ವಿಜಯಲಕ್ಷ್ಮೀ ವಿನೋದ್‌ಗೆ ತಾಯಿ, ಫೈಟರ್‌ ಚಿತ್ರದಲ್ಲಿ ಜಿಲ್ಲಾಧಿಕಾರಿ

Team Udayavani, Jul 16, 2018, 3:38 PM IST

ಕೆಲವು ದಿನಗಳ ಹಿಂದಷ್ಟೇ, “ತಮಗೆ ಸಿನಿಮಾದಲ್ಲಿ ನಟಿಸಲು ಅವಕಾಶವೇ ಸಿಗುತ್ತಿಲ್ಲ. ನಾನೀಗ ಯಾವ ಪಾತ್ರವಿದ್ದರೂ ನಟಿಸೋಕೆ ರೆಡಿ. ಆದರೆ, ಯಾರೊಬ್ಬರೂ ಕರೆದು ಅವಕಾಶ ಕೊಡುತ್ತಿಲ್ಲ’ ಎಂದು ತಮ್ಮ ಅಳಲು ತೋಡಿಕೊಂಡಿದ್ದ ನಟಿ ವಿಜಯಲಕ್ಷ್ಮೀ ಅವರಿಗೀಗ ನಟಿಸುವ ಅವಕಾಶ ಸಿಕ್ಕಿದೆ. ಹೌದು, ವಿನೋದ್‌ ಪ್ರಭಾಕರ್‌ ಅಭಿನಯದ “ಫೈಟರ್‌’ ಚಿತ್ರದಲ್ಲಿ ವಿಜಯಲಕ್ಷ್ಮೀ ನಟಿಸುತ್ತಿದ್ದಾರೆ. ಅಂದಹಾಗೆ, ವಿಜಯಲಕ್ಷ್ಮೀ ಅವರಿಗೆ ಸಿಕ್ಕ ಪಾತ್ರ ಯಾವುದು ಗೊತ್ತಾ? ಅದು ತಾಯಿ ಪಾತ್ರ. ವಿನೋದ್‌ಪ್ರಭಾಕರ್‌ ಅವರ ತಾಯಿಯಾಗಿ ಇದೇ ಮೊದಲ ಸಲ ವಿಜಯಲಕ್ಷ್ಮೀ ಅವರು ಕಾಣಿಸಿಕೊಳ್ಳುತ್ತಿದ್ದಾರೆ.

ಈಗಾಗಲೇ ವಿಜಯಲಕ್ಷ್ಮೀ ಅವರ ಭಾಗದ ಚಿತ್ರೀಕರಣಕ್ಕೆ ಸಜ್ಜಾಗಿದ್ದು, ತಾಯಿ, ಮಗನ ಬಾಂಧವ್ಯದ ದೃಶ್ಯಗಳನ್ನು ಚಿತ್ರಿಸಲು ಚಿತ್ರತಂಡ ತಯಾರಿ ನಡೆಸಿದೆ. ವಿಜಯಲಕ್ಷ್ಮೀ ಅವರು ವಾಹಿನಿಯೊಂದರಲ್ಲಿ ತಮಗೆ ನಟಿಸಲು ಅವಕಾಶ ಸಿಗುತ್ತಿಲ್ಲ. ಇದರಿಂದಾಗಿ ಸಾಕಷ್ಟು ಸಮಸ್ಯೆಯಾಗಿದೆ ಎಂದು ತಮ್ಮ ನೋವು ಹಂಚಿಕೊಂಡಿದ್ದರಿಂದ ಒಂದಷ್ಟು ಚಿತ್ರಗಳಿಂದ ವಿಜಯಲಕ್ಷ್ಮೀ ಅವರಿಗೆ ಅವಕಾಶಗಳು ಹುಡುಕಿ ಬಂದವಾದರೂ, ಮೊದಲು ಅವಕಾಶ ಕೊಟ್ಟಿದ್ದು, “ಫೈಟರ್‌’ ಚಿತ್ರತಂಡ. ಒಂದು ದೊಡ್ಡ ಗ್ಯಾಪ್‌ ನಂತರ “ಫೈಟರ್‌’ ಮೂಲಕ ಹೊಸ ಇನ್ನಿಂಗ್ಸ್‌ ಶುರು ಮಾಡುತ್ತಿರುವ ವಿಜಯಲಕ್ಷ್ಮೀ ಇಲ್ಲಿ ವಿನೋದ್‌ ಪ್ರಭಾಕರ್‌ ಅವರ ತಾಯಿ ಮಾತ್ರವಲ್ಲ, ಅವರೊಬ್ಬ ದಕ್ಷ ಜಿಲ್ಲಾಧಿಕಾರಿಯಾಗಿ ನಟಿಸುತ್ತಿದ್ದಾರೆ. ನಿರ್ದೇಶಕ ನೂತನ್‌ ಉಮೇಶ್‌ ಅವರು ಆಗಸ್ಟ್‌ 6 ರಿಂದ ವಿಜಯಲಕ್ಷ್ಮೀ ಅವರ ಭಾಗದ ಚಿತ್ರೀಕರಣ ನಡೆಸಲು ರೆಡಿಯಾಗಿದ್ದಾರೆ.

“ಫೈಟರ್‌’ ಚಿತ್ರವನ್ನು ಸೋಮಶೇಖರ್‌ ನಿರ್ಮಿಸುತ್ತಿದ್ದಾರೆ. ಈ ಚಿತ್ರಕ್ಕೆ ಸುಜ್ಞಾನ್‌ಛಾಯಾಗ್ರಹಣವಿದೆ. ವಿನೋದ್‌ ಸಾಹಸ ನಿರ್ದೇಶನ ಮಾಡುತ್ತಿದ್ದಾರೆ. “ಫೈಟರ್‌’ ಚಿತ್ರದಲ್ಲಿ ಮೂರ್‍ನಾಲ್ಕು ಸಾಮಾಜಿಕ ವಿಷಯಗಳಿದ್ದು, ಅದಕ್ಕಾಗಿ ನಾಯಕ ಹೋರಾಡುವ ಅಂಶಗಳಿವೆ. ಬೆಂಗಳೂರು ಮತ್ತು ಉತ್ತರ ಕರ್ನಾಟಕದಲ್ಲಿ ಚಿತ್ರೀಕರಣ ನಡೆಯಲಿದೆ.