ಬ್ಯಾಂಗ್ ಚಿತ್ರಕ್ಕೆ ಸುದೀಪ್ ಧ್ವನಿ

Team Udayavani, Jul 29, 2023, 5:04 PM IST

ಶಾನ್ವಿ ಶ್ರೀವಾತ್ಸವ್‌ ಅಭಿನಯದ ಡಾರ್ಕ್‌ ಕಾಮಿಡಿ ಕಂ ಆ್ಯಕ್ಷನ್‌ ಚಿತ್ರ “ಬ್ಯಾಂಗ್‌’ ಬಿಡುಗಡೆಗೆ ಸಜ್ಜಾಗಿದೆ. ಚಿತ್ರ ಆಗಸ್ಟ್‌ 18ರಂದು ರಾಜ್ಯಾದ್ಯಂತ ಬಿಡುಗಡೆಯಾಗುತ್ತಿದ್ದು, ಇದೀಗ ಚಿತ್ರಕ್ಕೆ ಕಿಚ್ಚ ಸುದೀಪ್‌, ಹಿನ್ನೆಲೆ ಧ್ವನಿ ನೀಡಿದ್ದು ಚಿತ್ರತಂಡದ ಉತ್ಸಾಹವನ್ನು ಇನ್ನಷ್ಟು ಹೆಚ್ಚಿಸಿದೆ.

ಈ ಕುರಿತು ಮಾತನಾಡಿರುವ ನಿರ್ದೇಶಕ ಗಣೇಶ್‌ ಪರಶುರಾಮ್, “ನಾವೆಲ್ಲರೂ ಸುದೀಪ್‌ ಅವರ ಚಿತ್ರಗಳನ್ನು ನೋಡಿ ಬೆಳೆದವರು. ಮೊದಲ ದಿನ ಮೊದಲ ಪ್ರದರ್ಶನದಲ್ಲೇ ಅವರ ಚಿತ್ರ ನೋಡಿ ಪುಳಕಿತರಾದವರು. ಅವರು ನಮ್ಮ ಚಿತ್ರಕ್ಕೆ ಧ್ವನಿ ನೀಡಿದಾಗ, ಅವರನ್ನು ಭೇಟಿಯಾಗಿ ಕೈಕುಲುಕಿದಾಗ, ನಮ್ಮ ಬಹು ವರ್ಷಗಳ ಕನಸು ನನಸಾದಂತಾಯಿತು.

ಚಿತ್ರದಲ್ಲಿನ ಸುದೀಪ್‌ ಅವರ ಉಪಸ್ಥಿತಿಯನ್ನು ಅವರ ಅಭಿಮಾನಿಗಳು ಸಹ ಇಷ್ಟಪಡುತ್ತಾರೆ ಎಂಬ ನಂಬಿಕೆ ಇದೆ’ ಎಂದು ಹೇಳಿದ್ದಾರೆ. ಪೂಜಾ ವಸಂತ್‌ ಕುಮಾರ್‌ ನಿರ್ಮಾಣದ “ಬ್ಯಾಂಗ್‌’ ಚಿತ್ರದಲ್ಲಿ ಶಾನ್ವಿ ಶ್ರೀವಾತ್ಸವ್‌ ಜೊತೆಗೆ ರಘು ದೀಕ್ಷಿತ್‌, ಸಾತ್ವಿಕಾ, ರಿತ್ವಿಕ್‌ ಮುರಳೀಧರ್‌, ಸುನೀಲ್‌ ಗುಜ್ಜಾರ್‌, ನಾಟ್ಯರಂಗ ಮುಂತಾದವರು ಅಭಿನಯಿಸಿದ್ದು, ಚಿತ್ರದ ಟ್ರೇಲರ್‌ ಶನಿವಾರ (ಜುಲೈ 29) ಬಿಡುಗಡೆಯಾಗಲಿದೆ.