ಶಿವರಾತ್ರಿಗೆ ಹೆಬ್ಬುಲಿ ಘರ್ಜನೆ

Team Udayavani, Feb 15, 2017, 11:04 AM IST

ಸುದೀಪ್‌  ಅವರ “ಹೆಬ್ಬುಲಿ’ ಚಿತ್ರ ಯಾವಾಗ ಬಿಡುಗಡೆಯಾಗುತ್ತದೆ ಎಂದು ಅಭಿಮಾನಿಗಳು ಕೇಳುತ್ತಿದ್ದರು. ಈಗ ಬಿಡುಗಡೆಯ ದಿನಾಂಕ ಅಂತಿಮವಾಗಿದೆ. ಅದು ಫೆ.23. ಹೌದು, ಫೆ.23 ರಂದು “ಹೆಬ್ಬುಲಿ’ ಚಿತ್ರ ಬಿಡುಗಡೆಯಾಗುತ್ತಿದೆ. ಕೇವಲ ರಾಜ್ಯವಷ್ಟೇ ಅಲ್ಲದೇ ಹೊರರಾಜ್ಯ ಹಾಗೂ ಹೊರದೇಶಗಳಲ್ಲೂ “ಹೆಬ್ಬುಲಿ’ ತೆರೆಗೆ ಬರುತ್ತಿದೆ.  

ಕೃಷ್ಣ ನಿರ್ದೇಶನದ ಈ ಸಿನಿಮಾವನ್ನು ಎಸ್‌.ಆರ್‌.ಪ್ರೊಡಕ್ಷನ್ಸ್‌ ಹಾಗೂ ಉಮಾಪತಿ ಫಿಲಂಸ್‌ ಬ್ಯಾನರ್‌ನಡಿ ರಘುನಾಥ್‌ ಹಾಗೂ ಉಮಾಪತಿ ಜೊತೆಯಾಗಿ ನಿರ್ಮಿಸಿದ್ದಾರೆ. ಅಮಲಾ ಪೌಲ್‌ ಈ ಸಿನಿಮಾದ ನಾಯಕಿ. ಈಗಾಗಲೇ ಸುದೀಪ್‌ ಅವರ ವಿಭಿನ್ನ ಗೆಟಪ್‌ ಸಿನಿಮಾ ಬಗೆಗಿನ ಕುತೂಹಲ ಹೆಚ್ಚಿದ್ದು, ಸುದೀಪ್‌ ಹೇರ್‌ಸ್ಟೈಲ್‌ ಕೂಡಾ ಟ್ರೆಂಡಿಂಗ್‌ ಆಗಿದೆ. ಅರ್ಜುನ್‌ ಜನ್ಯಾ ಸಂಗೀತ ನೀಡಿರುವ ಚಿತ್ರದ ಹಾಡುಗಳು ಬಿಡುಗಡೆಯಾಗಿದ್ದು, ಹಾಡುಗಳಿಗೂ ಒಳ್ಳೆಯ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. 

ಇನ್ನು, ಈ ಚಿತ್ರದಲ್ಲಿ ರವಿಚಂದ್ರನ್‌ ಕೂಡಾ ಪ್ರಮುಖ ಪಾತ್ರ ಮಾಡಿದ್ದು, ಸುದೀಪ್‌ ಅಣ್ಣನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಹಿಂದೆ “ಮಾಣಿಕ್ಯ’ ಸಿನಿಮಾದಲ್ಲಿ ಇವರಿಬ್ಬರು ಅಪ್ಪ-ಮಗನಾಗಿ ಕಾಣಿಸಿಕೊಂಡಿದ್ದರು. ಈಗ ಮತ್ತೂಮ್ಮೆ ತೆರೆಮೇಲೆ ಈ ಜೋಡಿ ಮೋಡಿ ಮಾಡಲಿದೆ. ಚಿತ್ರದಲ್ಲಿ ಸುದೀಪ್‌ ಪ್ಯಾರಾ ಮಿಲಿಟರಿ ಕಮಾಂಡೋ ಆಗಿ ನಟಿಸಿದ್ದಾರೆ. ನಿರ್ದೇಶಕ ಕೃಷ್ಣ ಅವರಿಗೂ ಈ ಸಿನಿಮಾ ಮೇಲೆ ಸಾಕಷ್ಟು ವಿಶ್ವಾಸವಿದೆ.

ಈ ಹಿಂದೆ ಸುದೀಪ್‌ ಮಾಡಿರದಂತಹ ಪಾತ್ರ ಈ ಸಿನಿಮಾದಲ್ಲಿ ಸಿಕ್ಕಿದೆ ಎನ್ನುತ್ತಾರೆ. ಅವರು ಹೇಳುವಂತೆ ಚಿತ್ರದಲ್ಲಿ ಕಮರ್ಷಿಯಲ್‌ ಅಂಶಗಳ ಜೊತೆಗೆ ಸೂಕ್ಷ್ಮವಾದ ಸಂದೇಶ ಕೂಡಾ ಅಡಗಿದೆಯಂತೆ.  ಸುಮಾರು 97 ದಿನಗಳ ಕಾಲ ಕರ್ನಾಟಕ, ಕಾಶ್ಮೀರ ಚಿತ್ರೀಕರಣ ಮಾಡಲಾಗಿದೆ. ಚಿತ್ರದಲ್ಲಿ ರವಿಶಂಕರ್‌, ಸಂಪತ್‌ರಾಜ್‌, ಚಿಕ್ಕಣ್ಣ ಸೇರಿದಂತೆ ಅನೇಕರು ನಟಿಸುತ್ತಿದ್ದಾರೆ.

ಚಿತ್ರಕ್ಕೆ ಕರುಣಾಕರ್‌ ಅವರ ಛಾಯಾಗ್ರಹಣ, ದೀಪು ಎಸ್‌ ಕುಮಾರ್‌ ಅವರ ಸಂಕಲನ, ಹರ್ಷ ನೃತ್ಯ ನಿರ್ದೇಶನವಿದೆ. “ಹೆಬ್ಬುಲಿ’ ಬಾಯಿಗೆ ಬಲಿಯಾಗೋದು ಬೇಡ ಎಂಬ ಕಾರಣಕ್ಕೆ ಸಾಕಷ್ಟು ಸಿನಿಮಾಗಳು ತಮ್ಮ ಬಿಡುಗಡೆಯನ್ನು ಕೂಡಾ ಮುಂದಕ್ಕೆ ಹಾಕಿವೆ. ಹಾಗಾಗಿ, ಮಾರ್ಚ್‌ ಎರಡನೇ ವಾರದ ನಂತರವೇ ಹೊಸಬರು ತಮ್ಮ ಸಿನಿಮಾಗಳನ್ನು ಬಿಡುಗಡೆ ಮಾಡಲು ನಿರ್ಧರಿಸಿದ್ದಾರೆನ್ನಲಾಗಿದೆ.