ದುಬೈನಲ್ಲಿ “ಅಸತೋಮ ಸದ್ಗಮಯ’ ಟ್ರೇಲರ್‌ ಬಿಡುಗಡೆ

Team Udayavani, Mar 27, 2018, 2:47 PM IST

“ಅಸತೋಮ ಸದ್ಗಮಯ’ ಎಂಬ ರಾಧಿಕಾ ಚೇತನ್‌ ಅಭಿನಯದ ಚಿತ್ರ ಬಿಡುಗಡೆಗೆ ಸಜ್ಜಾಗುತ್ತಿದೆ. ಈ ಮಧ್ಯೆ ಚಿತ್ರದ ಟ್ರೇಲರ್‌ ಬಿಡುಗಡೆಯಾಗಿದೆ. ಸಾಮಾನ್ಯವಾಗಿ ಚಿತ್ರದ ಟ್ರೇಲರ್‌ಗಳು ಗಾಂಧಿನಗರದಲ್ಲಿನ ಯಾವುದೋ ಹೋಟೆಲ್‌ನಲ್ಲೋ ಅಥವಾ ಯಾರಾದರೂ ಸ್ಟಾರ್‌ ಮನೆಯಲ್ಲೋ ಆಗುವುದು ವಾಡಿಕೆ. ಆದರೆ, “ಅಸತೋಮ ಸದ್ಗಮಯ’ ಚಿತ್ರದ ಟ್ರೇಲರ್‌ ಬಿಡುಗಡೆಯಾಗಿದ್ದು ಇಲ್ಲೆಲ್ಲೂ ಅಲ್ಲ. ದೂರದ ದುಬೈನಲ್ಲಿ.

ಹೌದು, “ಅಸತೋಮ ಸದ್ಗಮಯ’ ಚಿತ್ರದ ಟ್ರೇಲರ್‌ ಬಿಡುಗಡೆಯಾಗಿದ್ದು ದೂರದ ದುಬೈನಲ್ಲಿ. ಇದಕ್ಕಿಂತ ಮುನ್ನ ಕೆಲವು ಚಿತ್ರಗಳು ಇಲ್ಲಿ ಬಿಡುಗಡೆಯಾಗುವುದಕ್ಕಿಂತ ಮುನ್ನ, ಬೇರೆ ದೇಶದಲ್ಲಿ ಪ್ರೀಮಿಯರ್‌ ಆಗಿದ್ದವು. ಕೆಲವು ದಿನಗಳ ಹಿಂದೆ “ಕಿಸ್‌’ ಚಿತ್ರದ ಮೊದಲ ನೋಟವನ್ನು ಯಶ್‌ ಹಾಗೂ ರಾಧಿಕಾ ಪಂಡಿತ್‌ ಚಿಕಾಗೋದಲ್ಲಿ ಬಿಡುಗಡೆ ಮಾಡಿದ್ದರು. ಈಗ “ಅಸತೋಮ ಸದ್ಗಮಯ’ ಚಿತ್ರದ ಟ್ರೇಲರ್‌ ದುಬೈನಲ್ಲಿ ಬಿಡುಗಡೆಯಾಗಿದೆ. ಫಾರ್ಚೂನ್‌ ಗ್ರೂಪ್‌ ಆಫ್ ಹೋಟೆಲ್ಸ್‌ನ ಮಾಲೀಕರಾದ ಪ್ರವೀಣ್‌ ಶೆಟ್ಟಿ ಈ ಟ್ರೇಲರ್‌ ಬಿಡುಗಡೆ ಮಾಡಿದರು. ಈ ಸಂದರ್ಭದಲ್ಲಿ ದುಬೈನಲ್ಲಿ ನೆಲೆಸಿರುವ ಸಾಕಷ್ಟು ಕನ್ನಡಿಗರು ಹಾಆಜರಿದ್ದರು.

“ಅಸತೋಮ ಸದ್ಗಮಯ’ ಚಿತ್ರವನ್ನು ಅಶ್ವಿ‌ನ್‌ ಪಿರೇರಾ ನಿರ್ಮಿಸಿದರೆ, ರಾಜೇಶ್‌ ವೇಣೂರು ನಿರ್ದೇಶನ ಮಾಡಿದ್ದಾರೆ. ಚಿತ್ರಕ್ಕೆ ಕಥೆ ಮತ್ತು ಚಿತ್ರಕಥೆ ಸಹ ಅವರದ್ದೇ. ಈ ಚಿತ್ರಕ್ಕೆ ವಹಾಬ್‌ ಸಲೀಂ ಅವರು ಸಾಹಿತ್ಯ ಬರೆದು ಸಂಗೀತ ಸಂಯೋಜಿಸಿದರೆ, ಕಿಶೋರ್‌ ಕುಮಾರ್‌ ಛಾಯಾಗ್ರಹಣ ಮಾಡಿದ್ದಾರೆ. ಚಿತ್ರದಲ್ಲಿ ರಾಧಿಕಾ ಚೇತನ್‌ ಜೊತೆಗೆ ಕಿರಣ್‌ ರಾಜ್‌, ಲಾಸ್ಯ ನಾಗರಾಜ್‌ ಮುಂತಾದವರು ನಟಿಸಿದ್ದಾರೆ.