ಶಾರುಖ್‌- ಕಾಜಲ್‌ ನಟನೆಯ ಸೂಪರ್‌ಹಿಟ್‌ ಚಿತ್ರಕ್ಕೆ 25; ಟ್ರೆಂಡ್‌ ಆದ ಡಿಡಿಎಲ್‌ಜೆ

Team Udayavani, Oct 21, 2020, 12:37 AM IST

ಮುಂಬೈ: ಪರಿಶುದ್ಧ ಪ್ರೇಮಕಥೆಯೊಂದಿಗೆ ಸಿನಿ ಜಗತ್ತಿನ ಮನಗೆದ್ದ “ದಿಲ್‌ವಾಲೆ ದುಲ್ಹ ನಿಯಾ ಲೇ ಜಾಯೇಂಗೆ’ (ಡಿಡಿಎಲ್‌ಜೆ) ಹಿಂದಿ ಚಿತ್ರಕ್ಕೆ ಈಗ ಭರ್ತಿ 25 ವರ್ಷ. ಬಾಲಿವುಡ್‌ ಸ್ಟಾರ್‌ ಶಾರುಖ್‌ ಖಾನ್‌ ಮತ್ತು ಕಾಜಲ್‌ ನಟನೆಯ ಚಿತ್ರದ ರಜತ ಮಹೋತ್ಸವವನ್ನು ಸಾಮಾಜಿಕ ಜಾಲತಾಣ ಸೋಮವಾರ ಅದ್ಧೂರಿಯಾಗಿ ಆಚರಿಸಿಕೊಂಡಿದೆ.

ಈ ಬಗ್ಗೆ ಟ್ವೀಟಿಸಿರುವ ನಟಿ ಕಾಜಲ್‌, “ಡಿಡಿಎಲ್‌ಜೆ ಸರ್ವ ಕಾಲಕ್ಕೂ ಸಲ್ಲುವಂಥ ಚಿತ್ರ’ ಎಂದು ಬಣ್ಣಿಸಿದ್ದಾರೆ. “ಈಗಲೂ ಚಿತ್ರ ನೋಡಿದ ಪ್ರತಿಯೊಬ್ಬರೂ ತಮ್ಮನ್ನು ಸಿಮ್ರಾನ್‌ ಮತ್ತು ರಾಜ್‌ ಪಾತ್ರರೊಂದಿಗೆ ಗುರುತಿಸಿ ಕೊಳ್ಳಲು ಇಚ್ಛಿಸುತ್ತಾರೆ. ಶೂಟಿಂಗ್‌ ವೇಳೆ ಚಿತ್ರತಂಡ ಇದೊಂದು ತಣ್ಣನೆಯ ಚಿತ್ರವಾಗು ತ್ತದೆ ಎಂದೇ ಅಂದುಕೊಂಡಿತ್ತು. ಆದರೆ ಚಿತ್ರ ಕ್ರಮೇಣ ಪಾಪ್‌ ಸಂಸ್ಕೃತಿ ಮೇಲೆ ಇಷ್ಟೊಂದು ಅದ್ಭುತ ಪರಿಣಾಮ ಬೀರುತ್ತದೆ ಯಾರೂ ನಿರೀಕ್ಷಿಸಿ ರಲಿಲ್ಲ’ ಎಂದು ಅಚ್ಚರಿ ವ್ಯಕ್ತಪಡಿಸಿದ್ದಾರೆ.

ಶಾರುಖ್‌ ಹರ್ಷ: “25 ವರ್ಷಗಳು! ರಾಜ್‌ ಮತ್ತು ಸಿಮ್ರಾನ್‌ರನ್ನು ನೀವು ತುಂಬುಹೃದಯ ದಿಂದ ಪ್ರೀತಿಸಿದ್ದಕ್ಕಾಗಿ ನಿಮಗೆ ಕೃತಜ್ಞತೆಗಳು. ನಿಮ್ಮ ಪ್ರೀತಿ ನಮ್ಮ ಪಾಲಿಗೆ ಸದಾ ವಿಶೇಷ’ ಎಂದು ಟ್ವೀಟಿಸಿದ್ದಾರೆ. ಸಹಸ್ರಾರು ಅಭಿಮಾನಿಗಳು ಚಿತ್ರವನ್ನು ನೆನಪಿಸಿಕೊಂಡು ಟ್ವೀಟ್‌ ಮಾಡಿದ್ದಾರೆ.

ಈಗಲೂ ಶೋ: ರಾಜ್‌ ಮತ್ತು ಸಿಮ್ರಾನ್‌ ಎಂಬ ಇಬ್ಬರು ಎನ್‌ಆರ್‌ಐ ಯುವಜೋಡಿ ಯುರೋಪ್‌ ಪ್ರವಾಸದಲ್ಲಿದ್ದಾಗ, ಪರಸ್ಪರ ಪ್ರೀತಿ ಸುವ ಕಥೆ ಚಿತ್ರದ್ದು. ಯಶ್‌ ಚೋಪ್ರಾ ನಿರ್ಮಾಣ, ಆದಿತ್ಯ ಚೋಪ್ರಾ ಚೊಚ್ಚಲ ನಿರ್ದೇಶನದ ಡಿಡಿಎಲ್‌ಜೆ 25 ವರ್ಷಗಳ ಬಳಿಕ ಈಗಲೂ ಮುಂಬೈನ “ಮರಾಠಾ’ ಚಿತ್ರ ಮಂದಿರದಲ್ಲಿ ಮಾರ್ನಿಂಗ್‌ ಶೋನಲ್ಲಿ ಪ್ರದರ್ಶನ ಕಾಣುತ್ತಿದೆ.