ಕನ್ನಡಕ್ಕೆ ಬರ್ತಾಳಾ ಕಣ್ಸನ್ನೆಯ ಹುಡುಗಿ?

Team Udayavani, Feb 21, 2018, 11:12 AM IST

ಹುಬ್ಬು ಹಾರಿಸೋ ವೀಡಿಯೋ ಮೂಲಕ ದೇಶಾದ್ಯಂತ ಸಾಕಷ್ಟು ಸುದ್ದಿ ಮಾಡಿದವಳೆಂದರೆ ಮಲಯಾಳಂ ನಟಿ ಪ್ರಿಯಾ ವಾರಿಯರ್‌. ಒಂದೇ ದಿನದಲ್ಲಿ ಭಾರೀ ಪ್ರಚಾರ ಪಡೆದ ಹುಡುಗಿಯನ್ನು, ತಮ್ಮ ಚಿತ್ರದಲ್ಲಿ ನಟಿಸುವಂತೆ ಮಾಡುವುದಕ್ಕೆ ಎಲ್ಲಾ ಭಾಷೆಯ ಚಿತ್ರತಂಡಗಳು ಸಹ ಪ್ರಯತ್ನ ಮಾಡುತ್ತಿವೆ. ಈಗ ಕನ್ನಡದ ಒಂದು ತಂಡ ಸಹ ಅಂಥದ್ದೊಂದು ಪ್ರಯತ್ನ ಮಾಡಿದೆ ಎನ್ನುವುದು ವಿಶೇಷ.

ಅಂದಹಾಗೆ, ಇನ್ನಷ್ಟೇ ಚಿತ್ರೀಕರಣ ಆರಂಭಿಸಬೇಕಿರೋ “ಯೋಗಿ ಲವ್ಸ್‌ ಸುಪ್ರಿಯಾ’ ಚಿತ್ರ ತಂಡದವರು ಪ್ರಿಯಾ ವಾರಿಯರ್‌ಳನ್ನು ಭೇಟಿ ಮಾಡಿ, ತಮ್ಮ ಚಿತ್ರದಲ್ಲಿ ನಟಿಸುವುದಕ್ಕೆ ಆಹ್ವಾನ ನೀಡಿದ್ದಾರೆ. ಕನ್ನಡ ಚಿತ್ರರಂಗದಲ್ಲಿ ಕಳೆದ ಎಂಟು ವರ್ಷಗಳಿಂದ ಕಾರ್ಯ ನಿರ್ವಹಿಸುತ್ತಿರುವ ಯೋಗಿ ಅವರ ನಿರ್ದೇಶನದಲ್ಲಿ ಈ ಚಿತ್ರದಲ್ಲಿ ಮೂಡಿ ಬರಲಿದೆ. ಈ ಚಿತ್ರದಲ್ಲಿ ಅವರೇ ಹೀರೋ ಆಗಿ ನಟಿಸುತ್ತಿದ್ದು, ನಾಯಕಿ ಪಾತ್ರ ಮಾಡುವುದಕ್ಕೆ ಪ್ರಿಯಾ ವಾರಿಯರ್‌ ಅವರನ್ನು ಕೇಳಿದ್ದಾರೆ.

ಪ್ರಿಯಾಳ ಹುಬ್ಬು ಹಾರಿಸೋ ವೀಡಿಯೋ ಆರಂಭದಲ್ಲಿಯೇ ಯೋಗಿ ಕಣ್ಣಿಗೆ ಬಿದ್ದಿತ್ತಂತೆ. ಆದರೆ, ಅದಾಗಿ ಕ್ಷಣಗಳು ಕಳೆಯುವಷ್ಟರಲ್ಲಿಯೇ ವಾಟ್ಸಾಪ್‌, ಫೇಸ್‌ಬುಕ್‌ ತುಂಬೆಲ್ಲಾ ಅದು ವೈರಲ್‌ ಆಗಿ ಹೋಗಿತ್ತು. ತಮ್ಮ ಚಿತ್ರಕ್ಕೆ ಈ ಕಣ್ಸನ್ನೆ ಹುಡುಗಿಯೇ ಸೂಟ್‌ ಆಗುತ್ತಾಳೆಂದುಕೊಂಡವರು ಕೊಚ್ಚಿಯಲ್ಲಿರೋ ತಮ್ಮ ಗೆಳೆಯರಿಗೆ ಫೋನಾಯಿಸಿ ಆ ವೀಡಿಯೋ ಡೀಟೇಲ್ಸ್‌ ಪಡೆದುಕೊಂಡಿದ್ದರು.

ಆದರೆ, ಅದಾಗಲೇ ಕೆಲ ಸಂಘಟನೆಗಳು ಬೆದರಿಕೆ ಹಾಕಿದ್ದರಿಂದಾಗಿ ಪ್ರಿಯಾಳ ಮೊಬೈಲ್‌ ಸ್ವಿಚಾಫ್ ಆಗಿತ್ತು. ಕಡೆಗೂ ಪ್ರಯತ್ನ ಪಟ್ಟು “ಒರು ಆಧಾರ್‌ ಲವ್‌’ ಚಿತ್ರದ ನಿರ್ದೇಶಕನ ಮೂಲಕ ತಿಶೂರ್‌ಗೆ ತೆರಳಿದ ಯೋಗಿ ಕಡೆಗೂ ಪ್ರಿಯಾಳನ್ನು ಭೇಟಿಯಾಗಿದ್ದಾರೆ. ಕಥೆಯನ್ನು ಹೇಳಿದಾಗ ಆಕೆಯೂ ಖುಷಿಯಾಗಿಯೇ ಒಪ್ಪಿಕೊಂಡಿದ್ದಾಳಂತೆ. ಇನ್ನು ಅಂತಿಮ ಮಾತುಕತೆಯಷ್ಟೇ ಬಾಕಿ ಉಳಿದಿದೆ. ಸದ್ಯ ಭಾರೀ ಸುದ್ದಿಯಲ್ಲಿರುವ ಪ್ರಿಯಾ ವಾರಿಯರ್‌, “ಯೋಗಿ ಲವ್ಸ್‌ ಸುಪ್ರಿಯಾ’ ಚಿತ್ರದಲ್ಲಿ ನಟಿಸುತ್ತಾರಾ ಅನ್ನೋದನ್ನು ಕಾದು ನೋಡಬೇಕು.