“ಗೋಧ್ರಾ’ ಚಿತ್ರಕ್ಕೆ ನಾಲ್ವರು ಸಂಗೀತ ನಿರ್ದೇಶಕರ ಸಾಥ್‌

Team Udayavani, Mar 12, 2020, 7:03 AM IST

ಪರಭಾಷೆಯಿಂದ ನಟ-ನಟಿಯರು ಹೇಗೆ ಕನ್ನಡಕ್ಕೆ ಬರುತ್ತಿದ್ದಾರೋ, ಅದರಂತೆ ಟೆಕ್ನಿಷಿಯನ್ಸ್‌ ಕೂಡಾ ಬರುತ್ತಿದ್ದಾರೆ. ಅದರಲ್ಲೂ ಸಂಗೀತ ನಿರ್ದೇಶಕರು, ಗಾಯಕರು ಸ್ವಲ್ಪ ಹೆಚ್ಚಿನ ಸಂಖ್ಯೆಯಲ್ಲೇ ಬರುತ್ತಿದ್ದಾರೆ. ಈಗ ಆ ಸಾಲಿಗೆ ಹೊಸ ಸೇರ್ಪಡೆ ಕೆಪಿ.

ತಮಿಳು ಚಿತ್ರರಂಗದಲ್ಲಿ ಕೀಬೋರ್ಡ್‌ ಪ್ರೋಗ್ರಾಮರ್‌ ಆಗಿ ಸಾಕಷ್ಟು ಸಂಗೀತ ನಿರ್ದೇಶಕರ ಜೊತೆ ಕೆಲಸ ಮಾಡಿದ ಅನುಭವವಿರುವ ಕೆಪಿ, “ಬೋಧಯ್‌ ಎರಿ ಭೂದಿ’ ಚಿತ್ರದ ಮೂಲಕ ಸ್ವತಂತ್ರ ಸಂಗೀತ ನಿರ್ದೇಶಕರಾದವರು. ಈಗ ಕನ್ನಡ ಚಿತ್ರವೊಂದಕ್ಕೆ ಹಿನ್ನೆಲೆ ಸಂಗೀತ ನೀಡುತ್ತಿದ್ದಾರೆ. ಅದು “ಗೋಧ್ರಾ’.

ಹೌದು, ನೀನಾಸಂ ಸತೀಶ್‌ ನಾಯಕರಾಗಿರುವ “ಗೋಧ್ರಾ’ ಚಿತ್ರದ ಹಿನ್ನೆಲೆ ಸಂಗೀತದ ಜವಾಬ್ದಾರಿಯನ್ನು ಕೆಪಿ ಅವರಿಗೆ ವಹಿಸಲಾಗಿದೆ. ಕೆಪಿ “ಗೋಧ್ರಾ’ ಚಿತ್ರಕ್ಕೆ ಸಂಗೀತ ನೀಡಲು ಒಪ್ಪುವ ಮುನ್ನ ಆ ಚಿತ್ರವನ್ನೊಮ್ಮೆ ವೀಕ್ಷಣೆ ಮಾಡಿದರಂತೆ. ಆ ಬಳಿಕ ಹಿನ್ನೆಲೆ ಸಂಗೀತ ನೀಡಲು ಒಪ್ಪಿದ್ದಾರೆ. ಕೆಪಿ ಹೊರತಾಗಿ ಇನ್ನೂ ಮೂವರು ಸಂಗೀತ ನಿರ್ದೇಶಕರು “ಗೋಧ್ರಾ’ ಚಿತ್ರಕ್ಕೆ ಸಂಗೀತ ನೀಡುತ್ತಿದ್ದಾರೆ.

ಜ್ಯೂಡಾ ಸ್ಯಾಂಡಿ, ನವೀನ್‌ ಸಜ್ಜು, ಟೋನಿ ಜೋಸೆಫ್ ಚಿತ್ರದ ಹಾಡುಗಳಿಗೆ ಸಂಗೀತ ನೀಡಿದ್ದಾರೆ. ಈಗ ಕೆಪಿ ಚಿತ್ರಕ್ಕೆ ಹಿನ್ನೆಲೆ ಸಂಗೀತ ನೀಡುತ್ತಿದ್ದಾರೆ. ಸತೀಶ್‌ ನೀನಾಸಂ ನಾಯಕರಾಗಿರುವ ಈ ಚಿತ್ರದಲ್ಲಿ ಶ್ರದ್ಧಾ ಶ್ರೀನಾಥ್‌ ನಾಯಕಿ. ಈ ಚಿತ್ರವನ್ನು ನಂದೀಶ್‌ ನಿರ್ದೇಶಿಸಿದ್ದು, ಲೀಡರ್‌ ಪ್ರೊಡಕ್ಷನ್ಸ್‌ನಡಿ ನಿರ್ಮಾಣವಾಗಿದೆ. ಶೀಘ್ರದಲ್ಲೇ ಚಿತ್ರ ಬಿಡುಗಡೆಯಾಗಲಿದೆ.