ಡಬ್ಬಿಂಗ್‌ ಆರಂಭಿಸಿದ ‘ಅನ್ಲಾಕ್‌ ರಾಘವ’

Team Udayavani, Apr 13, 2023, 2:40 PM IST

ನವ ಪ್ರತಿಭೆ ಮಿಲಿಂದ್‌ ನಾಯಕನಾಗಿ ಹಾಗೂ ರಚೆಲ್‌ ಡೇವಿಡ್‌ ಜೋಡಿಯಾಗಿ ಅಭಿನಯಿಸುತ್ತಿರುವ “ಅನ್ಲಾಕ್‌ ರಾಘವ’ ಸಿನಿಮಾದ ಚಿತ್ರೀಕರಣ ಇತ್ತೀಚೆಗೆ ಪೂರ್ಣಗೊಂಡಿದ್ದು, ಚಿತ್ರತಂಡ ನಿಧಾನವಾಗಿ ಸಿನಿಮಾದ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳಿಗೆ ಚಾಲನೆ ನೀಡಿದೆ.

ಸದ್ಯ “ಅನ್ಲಾಕ್‌ ರಾಘವ’ ಸಿನಿಮಾದ ಮಾತಿನ ಮರು ಜೋಡಣೆ ಶುರುವಾಗಿದ್ದು, “ಪಿಆರ್‌ಕೆ ಆಡಿಯೋ’ ಸ್ಟುಡಿಯೋದಲ್ಲಿ ಡಬ್ಬಿಂಗ್‌ ಕೆಲಸಗಳು ಆರಂಭವಾಗಿದೆ. ಇನ್ನು ಈ ಸಿನಿಮಾದ ನಾಯಕಿ ಕೇರಳ ಮೂಲದ ರಚೆಲ್‌ ಡೇವಿಡ್‌ ತಮ್ಮ ಪಾತ್ರಕ್ಕಾಗಿ ಕನ್ನಡ ಪದಗಳ ಉಚ್ಛಾರಣೆಯನ್ನು ಕಲಿತು, ತಮ್ಮ ಪಾತ್ರಕ್ಕೆ ತಾವೇ ಡಬ್‌ ಮಾಡುತ್ತಿದ್ದಾರೆ. ರಚೆಲ್‌ ಈ ಪ್ರಯತ್ನಕ್ಕೆ “ಅನ್ಲಾಕ್‌ ರಾಘವ’ ಚಿತ್ರತಂಡ ಕೂಡ ಸಾಥ್‌ ನೀಡುತ್ತಿದೆ.

ಚಿತ್ರದುರ್ಗ, ಬೆಂಗಳೂರು ಸುತ್ತಮುತ್ತ ಸುಮಾರು 60 ದಿನಗಳ ಕಾಲ “ಅನ್ಲಾಕ್‌ ರಾಘವ’ ಸಿನಿಮಾದ ಶೂಟಿಂಗ್‌ ನಡೆಸಲಾಗಿದೆ. ಸಿನಿಮಾದಲ್ಲಿ ಮೂರು ಹಾಡುಗಳಿದ್ದು, ಅನೂಪ್‌ ಸೀಳಿನ್‌ ಸಂಗೀತ ಸಂಯೋಜನೆಯಿದೆ. ನಾಲ್ಕು ಭರ್ಜರಿ ಆ್ಯಕ್ಷನ್‌ ದೃಶ್ಯಗಳಿಗೆ ವಿನೋದ್‌ ಮತ್ತು ಅರ್ಜುನ್‌ ಸಾಹಸ ಸಂಯೋಜಿಸಿದ್ದಾರೆ.

“ಸತ್ಯ ಹಾಗೂ ಮಯೂರ ಪಿಕ್ಚರ್’ ಬ್ಯಾನರಿನಲ್ಲಿ ಡಿ. ಸತ್ಯ ಪ್ರಕಾಶ್‌ ಮತ್ತು ಮಂಜುನಾಥ್‌ ದಾಸೇಗೌಡ ಹಾಗೂ ಗಿರೀಶ್‌ ಕುಮಾರ್‌ ಜಂಟಿಯಾಗಿ ನಿರ್ಮಿಸುತ್ತಿರುವ “ಅನ್ಲಾಕ್‌ ರಾಘವ’ ಸಿನಿಮಾಕ್ಕೆ ದೀಪಕ್‌ ಮಧುವನಹಳ್ಳಿ ನಿರ್ದೇಶನವಿದೆ.  ಚಿತ್ರಕ್ಕೆ ಸತ್ಯಪ್ರಕಾಶ್‌ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದಿದ್ದು, ಲವಿತ್‌ ಛಾಯಾಗ್ರಹಣ, ಅಜಯ್‌ ಕುಮಾರ್‌ ಸಂಕಲನವಿದೆ.

ಇದನ್ನೂ ಓದಿ:‘ರಾಘವೇಂದ್ರ ಸ್ಟೋರ್’: ಸಿಂಗಲ್ ಸುಂದರನಿಗೆ ಸಾಥ್ ನೀಡಿದ ರಕ್ಷಿತ್ ಶೆಟ್ಟಿ

ಇನ್ನು “ಅನ್ಲಾಕ್‌ ರಾಘವ’ ಸಿನಿಮಾದಲ್ಲಿ ಮಿಲಿಂದ್‌, ರಚೆಲ್‌ ಜೊತೆಗೆ ಸಾಧುಕೋಕಿಲ, ಅವಿನಾಶ್‌, ಶೋಭರಾಜ್‌, ರಮೇಶ್‌ ಭಟ್‌, ವೀಣಾ ಸುಂದರ್‌, ಸುಂದರ್‌, ಧರ್ಮಣ್ಣ ಕಡೂರು, ಸಾಯಿ ಕುಡ್ಲ, ಭೂಮಿ ಶೆಟ್ಟಿ, ಮೂಗೂರು ಸುರೇಶ್‌, ಅಥರ್ವ ಪ್ರಕಾಶ್‌, ಶ್ರೀದತ್ತ, ಬೃಂದಾ ವಿಕ್ರಮ್‌ ಮೊದಲಾದವರು ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.

ಸದ್ಯ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳಲ್ಲಿ ನಿರತವಾಗಿರುವ ಚಿತ್ರತಂಡ, ಇದೇ ಜುಲೈ ಅಂತ್ಯದ ವೇಳೆಗೆ “ಅನ್ಲಾಕ್‌ ರಾಘವ’ ಸಿನಿಮಾವನ್ನು ಪ್ರೇಕ್ಷಕರ ಮುಂದೆ ತರುವ ಯೋಚನೆಯಲ್ಲಿದೆ.