ಉತ್ತರಾಖಂಡ ದುರಂತದಲ್ಲಿ ತಂದೆ ಕಳೆದುಕೊಂಡ 4 ಮಕ್ಕಳ ದತ್ತು ಪಡೆದ ನಟ ಸೋನು !  

Team Udayavani, Feb 24, 2021, 5:04 PM IST

ಉತ್ತರಾಖಂಡ : ನೀರ್ಗಲ್ಲು ಸ್ಫೋಟ ದುರಂತದಲ್ಲಿ ತಂದೆಯನ್ನು ಕಳೆದುಕೊಂಡು ಅನಾಥರಾಗಿದ್ದ 4 ಹೆಣ್ಣು ಮಕ್ಕಳನ್ನು ಚಿತ್ರನಟ ಸೋನು ಸೂದ್ ದತ್ತು ಪಡೆದಿದ್ದಾರೆ.

ಫೆ.7 ರಂದು ಉತ್ತರಾಖಂಡ್ ನ ಚಮೋಲಿ ಜಿಲ್ಲೆಯಲ್ಲಿ ನೀರ್ಗಲ್ಲು ಸ್ಫೋಟ ದುರಂತದಲ್ಲಿ ಸಾಕಷ್ಟು ಜನ ಪ್ರಾಣಹಾನಿಯಾಗಿತ್ತು. ನೂರಾರು ಜನ ಕಣ್ಮರೆಯಾಗಿದ್ದರು. ಒಂದಿಷ್ಟು ಜನರ ಮೃತ ದೇಹ ಪತ್ತೆಯಾಗಿದ್ದವು.

ಪ್ರವಾಹದ ಹೊಡೆತಕ್ಕೆ ತಪೋವನದಲ್ಲಿ ನಡೆಯುತ್ತಿದ್ದ ಜಲವಿದ್ಯುತ್ ಯೋಜನೆಯ ಕಾಮಾಗಾರಿಯಲ್ಲಿ ತೊಡಗಿದ್ದ ಅಲಾಮ್ ಸಿಂಗ್ ಬಂದೀರ್ ಕೊಚ್ಚಿಕೊಂಡು ಹೋಗಿದ್ದರು. ರಕ್ಷಣಾ ಕಾರ್ಯದ ವೇಳೆ ಅವರ ಮೃತ ದೇಹ ಪತ್ತೆಯಾಗಿತ್ತು. ಮನೆಯ ಆಧಾರ ಸ್ಥಂಬ ಕುಸಿದಿದ್ದರಿಂದ ಆತನ ಕುಟುಂಬ ಅಕ್ಷರಶಃ ಬೀದಿಗೆ ಬಂದಿತ್ತು. ನಾಲ್ಕು ಹೆಣ್ಣು ಮಕ್ಕಳನ್ನು ಕಟ್ಟಿಕೊಂಡು ಮೃತನ ಪತ್ನಿ ದಿಕ್ಕುತೋಚದಂತಾಗಿದ್ದರು. ಇವರ ಕಷ್ಟಕ್ಕೆ ನೆರವಾಗುವಂತೆ ಸೋಷಿಯಲ್ ಮೀಡಿಯಾಗಳು ನಟ ಸೋನು ಸೂದ್ ಅವರಿಗೆ ಮನವಿ ಮಾಡಿದ್ದವು.

ಸಂಕಷ್ಟದಲ್ಲಿರುವ ಅಲಾಮ್ ಕುಟುಂಬಕ್ಕೆ ಸಹಾಯ ಹಸ್ತ ಚಾಚಿರುವ ಸೋನು, ಆ ಹೆಣ್ಣು ಮಕ್ಕಳ ಶಿಕ್ಷಣ ಹಾಗೂ ಮದುವೆ ಮಾಡಿಸುವ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ. ಈ ಮಕ್ಕಳಿಗೆ ಉತ್ತಮ ಶಿಕ್ಷಣ ಕೊಡಿಸುವುದು ಹಾಗೂ ಅವರ ಕಲ್ಯಾಣ ನನ್ನ ಕರ್ತವ್ಯ ಎಂದು ಭರವಸೆ ನೀಡಿದ್ದಾರೆ.