‘ನನಗೂ ಹೆಂಡ್ತಿ ಬೇಕು’ ಎಂದ ತಬಲನಾಣಿ

Team Udayavani, Jul 25, 2023, 2:51 PM IST

ನಟ ತಬಲನಾಣಿ ಸಿನಿಮಾಗಳು ಅಂದ್ರೆ, ಅದರಲ್ಲಿ ಮಿನಿಮಂ ಕಾಮಿಡಿ ಪಕ್ಕಾ ಎನ್ನುವುದು ಪ್ರೇಕ್ಷಕರ ಅಭಿಪ್ರಾಯ. ಈಗ ತಬಲನಾಣಿ ಮತ್ತೂಂದು ಅಂಥದ್ದೇ ಔಟ್‌ ಆ್ಯಂಡ್‌ ಔಟ್‌ ಕಾಮಿಡಿ ಕಥಾಹಂದರದ ಸಿನಿಮಾದ ಮೂಲಕ ಪ್ರೇಕ್ಷಕರ ಮುಂದೆ ಬರುವ ತಯಾರಿಯಲ್ಲಿದ್ದಾರೆ. ಅಂದಹಾಗೆ, ಆ ಸಿನಿಮಾದ ಹೆಸರು “ನನಗೂ ಹೆಂಡ್ತಿ ಬೇಕು’.

ಹೌದು, ತಬಲನಾಣಿ ಅಭಿನಯಿಸುತ್ತಿರುವ ಹೊಸ ಸಿನಿಮಾಕ್ಕೆ “ನನಗೂ ಹೆಂಡ್ತಿ ಬೇಕು’ ಎಂದು ಟೈಟಲ್‌ ಇಡಲಾಗಿದ್ದು, ಇದೀಗ ಚಿತ್ರತಂಡ ಸಿನಿಮಾದ ಟೈಟಲ್‌ ಅನ್ನು ಅನೌನ್ಸ್‌ ಮಾಡಿದೆ.

ಇನ್ನು ಈ ಸಿನಿಮಾದಲ್ಲಿ ಮದುವೆಯಾಗಲು ಹೊರಟು ಒಂದು ಹೆಣ್ಣು ಕೂಡ ಸಿಗದೇ ಪರಿತಪಿಸುವ ಕುರುಡನ ಪಾತ್ರದಲ್ಲಿ ತಬಲನಾಣಿ ಕಾಣಿಸಿಕೊಳ್ಳುತ್ತಿದ್ದಾರೆ. ಇನ್ನು “ನನಗೂ ಹೆಂಡ್ತಿ ಬೇಕು’ ಸಿನಿಮಾದಲ್ಲಿ ತಬಲ ನಾಣಿಗೆ ಜೋಡಿಯಾಗಿ ಚೈತ್ರಾ ಕೋಟೂರು ಮೂಕಿಯ ಪಾತ್ರದಲ್ಲಿ ಅಭಿನಯಿಸುತ್ತಿದ್ದಾರೆ. “ಲೈರಾ ಎಂಟರ್‌ಟೈನ್ಮೆಂಟ್‌ ಅಂಡ್‌ ಮೀಡಿಯಾ’ ಬ್ಯಾನರ್‌ ಮೂಲಕ ಭರತ್‌ ಗೌಡ ಮತ್ತು ಸಿ. ರಮೇಶ್‌ ಜೊತೆಯಾಗಿ ನಿರ್ಮಿಸುತ್ತಿರುವ, ನನಗೂ ಹೆಂಡ್ತಿ ಬೇಕು’ ಸಿನಿಮಾಕ್ಕೆ ಈ ಹಿಂದೆ ದೇಶಪ್ರೇಮ

ಸಾರುವ “ಆ್ಯಕ್ಟ್ 370′ ಎಂಬ ಸಿನಿಮಾವನ್ನು ನಿರ್ದೇಶಿಸಿದ್ದ ಕೆ. ಶಂಕರ್‌ ಕಥೆ, ಚಿತ್ರಕಥೆ ಬರೆದು ಆ್ಯಕ್ಷನ್‌-ಕಟ್‌ ಹೇಳುತ್ತಿದ್ದಾರೆ. ತಬಲನಾಣಿ, ಚೈತ್ರಾ ಕೋಟೂರು ಅವರೊಂದಿಗೆ ರಾಜ್‌ ಬಾಲ, ಬ್ಯಾಂಕ್‌ ಜನಾರ್ಧನ್‌, ಶೃತಿ, ರಮೇಶ್‌ ಭಟ್‌, ಕಿಲ್ಲರ್‌ ವೆಂಕಟೇಶ್‌, ಗಣೇಶ್‌ ರಾವ್‌, ದೊಡ್ಡ ರಂಗೇಗೌಡ, ಧರ್ಮ, ಕೆಜಿಎಫ್ ಕೃಷ್ಣಪ್ಪ, ಪ್ರಿಯಾಂಕಾ, ಗಾನವಿ ಮುಂತಾದವರು ಸಿನಿಮಾದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ. ಚಿತ್ರದ ಎರಡು ಹಾಡುಗಳಿಗೆ ಕೆ. ಎಂ. ಇಂದ್ರ ಸಂಗೀತ ಸಂಯೋಜಿಸುತ್ತಿದ್ದಾರೆ.

ಈಗಾಗಲೇ “ನನಗೂ ಹೆಂಡ್ತಿ ಬೇಕು’ ಸಿನಿಮಾದ ಬಹುತೇಕ ಚಿತ್ರೀಕರಣವನ್ನು ಸದ್ದಿಲ್ಲದೆ ಪೂರ್ಣಗೊಳಿಸಿರುವ ಚಿತ್ರತಂಡ, ಸದ್ಯ ಸಿನಿಮಾದ ಕ್ಲೈಮ್ಯಾಕ್ಸ್‌ ದೃಶ್ಯಗಳ ಚಿತ್ರೀಕರಣದಲ್ಲಿ ನಿರತವಾಗಿದೆ