ತಮಿಳಿಗೆ ಹೊರಟ ತಾರಕಾಸುರ

Team Udayavani, Jan 19, 2019, 5:33 AM IST

ಕಳೆದ ಅಕ್ಟೋಬರ್‌ ಕೊನೆಯ ವಾರ ತೆರೆಗೆ ಬಂದಿದ್ದ “ತಾರಕಾಸುರ’ ಚಿತ್ರ ಸದ್ದಿಲ್ಲದೆ ಐವತ್ತು ದಿನಗಳ ಯಶಸ್ವಿ ಪ್ರದರ್ಶನವನ್ನು ಪೂರ್ಣಗೊಳಿಸಿ ಮುನ್ನುಗ್ಗುತ್ತಿದೆ. ಇದರ ನಡುವೆಯೇ “ತಾರಕಾಸುರ’ ಚಿತ್ರದ ಬಗ್ಗೆ ಮತ್ತೂಂದು ವಿಷಯ ಹೊರಬಿದ್ದಿದೆ. ಅದೇನೆಂದರೆ, “ತಾರಕಾಸುರ’ ಚಿತ್ರ ತಮಿಳಿಗೆ ರಿಮೇಕ್‌ ಆಗುತ್ತಿದೆ.

ಈ ವಿಷಯವನ್ನು ಸ್ವತಃ ಖಚಿತಪಡಿಸಿರುವ ನಿರ್ದೇಶಕ ಚಂದ್ರಶೇಖರ ಬಂಡಿಯಪ್ಪ, “ಈಗಾಗಲೇ ಬಿಡುಗಡೆಯಾದ ಎಲ್ಲಾ ಕೇಂದ್ರಗಳಲ್ಲಿ “ತಾರಕಾಸುರ’ ಉತ್ತಮ ಪ್ರದರ್ಶನ ಕಾಣುತ್ತಾ ಮುನ್ನಡೆಯುತ್ತಿದೆ. ಚಿತ್ರವನ್ನು ನೋಡಿದವರು ಚಿತ್ರದ ಬಗ್ಗೆ ಸಾಕಷ್ಟು ಮೆಚ್ಚುಗೆಯ ಮಾತುಗಳನ್ನಾಡುತ್ತಿದ್ದಾರೆ.

ಇದೇ ವೇಳೆ ಚಿತ್ರವನ್ನು ನೋಡಿ ಖುಷಿಪಟ್ಟಿರುವ ತಮಿಳು ನಿರ್ಮಾಪಕರೊಬ್ಬರು ಈ ಚಿತ್ರವನ್ನು ತಮಿಳಿನಲ್ಲಿ ನಿರ್ಮಿಸಲು ಮುಂದೆ ಬಂದಿದ್ದಾರೆ. ಈಗಾಗಲೇ ಇದರ ಬಗ್ಗೆ ಒಂದು ಸುತ್ತಿನ ಮಾತುಕತೆ ನಡೆದಿದ್ದು, ಶೀಘ್ರದಲ್ಲೇ ಈ ಚಿತ್ರದ ಬಗ್ಗೆ ಇನ್ನಷ್ಟು ಮಾಹಿತಿಗಳನ್ನು ನೀಡಲಿದ್ದೇವೆ’ ಎನ್ನುತ್ತಾರೆ. 

ಇನ್ನು ತಮಿಳಿನಲ್ಲೂ “ತಾರಕಾಸುರ’ ಚಿತ್ರವನ್ನು ಚಂದ್ರಶೇಖರ ಬಂಡಿಯಪ್ಪ ಅವರೇ ನಿರ್ದೇಶಿಸಲಿದ್ದು, ಚಿತ್ರಕ್ಕೆ ತಮಿಳು ನಟ ಪ್ರಭು ಅವರ ಪುತ್ರ ವಿಕ್ರಂ ಪ್ರಭು ನಾಯಕ ನಟನಾಗುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ. ಆ ಚಿತ್ರ ಮುಗಿಸಿಕೊಂಡು ಚಂದ್ರಶೇಖರ್‌, ಶಿವರಾಜಕುಮಾರ್‌ ಅವರ ಜೊತೆಗಿನ “ವೈರಮುಡಿ’ ಕೈಗೆತ್ತಿಕೊಳ್ಳಲಿದ್ದಾರೆ.