ಕೆಜಿಎಫ್ ಚಾಪ್ಟರ್‌-2 ಗೆ ತಮಿಳು ನಟ ಸರಣ್ ಎಂಟ್ರಿ

Team Udayavani, Aug 29, 2019, 3:03 AM IST

ಭಾರತೀಯ ಚಿತ್ರರಂಗವೇ ಹಾಗೊಮ್ಮೆ ತಿರುಗಿ ನೋಡುವಂತೆ ಮಾಡಿದ್ದ “ಕೆಜಿಎಫ್’ ಚಿತ್ರ ಈಗ ಎರಡನೇ ಭಾಗದಲ್ಲಿ ಬರುತ್ತಿರುವುದು ಗೊತ್ತೇ ಇದೆ. “ಕೆಜಿಎಫ್ ಚಾಪ್ಟರ್‌-2′ ಈಗಾಗಲೇ ಜೋರು ಚಿತ್ರೀಕರಣದಲ್ಲಿದೆ. ಇತ್ತೀಚೆಗಷ್ಟೇ “ಕೆಜಿಎಫ್ ಚಾಪ್ಟರ್‌-2’ಗೆ ಬಾಲಿವುಡ್‌ ನಟ ಸಂಜಯ್‌ದತ್‌ ಎಂಟ್ರಿಕೊಟ್ಟಿದ್ದರು. ಈಗ ತಮಿಳು ನಟರೊಬ್ಬರು “ಕೆಜಿಎಫ್ ಚಾಪ್ಟರ್‌ 2’ಗೆ ಎಂಟ್ರಿಯಾಗಿದ್ದಾರೆ ಎನ್ನಲಾಗಿದೆ.

ಹೌದು, ಅವರು ಬೇರಾರೂ ಅಲ್ಲ, ತಮಿಳಿನ ನಟ ಸರಣ್‌. ಚಿತ್ರದ ಪ್ರಮುಖ ಪಾತ್ರದಲ್ಲಿ ಅದರಲ್ಲೂ ಖದರ್‌ ಇರುವ ಪಾತ್ರದಲ್ಲಿ ಸರಣ್‌ ಕಾಣಿಸಿಕೊಳ್ಳುತ್ತಿದ್ದಾರೆಂಬ ಸುದ್ದಿ ಹೊರಬಿದ್ದಿದೆ. ಅಂದಹಾಗೆ, ಸರಣ್‌ ಅವರು ಈಗಾಗಲೇ ತಮಿಳಿನಲ್ಲಿ “ಕಾದಲ್’, “ವಿಶ್ವರೂಪಂ’, “ವಡಾಚೆನ್ನೈ’ ಸೇರಿದಂತೆ ಹಲವು ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ. ಇದೇ ಮೊದಲ ಸಲ “ಕೆಜಿಎಫ್ ಚಾಪ್ಟರ್‌ -2′ ಮೂಲಕ ಕನ್ನಡ ಚಿತ್ರರಂಗಕ್ಕೆ ಬರುತ್ತಿದ್ದಾರೆ.

ಈ ಕುರಿತು ಸ್ವತಃ ಸರಣ್‌ ಅವರೇ ಸಾಮಾಜಿಕ ಜಾಲತಾಣದಲ್ಲಿ ಹೇಳಿಕೊಂಡಿದ್ದಾರೆ. “ತುಂಬ ವಿನಮ್ರ ಮತ್ತು ಅದ್ಭುತ ವ್ಯಕ್ತಿಯೊಂದಿಗೆ ಕೆಲಸ ಮಾಡಲು ಸಂತೋಷವಾಗುತ್ತಿದೆ. ಯಶ್‌ ತೆರೆ ಮೇಲೆ ಮಾತ್ರ ಸ್ಫೂರ್ತಿ ಅಲ್ಲದೆ, ಪರದೆ ಹಿಂದೆಯೂ ಸ್ಫೂರ್ತಿಯಾಗಲಿದ್ದಾರೆ. “ಕೆಜಿಎಫ್-2′ ತಂಡದ ಜೊತೆ ಕೆಲಸ ಮಾಡಲು ಸಖತ್‌ ಎಕ್ಸೈಟ್‌ ಆಗಿದ್ದೀನಿ’ ಎಂದು ಹೇಳಿಕೊಂಡಿದ್ದಾರೆ.