ಡ್ರಗ್ಸ್ ಪ್ರಕರಣದಡಿ ಕಿರುತೆರೆ ನಟನ ಬಂಧನ

Team Udayavani, Aug 28, 2021, 2:30 PM IST

ಮುಂಬೈ : ತೀವ್ರ ಸಂಚಲನ ಮೂಡಿಸಿದ್ದ ಬಾಲಿವುಡ್ ಡ್ರಗ್ಸ್ ಪ್ರಕರಣದಡಿ ಇದೀಗ ಮತ್ತೊಬ್ಬ ಕಿರುತೆರೆಯ ನಟನ ಬಂಧನವಾಗಿದೆ. ಹಿಂದಿ ಕಿರುತೆರೆಯ ನಟ ಗೌರವ್ ದೀಕ್ಷಿತ್‍ನನ್ನು ಎನ್‌ಸಿಬಿ ಬಂಧಿಸಿ, ಆತನ ಮನೆಯಲ್ಲಿದ್ದ ಅಪಾರ ಪ್ರಮಾಣದ ಮಾದಕ ದ್ರವ್ಯಗಳನ್ನು ವಶಕ್ಕೆ ಪಡೆದಿವೆ.

ಬಾಲಿವುಡ್ ಡ್ರಗ್ಸ್ ಪ್ರಕರಣದ ವಿಚಾರಣೆ ವೇಳೆ ಈಗಾಗಲೇ ಬಂಧನದಲ್ಲಿರುವ ನಟ ಅಜಾಜ್ ಖಾನ್, ನಟ ಗೌರವ್ ದೀಕ್ಷಿತ್ ಹೆಸರನ್ನು ಬಾಯ್ಬಿಟ್ಟಿದ್ದ. ಈ ಹಿನ್ನೆಲೆ ಈತನ ಮೇಲೆ ನಾರ್ಕೋಟಿಕ್ಸ್ ಕಂಟ್ರೋಲ್ ಬ್ಯೂರೋ ಕಣ್ಣಿಟ್ಟಿತ್ತು. ಖಚಿತ ಮಾಹಿತಿಯ ಮೇರೆಗೆ ಕಳೆದ ಏಪ್ರಿಲ್ ತಿಂಗಳಿನಲ್ಲಿ ಈತನ ಮನೆ ಮೇಲೆ ದಾಳಿ ನಡೆಸಿತು. ಈ ವೇಳೆ ಅಪಾರ ಪ್ರಮಾಣದ ಮಾದಕ ದ್ರವ್ಯಗಳಾದ ಎಂಡಿ ಮತ್ತು ಚರಸ್ ಪತ್ತೆಯಾಗಿತ್ತು. ಆ ಸಮಯದಲ್ಲಿ ಗೌರವ್ ದೀಕ್ಷಿತ್ ಮನೆಯಲ್ಲಿರಲಿಲ್ಲ.

ಲೋಖಂಡ್‌ವಾಲಾದಲ್ಲಿರುವ ತಮ್ಮ ನಿವಾಸದ ಮೇಲೆ ಪೊಲೀಸರು ದಾಳಿ ನಡೆಸಿದ್ದಾರೆ ಎಂದು ತಿಳಿಯುತ್ತಿದ್ದಂತೆಯೇ, ಗೌರವ್ ನಾಪತ್ತೆಯಾಗಿದ್ದ. ಅಂದಿನಿಂದ ಈತನಿಗಾಗಿ ಹುಡುಕಾಟ ನಡೆದಿತ್ತು. ಇದೀಗ ಸಿಕ್ಕಿಬಿದ್ದಿದ್ದಾನೆ.

ಇನ್ನು ಟಾಲಿವುಡ್‌ನಲ್ಲಿಯೂ ಕೇಳಿ ಬಂದಿದ್ದ ಡ್ರಗ್ಸ್ ಮಾಫಿಯಾ ಕುರಿತಾದ ತನಿಖೆ ನಡೆಯುತ್ತಿದ್ದು , ಖ್ಯಾತ ನಟಿ ರಕುಲ್ ಪ್ರೀತ್ ಸಿಂಗ್, ನಟ ರಾಣಾ ದಗ್ಗುಬಾಟಿ, ನಟ ರವಿತೇಜಾ, ನಟಿ ಚಾರ್ಮಿ ಕೌರ್, ನವದೀಪ್, ಮುಮೈತ್ ಖಾನ್, ತನೀಶ್ ನಂದು, ತರುಣ್, ನಿರ್ದೇಶಕ ಪುರಿ ಜಗನ್ನಾಥ್ ಸೇರಿದಂತೆ ಒಟ್ಟು 12 ಮಂದಿಗೆ ಜಾರಿ ನಿರ್ದೇಶನಾಲಯ ನೋಟೀಸ್ ಜಾರಿ ಮಾಡಿದೆ. ಆಗಸ್ಟ್ 31ರಂದು ನಿರ್ದೇಶಕ ಪುರಿ ಜಗನ್ನಾಥ್, ಸೆಪ್ಟೆಂಬರ್ 6ರಂದು ರಕುಲ್ ಪ್ರೀತ್ ಸಿಂಗ್, ಸೆಪ್ಟೆಂಬರ್ 8ರಂದು ರಾಣಾ ದಗ್ಗೂಬಾಟಿ, ಸೆಪ್ಟೆಂಬರ್ 9ರಂದು ರವಿತೇಜಾ ವಿಚಾರಣೆಗೆ ಹಾಜರ್ ಆಗುವಂತೆ ಜಾರಿ ನಿರ್ದೇಶನಾಲಯ ಸೂಚಿಸಿದೆ.