ಖೂಬ್ಸೂರತ್, ಕಾಮಸೂತ್ರ ಸಿನಿಮಾ ನಟ ರಂಜಿತ್ ಚೌಧರಿ ವಿಧಿವಶ

Team Udayavani, Apr 16, 2020, 3:21 PM IST

Actor Ranjit Chowdhry

ಮುಂಬೈ:ಬಾಲಿವುಡ್, ರಂಗಭೂಮಿ ನಟ, ಖೂಬ್ಸೂರತ್, ಕಾಮಸೂತ್ರ, ಫೈರ್, ಕಿಂಗ್ ಆಫ್ ದ ಜಂಗಲ್, ಗರ್ಲ್ 6, ಖಟ್ಟಾ ಮೀಠಾದಂತಹ ಸಿನಿಮಾದ ಮೂಲಕ ಗುರುತಿಸಿಕೊಂಡಿದ್ದ ರಂಜಿತ್ ಚೌಧರಿ(65ವರ್ಷ) ಏಪ್ರಿಲ್ 15ರಂದು ನಿಧನರಾಗಿರುವುದಾಗಿ ಸಹೋದರಿ ಸಾಮಾಜಿಕ ಜಾಲತಾಣದಲ್ಲಿ ಮಾಹಿತಿಯನ್ನು ಹಂಚಿಕೊಂಡಿದ್ದಾರೆ.

ರಂಜಿತ್ ಚೌಧರಿ ಅವರು ಅನಾರೋಗ್ಯದಿಂದ ಸಾವನ್ನಪ್ಪಿರುವುದಾಗಿ ಸಹೋದರಿ ರೈಯೆಲ್ ಪದಮ್ಸೀ ಅವರು ಕಪ್ಪುಬಿಳುಪಿನ ಚಿತ್ರವನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಶೇರ್ ಮಾಡಿಕೊಳ್ಳುವ ಮೂಲಕ ತಿಳಿಸಿದ್ದಾರೆ. ಇಂದು ಮುಂಬೈನಲ್ಲಿ ಅಂತ್ಯಕ್ರಿಯೆ ನೆರವೇರಲಿದೆ ಎಂದು ತಿಳಿಸಿದ್ದಾರೆ.

ನಟ ರಂಜಿತ್ ಅವರು ಖ್ಯಾತ ರಂಗಭೂಮಿ ನಟಿ ಪರ್ಲ್ ಪದಮ್ಸೀ ಅವರ ಪುತ್ರ. ರಂಜಿತ್ ಅವರ ಮಲ ತಂದೆ ಅಲೈಕ್ಯು ಪದಮ್ಸಿ ಕೂಡಾ ರಂಗಭೂಮಿ ಹೆಸರಾಂತ ನಟ ಹಾಗೂ ಜಾಹೀರಾತು ಜಗತ್ತಿನ ಜನಪ್ರಿಯ ವ್ಯಕ್ತಿಯಾಗಿದ್ದರು.

ರಂಜಿತ್ ಕುಮಾರ್ 2011ರಲ್ಲಿ ಬಿಡುಗಡೆಯಾಗಿದ್ದ ಬ್ರೇಕ್ ವೇ ಎಂಬ ಸಿನಿಮಾದಲ್ಲಿ ನಟಿಸಿದ್ದು ಕೊನೆಯದ್ದಾಗಿದೆ. ಬಾಲಿವುಡ್ ನ ಚಕ್ರಾ, ಕಾಲಿಯಾ, ಬ್ಯಾಂಡಿಟ್ ಕ್ವೀನ್ ಸೇರಿದಂತೆ 80, 90 ಸಿನಿಮಾಗಳಲ್ಲಿ ನಟಿಸಿದ್ದರು.