ಅಕ್ಟೋಬರ್‌ 27ಕ್ಕೆ ಟೈಗರ್‌ ಗಲ್ಲಿ

Team Udayavani, Sep 25, 2017, 11:19 AM IST

ಸತೀಶ್‌ ನೀನಾಸಂ ಅಭಿನಯದ “ಟೈಗರ್‌ ಗಲ್ಲಿ’ ಎಂಬ ಚಿತ್ರವನ್ನು ಅವರು ಪ್ರಾರಂಭಿಸಿದ್ದು ಕಳೆದ ನವೆಂಬರ್‌ನಲ್ಲಿ. ಚಿತ್ರ ಸ್ವಲ್ಪ ತಡವಾಗಿ ಇದೀಗ ಬಿಡುಗಡೆಗೆ ಸಜ್ಜಾಗಿದೆ. ಅಕ್ಟೋಬರ್‌ ಕೊನೆಯ ವಾರದಲ್ಲಿ ಅಂದರೆ ಅಕ್ಟೋಬರ್‌ 27ಕ್ಕೆ ಚಿತ್ರ ಬಿಡುಗಡೆಯಾಗಲಿದೆ. ಚಿತ್ರ ಈಗಾಗಲೇ ಸೆನ್ಸಾರ್‌ ಆಗಿದ್ದು, ರವಿ ಶ್ರೀವತ್ಸ ಅವರ ಹಿಂದಿನ ಚಿತ್ರಗಳಂತೆ ಈ ಚಿತ್ರಕ್ಕೂ “ಎ’ ಪ್ರಮಾಣ ಪತ್ರ ಸಿಕ್ಕಿದೆ.

“ಟೈಗರ್‌ ಗಲ್ಲಿ’ ಚಿತ್ರವನ್ನು ರವಿ ಶ್ರೀವತ್ಸ ನಿರ್ದೇಶಿಸಿದ್ದು, ಚಿತ್ರಕ್ಕೆ ಅವರೇ ಕಥೆ ರಚಿಸಿದ್ದಾರೆ. ಇನ್ನು ಚಿತ್ರಕಥೆಯಲ್ಲಿ ಅವರಿಗೆ ಕೆ.ವಿ. ರಾಜು ಸಹಾಯ ಮಾಡಿದ್ದಾರೆ. ಸತೀಶ್‌ ಈ ಚಿತ್ರದಲ್ಲಿ ಮೊದಲ ಬಾರಿಗೆ ದ್ವಿಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದು, ಅದರಲ್ಲಿ ಒಂದು ಪಾತ್ರ ಪೊಲೀಸ್‌ ಅಧಿಕಾರಿಯ ಪಾತ್ರವಂತೆ. ಸತೀಶ್‌ ಜೊತೆಗೆ ನಾಯಕಿಯರಾಗಿ ರೋಶನಿ ಪ್ರಕಾಶ್‌ ಮತ್ತು ಭಾವನಾ ರಾವ್‌ ನಟಿಸಿದ್ದಾರೆ.

ಇನ್ನು ಯಮುನಾ ಶ್ರೀನಿಧಿ, ಶಿವಮಣಿ, “ಜಟ್ಟ’ ಗಿರಿರಾಜ್‌, ಯೋಗೇಶ್‌ ಕುಮಾರ್‌, ಅಯ್ಯಪ್ಪ ಶರ್ಮ,  ಅನಂತ್‌ ವೇಲು, ಪೂಜಾ ಲೋಕೇಶ್‌ ಸೇರಿದಂತೆ ಹಲವರು ನಟಿಸಿದ್ದಾರೆ. “ಟೈಗರ್‌ ಗಲ್ಲಿ’ ಚಿತ್ರದ ಇನ್ನೊಂದು ವಿಶೇಷತೆಯೆಂದರೆ, ಈ ಚಿತ್ರದಲ್ಲಿ 9 ನಿರ್ದೇಶಕರು ಕೆಲಸ ಮಾಡಿರುವುದು. ರವಿ ಶ್ರೀವತ್ಸ, ಕೆ.ವಿ. ರಾಜು, ಥ್ರಿಲ್ಲರ್‌ ಮಂಜು, ಮ್ಯಾಥ್ಯೂ ರಾಜನ್‌, ಗಿರಿರಾಜ್‌, ಶಿವಮಣಿ, ಸಾಯಿಕೃಷ್ಣ, ಅಯ್ಯಪ್ಪ ಪಿ. ಶರ್ಮ ಮತ್ತು ಆನಂದ್‌ ಕೆಲಸ ಮಾಡಿದ್ದಾರೆ.

“ಟೈಗರ್‌ ಗಲ್ಲಿ’ ಚಿತ್ರಕ್ಕೆ ಶ್ರೀಧರ್‌ ಸಂಭ್ರಮ್‌ ಸಂಗೀತ ಸಂಯೋಜಿಸಿದರೆ, ಮ್ಯಾಥ್ಯೂ ರಾಜನ್‌ ಛಾಯಾಗ್ರಹಣ ಮಾಡಿದ್ದಾರೆ. ಚಿತ್ರವನ್ನು ಎಂ.ಎನ್‌. ಕುಮಾರ್‌ ನಿರ್ಮಿಸಿದ್ದಾರೆ.