ಸಾವಿರ ಕೋಟಿ ಕ್ಲಬ್‌ಗೆ ಕನ್ನಡದ ಕೆಜಿಎಫ್-2;  ಈ ಸಾಧನೆಯ ಮೊದಲ ಕನ್ನಡ ಸಿನೆಮಾ

Team Udayavani, Apr 30, 2022, 7:25 AM IST

ಬೆಂಗಳೂರು:  ನಿರೀಕ್ಷೆಯಂತೆಯೇ ಯಶ್‌ ನಟನೆಯ “ಕೆಜಿಎಫ್-2′ ಚಿತ್ರ ಒಂದು ಸಾವಿರ ಕೋಟಿ ರೂ.ಕಲೆಕ್ಷನ್‌ ಮಾಡಿದ್ದು, ಈ ಸಾಧನೆ ಮಾಡಿರುವ ಮೊದಲ ಕನ್ನಡ ಮೊದಲ ಹಾಗೂ ಭಾರತೀಯ ಚಿತ್ರರಂಗದ ನಾಲ್ಕನೇ ಸಿನೆಮಾ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

ಬಿಡುಗಡೆಯಾದ ದಿನದಿಂದಲೇ ಕಲೆಕ್ಷನ್‌ನಲ್ಲಿ ನಾಗಾಲೋಟದಲ್ಲೇ ಸಾಗಿದ “ಕೆಜಿಎಫ್-2′  15ನೇ ದಿನಕ್ಕೆ ಸಾವಿರ ಕೋಟಿ ಕಲೆಕ್ಷನ್‌ ಮಾಡುವ ಮೂಲಕ ಅತಿ ವೇಗದಲ್ಲಿ ಸಾವಿರ ಕೋಟಿ ಕ್ಲಬ್‌ ಸೇರಿದೆ. ಗುರುವಾರದ  ವೇಳೆಗೆ ಚಿತ್ರದ ಜಾಗತಿಕ  ಕಲೆಕ್ಷನ್‌ 997 ಕೋಟಿ ರೂ. ದಾಟಿದ್ದು, ಶುಕ್ರವಾರದ   ಸಾವಿರ ಕೋಟಿ ರೂಪಾಯಿಯ ಸಾಧನೆ ಮಾಡಿತು.

ಈಗಾಗಲೇ ಒಂದು ಸಾವಿರ ಕೋಟಿ ರೂ. ಕಲೆಕ್ಷನ್‌ ಮಾಡಿರುವ ಭಾರತೀಯ ಸಿನೆಮಾಗಳಲ್ಲಿ “ಕೆಜಿಎಫ್-2′ ನಾಲ್ಕನೇ ಚಿತ್ರ. “ದಂಗಲ್‌’, “ಬಾಹುಬಲಿ-2′ ಹಾಗೂ “ಆರ್‌ಆರ್‌ಆರ್‌’ ಚಿತ್ರ ಬಿಟ್ಟರೆ ಸಾವಿರ ಕೋಟಿ ಕ್ಲಬ್‌ ಸೇರಿದ ಹೆಗ್ಗಳಿಕೆ “ಕೆಜಿಎಫ್-2’ನದ್ದು.

“ಕೆಜಿಎಫ್-2′ ಚಿತ್ರ ಬಿಡುಗಡೆಯಾದ ಎಲ್ಲ ಕಡೆಗಳಲ್ಲೂ ಭರ್ಜರಿ ಪ್ರದರ್ಶನವನ್ನು ಮುಂದುವರಿಸಿಕೊಂಡು ಹೋದ ಪರಿಣಾಮ ಮೊದಲ ವಾರ 723 ಕೋಟಿ ರೂ.ಗೂ ಅಧಿಕ ಕಲೆಕ್ಷನ್‌ ಮಾಡಿದರೆ, ಎರಡನೇ ವಾರ  ಚಿತ್ರ 223 ಕೋಟಿ ರೂ.ಗೂ  ಅಧಿಕ ಕಲೆಕ್ಷನ್‌ ಮಾಡಿದೆ. ಚಿತ್ರ ಈಗ ಮೂರನೇ ವಾರ ಮುನ್ನುಗ್ಗುತ್ತಿದ್ದು, ಕಲೆಕ್ಷನ್‌ ವಿಷಯದಲ್ಲಿ ಬಿಡುಗಡೆಯಾದ ಎಲ್ಲ ಭಾಷೆಯ ಸಿನೆಮಾಗಳಿಗೆ ತೀವ್ರ ಪೈಪೋಟಿ ನೀಡಿ ಸಾಗುತ್ತಿದೆ.

