಿಳ್ಳೆ, ಕೇಕೆ ಹಾಕಿ ಕುಣಿದರು. ಆ ಫೋಟೋ, ಶನಿವಾರ ರಾತ್ರಿಯಿಂದಲೇ, ಸಿಕ್ಕಾಪಟ್ಟೆ ಓಡಾಡಿತು. ಟ್ವಿಟ್ಟರ್‌, ಫೇಸ್‌ಬುಕ್‌, ವಾಟ್ಸಾಪ್‌ ಹೀಗೆ ಸಾಮಾಜಿಕ ತಾಣಗಳಲ್ಲಿ ಜೋರು ಸುದ್ದಿ ಮಾಡಿತು. ಸಾಮಾಜಿಕ ತಾಣಗಳಲ್ಲಿ ಅತಿಹೆಚ್ಚು ಸುದ್ದಿ ಮಾಡಿದ ಫೋಟೋ ಎಂಬ ಹೆಗ್ಗಳಿಕೆಗೂ ಕಾರಣವಾಯಿತು.