ಹೀಗೆ ಕಾಣ್ತಾರೆ ರವಿ-ಚಂದ್ರ

Team Udayavani, Aug 19, 2018, 11:25 AM IST

ರವಿಚಂದ್ರನ್‌ ಮತ್ತು ಉಪೇಂದ್ರ ಮೊದಲ ಬಾರಿಗೆ ನಟಿಸುತ್ತಿರುವ “ರವಿ-ಚಂದ್ರ’ ನಾಳೆ ಪ್ರಾರಂಭವಾಗುತ್ತಿದೆ. ಸೋಮವಾರ ಬೆಳಿಗ್ಗೆ ಬಸವನಗುಡಿ ರಸ್ತೆಯ ದೊಡ್ಡ ಗಣಪತಿ ದೇವಸ್ಥಾನದಲ್ಲಿ ಭರ್ಜರಿಯಾಗಿ ಮುಹೂರ್ತ ನಡೆಯಲಿದ್ದು, ಸಚಿವ ಡಿ.ಕೆ. ಶಿವಕುಮಾರ್‌, ಮಾಜಿ ಶಾಸಕ ಆರ್‌.ವಿ. ದೇವರಾಜ್‌ ಸೇರಿದಂತೆ ಸಾಕಷ್ಟು ರಾಜಕೀಯದ ಮತ್ತು ಚಿತ್ರರಂಗದ ಗಣ್ಯರು ಮುಹೂರ್ತ ಸಮಾರಂಭಕ್ಕೆ ಬರಲಿದ್ದಾರೆ.

ಈ ಮಧ್ಯೆ ಚಿತ್ರತಂಡದವರು ಸದ್ದಿಲ್ಲದೆ ಶುಕ್ರವಾರ ಹಾಗೂ ಶನಿವಾರ ಚಿತ್ರದ ಫೋಟೋಶೂಟ್‌ ಮುಗಿಸಿದ್ದಾರೆ. ಮಿನರ್ವ ಮಿಲ್‌ನಲ್ಲಿ ನಡೆದ ಈ ಫೋಟೋಶೂಟ್‌ನಲ್ಲಿ ರವಿಚಂದ್ರನ್‌, ಉಪೇಂದ್ರ, ಸಾನ್ವಿ ಶ್ರೀವಾತ್ಸವ್‌, ನಿಮಿಕಾ ರತ್ನಾಕರ್‌ ಅಲ್ಲದೆ ನೂರುಕ್ಕೂ ಹೆಚ್ಚು ಜನ ಭಾಗವಹಿಸಿದ್ದಾರೆ. ಖ್ಯಾತ ಛಾಯಾಗ್ರಾಹಕ ಮಹೇಂದ್ರ ಸಿಂಹ ಈ ಫೋಟೋ ಶೂಟ್‌ ಮಾಡಿದ್ದು, ರವಿಚಂದ್ರನ್‌ ಅವರ ಟೀಸರ್‌ ಚಿತ್ರೀಕರಣ ಸಹ ಮುಗಿದಿದೆ.

ಇನ್ನು ಉಪೇಂದ್ರ ಅವರ ಟೀಸರ್‌ ಚಿತ್ರೀಕರಣ ಸೋಮವಾರ ಮಧ್ಯಾಹ್ನ ನಡೆಯಲಿದೆ. ಈ ಪೈಕಿ ಉಪೇಂದ್ರ ಅವರ ಟೀಸರ್‌, ಅವರ ಹುಟ್ಟುಹಬ್ಬವಾದ ಸೆಪ್ಟೆಂಬರ್‌ 18ರಂದು ಬಿಡುಗಡೆಯಾದರೆ, ನವೆಂಬರ್‌ ಒಂದಕ್ಕೆ ರವಿಚಂದ್ರನ್‌ ಅವರ ಟೀಸರ್‌ ಬಿಡುಗಡೆ ಮಾಡುವುದಕ್ಕೆ ಯೋಚಿಸಿದೆ. ಬರೀ ಟೀಸರ್‌ಗಳ ಬಿಡುಗಡೆ ದಿನಾಂಕಗಳಷ್ಟೇ ಅಲ್ಲ, ಚಿತ್ರದ ಬಿಡುಗಡೆ ದಿನಾಂಕವನ್ನು ಸಹ ಚಿತ್ರತಂಡ ಫಿಕ್ಸ್‌ ಮಾಡಿದೆ.

ಮುಂದಿನ ವರ್ಷ ಸಂಕ್ರಾಂತಿ ಹೊತ್ತಿಗೆ ಚಿತ್ರವನ್ನು ಬಿಡುಗಡೆ ಮಾಡುವುದಕ್ಕೆ ಚಿತ್ರತಂಡ ತೀರ್ಮಾನಿಸಿದ್ದು, ಮುಂದಿನ ದಿನಗಳಲ್ಲಿ ಬೆಂಗಳೂರು, ಬಳ್ಳಾರಿ, ಸಂಡೂರು ಮುಂತಾದ ಕಡೆ ಸತತ ಚಿತ್ರೀಕರಣ ಮಾಡಲಿದೆ. “ರವಿ-ಚಂದ್ರ’ ಚಿತ್ರವನ್ನು ಹಿರಿಯ ನಿರ್ಮಾಪಕ ಕನಕಪುರ ಶ್ರೀನಿವಾಸ್‌ ತಮ್ಮ ಆರ್‌.ಎಸ್‌. ಪ್ರೊಡಕ್ಷನ್ಸ್‌ನಡಿ ನಿರ್ಮಿಸಿದರೆ, ಓಂಪ್ರಕಾಶ್‌ ರಾವ್‌ ನಿರ್ದೇಶನ ಮಾಡುತ್ತಿದ್ದಾರೆ. ಚಿತ್ರಕ್ಕೆ ಅರ್ಜುನ್‌ ಜನ್ಯಾ ಸಂಗೀತ, ರವಿಕುಮಾರ್‌ ಛಾಯಾಗ್ರಹಣ, ಶ್ರೀಕಾಂತ್‌ ಸಂಕಲನವಿದೆ.