ವಿನಯ್ “ಅನಂತ’ನಿಗೆ ಕಿಚ್ಚ ಸುದೀಪ್ ಸಾಥ್

Team Udayavani, Dec 30, 2018, 11:14 AM IST

ಸುಧೀರ್ ಶಾನುಭೋಗ್ ನಿರ್ದೇಶನದ ರಾಯಲ್​ ಸ್ಟಾರ್ ವಿನಯ್ ರಾಜ್​ಕುಮಾರ್​ ಅಭಿನಯದ “ಅನಂತು V/S ನುಸ್ರತ್’ ಈಗಾಗಲೇ ರಾಜ್ಯಾದ್ಯಂತ ಬಿಡುಗಡೆಯಾಗಿ ಸಿನಿರಸಿಕರಿಂದ ಒಳ್ಳೆಯ ಪ್ರತಿಕ್ರಿಯೆಯನ್ನು ಪಡೆದುಕೊಂಡಿದ್ದು, ವಿನಯ್ ರಾಜ್​ಕುಮಾರ್​ ಕರಿ ಕೋಟು ಧರಿಸಿ ವಕೀಲನ ಅವತಾರದಲ್ಲಿ ಕೋರ್ಟ್​ನಲ್ಲಿ ನ್ಯಾಯದ ಪಾಠದ ಜೊತೆಗೆ ಪ್ರೀತಿ ಪಾಠವನ್ನು ಆರಂಭಿಸಿದ್ದಾರೆ. ವಕೀಲ ಅನಂತ ಕೃಷ್ಣ ಎಂಬ ಪಾತ್ರದಲ್ಲಿ ಅಭಿನಯಿಸಿರುವ ವಿನಯ್​ಗೆ ಲತಾ ಹೆಗ್ಡೆ ನಾಯಕಿಯಾಗಿದ್ದಾರೆ.

ವಿನಯ್ ಇಲ್ಲಿ ಸಾಮಾನ್ಯ ವಕೀಲನಾದರೆ ಲತಾ ಹೆಗ್ಡೆ ಜಡ್ಜ್ ಪಾತ್ರಧಾರಿ ನುಸ್ರತ್ ಫಾತಿಮಾ ಆಗಿ ಕಾಣಿಸಿಕೊಂಡಿದ್ದಾರೆ. ಇದೊಂದು ಹಾಸ್ಯ ಮಿಶ್ರಿತ ನವಿರಾದ ಪ್ರೇಮಕಥೆಯಾಗಿದ್ದು, ಜಡ್ಜ್​ಗೆ ಮನಸೋತಿರುವ ವಕೀಲನ ಕಥೆ ಚಿತ್ರದಲ್ಲಿದೆ. ಇನ್ನು ಸ್ಯಾಂಡಲ್​ವುಡ್‍ನ ಸ್ಟಾರ್ ಗಳೂ ಈಗಾಗಲೇ ಚಿತ್ರಕ್ಕೆ ಶುಭಕೋರಿದ್ದು, ಇದೀಗ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್​ ಚಿತ್ರಕ್ಕೆ ಆಲ್​ ದಿ ಬೆಸ್ಟ್ ಎಂದಿದ್ದಾರೆ.

ಯೆಸ್, “ಅನಂತು V/S ನುಸ್ರತ್’ ಚಿತ್ರಕ್ಕೆ ಈಗಾಗಲೇ ಶುಭಾಶಯಗಳ ಮಹಾಪೂರ ಹರಿದುಬರುತ್ತಿದ್ದು, ಈ ಬಗ್ಗೆ ಕಿಚ್ಚ ಸುದೀಪ್ ತಮ್ಮ ಟ್ವೀಟರ್ ಖಾತೆಯಲ್ಲಿ “ಸಿನಿಮಾ ಕುರಿತು ಒಳ್ಳೆಯ ವಿಮರ್ಶೆ ಕೇಳಿ ಬರುತ್ತಿದೆ. ಹೀಗಾಗಿ ವಿನಯ್​ ಮತ್ತು ಚಿತ್ರತಂಡವರಿಗೆ ಶುಭಾಶಯ. ಪರಿಶ್ರಮಕ್ಕೆ ತಕ್ಕದಾದ ಫಲ ಸಿಕ್ಕಿದೆ’ ಎಂದು ಟ್ವೀಟ್ ಮಾಡುವ ಮೂಲಕ ಶುಭಾಶಯವನ್ನು ತಿಳಿಸಿದ್ದಾರೆ.