ಸುವರ್ಣದಲ್ಲಿ ಹೊಸ ಟಾಕ್‌ ಶೋ, ಮಾತುಕತೆ ವಿನಯ್‌ ಜೊತೆ

Team Udayavani, Jan 26, 2017, 11:25 AM IST

ಸೆಲೆಬ್ರೆಟಿಗಳ ಸಿನಿಮಾ ಬದುಕು, ವೈಯಕ್ತಿಕ ಜೀವನ, ಅವರ ದಿನಚರಿ ಸೇರಿದಂತೆ ಅನೇಕ ಅಂಶಗಳ ಮೇಲೆ ಬೆಳಕು ಚೆಲ್ಲುವ ಶೋಗಳು ಈಗಾಗಲೇ ಬಂದಿವೆ. ಈಗ ಆ ಸಾಲಿಗೆ ಹೊಸ ಸೇರ್ಪಡೆ “ಮಾತುಕತೆ ವಿನಯ್‌ ಜೊತೆ’. ಸುವರ್ಣ ವಾಹಿನಿಯಲ್ಲಿ ಈ ಶೋ ಈಗಾಗಲೇ ಆರಂಭವಾಗಿದ್ದು, ಪ್ರತಿ ಭಾನುವಾರ ಬೆಳಗ್ಗೆ 11 ಗಂಟೆಗೆ ಪ್ರಸಾರವಾಗಲಿದೆ. ವಿನಯ್‌ ಎನ್ನುವವರು ಈ ಶೋ ನಡೆಸಿಕೊಡುತ್ತಿದ್ದಾರೆ.

ಅಂದಹಾಗೆ, ವಿನಯ್‌ ಚಿತ್ರರಂಗ ಅಥವಾ ಮನರಂಜನಾ ಕ್ಷೇತ್ರಕ್ಕೆ ಸಂಬಂಧಪಟ್ಟವರಲ್ಲ. ಸಿಂಗಾಪೂರ್‌ನಲ್ಲಿ ಬ್ಯಾಂಕ್‌ ಉದ್ಯೋಗಿಯಾಗಿರುವ ವಿನಯ್‌ ಈ ಶೋಗೆ ಬರಲು ಕಾರಣ ಅವರ ಆಪ್ತರೊಬ್ಬರು ಕ್ಯಾನ್ಸರ್‌ನಿಂದ ತೀರಿಕೊಂಡಿದ್ದು. ವಿನಯ್‌ಗೆ ತುಂಬಾ ಬೇಕಾದವರೊಬ್ಬರು ಕ್ಯಾನ್ಸರ್‌ನಿಂದ ತೀರಿಕೊಂಡಾಗ ಆರೋಗ್ಯದ ಬಗ್ಗೆ ಅರಿವು ಮೂಡಿಸುವ ಯಾವುದಾದರೊಂದು ಶೋ ಮಾಡಬೇಕೆಂದು ನಿರ್ಧರಿಸಿದರಂತೆ.

ಆಗ ತೋಚಿದ್ದು “ಟಾಕ್‌ ಶೋ’. ಸೆಲೆಬ್ರೆಟಿಗಳ ಜೊತೆ ಮಾತನಾಡುತ್ತಲೇ ಅವರಿಂದ ಹೆಲ್ತ್‌ ಟಿಪ್ಸ್‌ ಕೊಡಿಸಿದರೆ ಜನರಿಗೆ ಬೇಗನೇ ತಲುಪುತ್ತದೆಂಬ ಕಾರಣಕ್ಕಾಗಿ ಶೋ ಆರಂಭಿಸಿದರಂತೆ. ಆರಂಭದಲ್ಲಿ ಯುಟ್ಯೂಬ್‌ನಲ್ಲಿ ಟಾಕ್‌ ಶೋ ಆರಂಭಿಸಿದ ವಿನಯ್‌ ಈಗ ಸುವರ್ಣ ವಾಹಿನಿಗೆ ಈ ಶೋ ನಡೆಸಿಕೊಡುತ್ತಿದ್ದಾರೆ.

ಶಿವರಾಜಕುಮಾರ್‌, ರಕ್ಷಿತ್‌ ಶೆಟ್ಟಿ ಸೇರಿದಂತೆ ಸುಮಾರು 24 ಮಂದಿ ಸೆಲೆಬ್ರೆಟಿಗಳು ಈ ಟಾಕ್‌ ಶೋನಲ್ಲಿ ಬಂದು ತಮ್ಮ ಸಿನಿಮಾ ಹಾಗೂ ವೈಯಕ್ತಿಕ ಜೀವನದ ಬಗ್ಗೆ ಮಾತನಾಡಿದ್ದಾರಂತೆ. ಇಲ್ಲಿ ಆರೋಗ್ಯದ ಕುರಿತಾಗಿಯೂ ಹೆಚ್ಚು ಫೋಕಸ್‌ ಮಾಡಲಾಗುತ್ತಿದ್ದು, ಈ ಶೋಗೆ ವಿಕ್ರಮ್‌ ಆಸ್ಪತ್ರೆ ಕೈ ಜೋಡಿಸಿದೆ. ಈಗಾಗಲೇ ಶೋ ಆರಂಭವಾಗಿದ್ದು, ಶೋಗೆ ಎಲ್ಲರಿಂದಲೂ ಮೆಚ್ಚುಗೆ ವ್ಯಕ್ತವಾಗುತ್ತಿದೆ ಎನ್ನುವುದು ವಿನಯ್‌ ಮಾತು.