ಬಾಲಿವುಡ್‌ನಲ್ಲಿ ರಾಕಿಭಾಯ್‌ ಹವಾ
ಸ್ಯಾಂಡಲ್‌ವುಡ್‌ನಿಂದ ತಯಾರಾಗಿ ಪ್ಯಾನ್‌ ಇಂಡಿಯಾ ಮಟ್ಟದಲ್ಲಿ ಬಿಡುಗಡೆಯಾದ “ಕೆಜಿಎಫ್-2′ ಚಿತ್ರ ಬಾಲಿವುಡ್‌ನಲ್ಲಿ ಭರ್ಜರಿ ಕಮಾಲ್‌ ಮಾಡಿದೆ. ಅಲ್ಲಿನ ಹಿಂದಿನ ಚಿತ್ರಗಳು ಮಾಡಿದ ಹಿಂದಿನ ಎಲ್ಲ ದಾಖಲೆಗಳನ್ನು ಉಡೀಸ್‌ ಮಾಡಿ ರಾಕಿಭಾಯ್‌ ಹವಾ ಮುಂದುವರೆದಿದೆ. ಬಾಲಿವುಡ್‌ವೊಂದರಲ್ಲೇ “ಕೆಜಿಎಫ್-2′ ಚಿತ್ರ 350 ಕೋಟಿ ರೂಪಾಯಿಗೂ ಹೆಚ್ಚು ಕಲೆಕ್ಷನ್‌ ಮಾಡಿ, ಉತ್ತರದ ಮಂದಿ ಹಾಟ್‌ ಫೇವರಿಟ್‌ ಎನಿಸಿಕೊಂಡಿದೆ.

ಪ್ರಥಮ, ದ್ವಿತೀಯ ಎರಡೂ “ಕೆಜಿಎಫ್’ ಮುಡಿಗೆ
ಕನ್ನಡದಲ್ಲಿ ತಯಾರಾಗಿ ಅತಿ ಹೆಚ್ಚು ಕಲೆಕ್ಷನ್‌ ಮಾಡಿದ ಸಿನೆಮಾಗಳಲ್ಲಿ “ಕೆಜಿಎಫ್-1′ ಹಾಗೂ “ಕೆಜಿಎಫ್-2′ ಸಿಗುತ್ತದೆ. “ಕೆಜಿಎಫ್-1′ ಚಿತ್ರ ಅಂದು 250 ಕೋಟಿ ರೂ.ಗಳಿಗಿಂತಲೂ ಅಧಿಕ ಕಲೆಕ್ಷನ್‌ ಮಾಡಿ, ಅತಿ ಹೆಚ್ಚು ಕಲೆಕ್ಷನ್‌ ಮಾಡಿದ ಕನ್ನಡದ ಮೊದಲ ಸಿನೆಮಾ ಎನಿಸಿತ್ತು. ಈಗ ಆ ದಾಖಲೆಯನ್ನು “ಕೆಜಿಎಫ್-2′ ಮುರಿದಿದೆ. ಈ ಮೂಲಕ ನಿರ್ಮಾಪಕ ವಿಜಯ್‌ ಕಿರಗಂದೂರು ಹಾಗೂ ನಿರ್ದೇಶಕ ಪ್ರಶಾಂತ್‌ ನೀಲ್‌ ಖುಷಿಯಾಗಿದ್ದಾರೆ.

ಇತ್ತೀಚೆಗೆ ಅತಿ ಹೆಚ್ಚು ಕಲೆಕ್ಷನ್‌ ಮಾಡಿದ ಕನ್ನಡ ಸಿನೆಮಾಗಳು

– ಕುರುಕ್ಷೇತ್ರ
–  ರಾಬರ್ಟ್‌
–  ರಾಜ್‌ಕುಮಾರ
–  ಜೇಮ್ಸ್‌
–  ಪೈಲ್ವಾನ್‌