ಕಣ್ಣು ಕಾಣದ ಹೀರೋ “ಸಂಹಾರ’ ಮಾಡಿದಾಗ

Team Udayavani, Sep 27, 2017, 5:17 PM IST

ಚಿರಂಜೀವಿ ಸರ್ಜಾ ಅಭಿನಯದ “ಸಂಹಾರ’ ಕಳೆದ ಏಪ್ರಿಲ್‌ನಲ್ಲಿ ಪ್ರಾರಂಭವಾಗಿ ಈಗಾಗಲೇ ಮುಕ್ತಾಯವಾಗಿದೆ. ಸದ್ಯದಲ್ಲೇ ಚಿತ್ರದ ಹಾಡುಗಳು ಬಿಡುಗಡೆಯಾಗಲಿದ್ದು, ಇನ್ನೊಂದೆರೆಡು ತಿಂಗಳಲ್ಲಿ ಚಿತ್ರವೇ ಬಿಡುಗಡೆಯಾಗಲಿದೆ. ಆದರೆ, ಇದುವರೆಗೂ ಚಿತ್ರದ ಕಥೆಯೇನು ಮತ್ತು ಚಿತ್ರದಲ್ಲಿ ಚಿರು ಅವರ ಪಾತ್ರವೇನು ಎಂಬ ವಿಷಯಗಳನ್ನು ಚಿತ್ರತಂಡ ಬಿಟ್ಟುಕೊಟ್ಟಿರಲಿಲ್ಲ.

ಇದೀಗ ಬಂದಿರುವ ಸುದ್ದಿಯ ಪ್ರಕಾರ, ಈ ಚಿತ್ರದಲ್ಲಿ ಚಿರು ಅಂಧ ಯುವಕನಾಗಿ ಕಾಣಿಸಿಕೊಂಡಿದ್ದಾರಂತೆ. ಹೌದು, ಅದಕ್ಕೆ ಪೂರಕವಾಗಿ ಚಿತ್ರದ ಒಂದಿಷ್ಟು ಸ್ಟಿಲ್‌ಗ‌ಳು ಬಿಡುಗಡೆಯಾಗಿವೆ. ಈ ಸ್ಟಿಲ್‌ಗ‌ಳಲ್ಲಿ ಚಿರು ಮತ್ತು ಹರಿಪ್ರಿಯಾ ಕಾಣಿಸಿಕೊಂಡಿದ್ದು, ಆ ಸ್ಟಿಲ್‌ಗ‌ಳಲ್ಲಿ ಚಿರು ಅಂಧನ ಪಾತ್ರ ಮಾಡುತ್ತಿದ್ದಾರೆ ಎಂಬುದು ಸ್ಪಷ್ಟವಾಗುತ್ತದೆ.

ಅಂಧನೊಬ್ಬ ಯಾರನ್ನು ಮತ್ತು ಯಾಕೆ “ಸಂಹಾರ’ ಮಾಡುತ್ತಾನೆ ಎನ್ನುವುದೇ ಚಿತ್ರದ ಕಥೆ. ಇನ್ನು ಚಿಕ್ಕಣ್ಣ ಸಹ ಒಂದು ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಹಿಂದೆ ಚಿರು ಮತ್ತು ಚಿಕ್ಕಣ್ಣ ಅಭಿನಯದಲ್ಲಿ “ರುದ್ರ ತಾಂಡವ’ ಮಾಡಿದ್ದರು ಗುರು. ಈಗ ಅವರಿಬ್ಬರ ಜೊತೆಗೆ ಮತ್ತೆ ಕೆಲಸ ಮಾಡಿದ್ದಾರೆ ಚಿಕ್ಕಣ್ಣ.

ಈ ಚಿತ್ರದಲ್ಲಿ ಚಿರು ಮತ್ತು ಚಿಕ್ಕಣ್ಣರಷ್ಟೇ ಅಲ್ಲ, “ರುದ್ರ ತಾಂಡವ’ ಚಿತ್ರಕ್ಕೆ ಛಾಯಾಗ್ರಾಹಕರಾಗಿದ್ದ ಜಗದೀಶ್‌ ವಾಲಿ, ಸಂಕಲನಕಾರ ಕೆ.ಎಂ. ಪ್ರಕಾಶ್‌ ಇಲ್ಲೂ ಮುಂದುವರೆಯುತ್ತಿದ್ದಾರೆ. ಸಂಗೀತ ನಿರ್ದೇಶಕ ರವಿ ಬಸ್ರೂರು ಮಾತ್ರ ಹೊಸ ಸೇರ್ಪಡೆ. ಅಂದಹಾಗೆ, ಈ ಚಿತ್ರದಲ್ಲಿ ಚಿರುಗೆ ನಾಯಕಿಯರಾಗಿ ಹರಿಪ್ರಿಯ ಮತ್ತು ಕಾವ್ಯ ಶೆಟ್ಟಿ ಅಭಿನಯಿಸಿದ್ದಾರೆ. ಚಿತ್ರವನ್ನು ವೆಂಕಟೇಶ್‌ ಮತ್ತು ಸುಂದರ್‌ ಕಾಮರಾಜ್‌ ನಿರ್ಮಿಸಿದ್ದಾರೆ.