‘ಸಿಂಹ’ ಆಡಿಯೋದಲ್ಲಿ ವಸಿಷ್ಠ ಕನಸು

Team Udayavani, Apr 7, 2022, 2:27 PM IST

ಹಿನ್ನಲೆ ಗಾಯಕ ಆಗಬೇಕು ಎಂಬ ಆಸೆಯೊಂದಿಗೆ ಚಿತ್ರ ರಂಗಕ್ಕೆ ಕಾಲಿಟ್ಟ, ವಸಿಷ್ಠ ಸಿಂಹ ನಟನಾಗಿ ಸಾಕಷ್ಟು ಹೆಸರು ಪಡೆದಿದ್ದಾರೆ. ಇದೀಗ ತಮ್ಮ ಸಂಗೀತ ಒಲವನ್ನು ಬಿಡದ ವಸಿಷ್ಠ ಸಿಂಹ ತಮ್ಮದೇ ಸ್ವಂತ ಆಡಿಯೋ ಸಂಸ್ಥೆಯೊಂದು ಪ್ರಾರಂಭಿಸಿದ್ದಾರೆ.

ಇತ್ತೀಚಿಗೆ ನಡೆದ ಆಡಿಯೋ ಲಾಂಚ್‌ ಕಾರ್ಯಕ್ರಮದಲ್ಲಿ ಸಂಗೀತ ನಿರ್ದೇಶಕ ಹಂಸಲೇಖ “ಸಿಂಹ ಆಡಿಯೋ’ ಸಂಸ್ಥೆ ಲೋಗೋ ಲೋಕಾರ್ಪಣೆಗೊಳಿಸಿದರು. ಬಳಿಕ ಮಾತನಾಡಿದ ಹಂಸಲೇಖ, “ಚಂದನವನದ “ಕಾಲಚಕ್ರ’ ಚೆನ್ನಾಗಿ ತಿರುಗುತ್ತಿದ್ದು, ಇಂದು ಕಲಾಚಕ್ರವಾಗಿದೆ.

ಪ್ರತಿಯೊಬ್ಬ ಕಲಾವಿದನೂ ಇಂದು ಸಂಪೂರ್ಣ ತಯಾರಿಯೊಂದಿಗೆ ಚಿತ್ರರಂಗಕ್ಕೆ ಕಾಲಿಡುತ್ತಿದ್ದಾರೆ. ಸಿಂಹ ಕಾಡನ್ನು ಆಳುತ್ತೆ. ಆದರೆ ಇನ್ನು ಮುಂದೆ ಈ ಸಿಂಹ ಹಾಡನ್ನು ಆಳುತ್ತದೆ ಅನ್ನುವುದಕ್ಕೆ “ಸಿಂಹ ಆಡಿಯೋ’ ಸಾಕ್ಷಿ. ಈ ಮೂಲಕ ಹೊಸ ಪ್ರತಿಭೆಗಳಿಗೆ ಅವಕಾಶ ಸಿಗಲಿ’ ಎಂದು ಶುಭ ಹಾರೈಸಿದರು.

ಇದನ್ನೂ ಓದಿ:ಫಾರ್‌ ರಿಜಿಸ್ಟ್ರೇಶನ್‌; ದಿಯಾ ಹೀರೋ; ಲವ್‌ ಮಾಕ್ಟೇಲ್‌ ಹೀರೋಯಿನ್‌!

ಕೋವಿಡ್‌ ನಿಂದಾಗಿ ಸಾಕಷ್ಟು ಚಿತ್ರಗಳು ತಮ್ಮ ಬಿಡುಗಡೆಯನ್ನು ಮುಂದಕ್ಕೆ ಹಾಕಿದ್ದವು. ಇತ್ತೀಚಿಗೆ ಒಂದರ ಹಿಂದೆ ಒಂದು ಬಿಡುಗಡೆಗೊಳ್ಳುತ್ತಿದೆ. ಆ ಸಾಲಿಗೆ ವಸಿಷ್ಠ ಸಿಂಹ ನಾಯಕನಟನಾಗಿ ಅಭಿನಯಿಸಿರುವ “ಕಾಲಚಕ್ರ’ವೂ ಸೇರಿದೆ.

ಇದೇ ಸಂರ್ಭದಲ್ಲಿ “ಕಾಲಚಕ್ರ’ದ ರೊಮ್ಯಾಂಟಿಕ್‌ ಹಾಡು “ನೀನೇ ಬೇಕು’ ಲಿರಿಕಲ್‌ ಆಡಿಯೋವನ್ನು ನಟ ಧನಂಜಯ್‌ ಬಿಡುಗಡೆಗೊಳಿಸಿದರು. ಈ ಸಂದ ರ್ಭ ದಲ್ಲಿ ಮಾತನಾಡಿದ ಅವ ರು, “ನಮ್ಮದು ಗ್ಯಾಂಗ್‌ಸ್ಟರ್‌ ಇಮೇಜ್‌. ನಾಯಕನಾಗಿ ಅಭಿನಯಿಸುತ್ತಾರೆ ಅಂದರೆ ಮೂಗು ಮುರಿಯುವವರೇ ಜಾಸ್ತಿ. ಆದರೂ ಪಾತ್ರಗಳು ಹಾಗೂ ಅಭಿನಯ ವಸಿಷ್ಠನನ್ನು ಗುರುತಿಸುವಂತೆ ಮಾಡಿದೆ. ವಸಿಷ್ಠನ ಈ ರೊಮ್ಯಾಟಿಂಕ್‌ ಲುಕ್‌ ನೋಡಿ ಸಂತಸವಾಯಿತು’ ಎಂದರು.

ಕಾರ್ಯಕ್ರಮದಲ್ಲಿ “ಕಾಲಚಕ್ರ’ ಚಿತ್ರದ ನಿರ್ಮಾಪಕ ಕಂ ನಿರ್ದೇಶಕ ಸುಮಂತ್‌ ಕ್ರಾಂತಿ, ನಾಯಕಿ ರಕ್ಷಾ, ಛಾಯಾಗ್ರಾಹಕ ಎಲ್‌.ಎಂ ಸೂರಿ ವೇದಿಕೆಯಲ್ಲಿ ಉಪಸ್ಥಿತರಿದ್ದರು. ಚಿತ್ರದಲ್ಲಿ ವಸಿಷ್ಠ ಸಿಂಹ ಜೊತೆ ರಕ್ಷಾ, ಸುಚೇಂದ್ರ ಪ್ರಸಾದ್‌, ದೀಪಕ್‌ ಶೆಟ್ಟಿ, ಮತ್ತು ಅವಿಕಾ ರಾಥೋಡ್‌ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಗುರು ಕಿರಣ್‌ ಸಂಗೀತ ನೀಡಿದ್ದು, ಎಲ್‌.ಎಂ ಸೂರಿ ಛಾಯಾಗ್ರಹಣವಿದೆ