ಮುಂಬೈ: ವಿವಾಹವಾಗಲು ನಕಾರ, ರಸ್ತೆ ಮಧ್ಯೆಯೇ ನಟಿಗೆ ಚೂರಿ ಇರಿದು ಪರಾರಿ!

Team Udayavani, Oct 27, 2020, 6:15 PM IST

ಮುಂಬೈ: ಸಾಮಾಜಿಕ ಜಾಲತಾಣ ಫೇಸ್ ಬುಕ್ ನಲ್ಲಿ ಸ್ನೇಹಿತನಾದ ವ್ಯಕ್ತಿಯ ಮದುವೆ ಪ್ರಸ್ತಾಪವನ್ನು ತಿರಸ್ಕರಿಸಿದ್ದಕ್ಕೆ ಆಕ್ರೋಶಗೊಂಡು ನಟಿ ಮಾಲ್ವಿ ಮಲೋತ್ರಾಗೆ ಯುವಕ ರಸ್ತೆಯಲ್ಲಿಯೇ ಚೂರಿಯಿಂದ ಇರಿದ ಘಟನೆ ಕಳೆದ ರಾತ್ರಿ(ಅಕ್ಟೋಬರ್ 26, 2020) ನಡೆದಿರುವುದಾಗಿ ವರದಿ ತಿಳಿಸಿದೆ.

ವಿಶಾಲ್ ಮಿಶ್ರಾ ನಿರ್ದೇಶನದ ಹೋಟೆಲ್ ಮಿಲನ್ ಹಿಂದಿ ಸಿನಿಮಾದಲ್ಲಿ ನಟಿಸಿದ್ದ ಮಾಲ್ವಿ, ಟಿವಿ ಶೋಗಳಲ್ಲಿ ಕಾರ್ಯನಿರ್ವಹಿಸುತ್ತಿದ್ದಳು. ಸೋಮವಾರ ರಾತ್ರಿ ವೆರ್ಸೋವಾದ ಫಿಶರೀಶ್ ಯೂನಿರ್ವಸಿಟಿ ರಸ್ತೆಯಲ್ಲಿ ಈ ಘಟನೆ ನಡೆದಿದೆ.

ನಟಿಯ ಹೊಟ್ಟೆ ಹಾಗೂ ಎರಡು ಕೈಗಳಿಗೆ ಸೇರಿ ಮೂರು ಬಾರಿ ಚೂರಿಯಿಂದ ಇರಿದು ತನ್ನ ಆಡಿ ಕಾರಿನಲ್ಲಿ ಪರಾರಿಯಾಗಿದ್ದ. ಈತನನ್ನು ಕುಮಾರ್ ಮಹಿಪಾಲ್ ಸಿಂಗ್ ಎಂದು ಗುರುತಿಸಲಾಗಿದೆ. ಆರೋಪಿಯನ್ನು ಇನ್ನಷ್ಟೇ ಬಂಧಿಸಬೇಕಾಗಿದೆ. ನಟಿ ಮಾಲ್ವಿಯನ್ನು ಕೂಡಲೇ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಪ್ರಾಣಾಪಾಯದಿಂದ ಪಾರಾಗಿರುವುದಾಗಿ ವೈದ್ಯರು ತಿಳಿಸಿದ್ದಾರೆ.

2019ರಲ್ಲಿ ಮಾಲ್ವಿಯ ಫೇಸ್ ಬುಕ್ ಫ್ರೆಂಡ್ ಆದ ನಂತರ ಮಹಿಪಾಲ್, ತಾನು ಮುಂದೆ ಸಿನಿಮಾ ನಿರ್ಮಾಪಕ ಆಗಬೇಕು ಎಂದು ಹೇಳುತ್ತಿದ್ದ. ಅಲ್ಲದೇ ಮಾಲ್ವಿಯನ್ನು ಈತ ಕೆಲವು ಬಾರಿ ಭೇಟಿಯಾಗಿದ್ದ ಎಂದು ವರದಿ ತಿಳಿಸಿದೆ.

ಮಾಲ್ವಿ ನೀಡಿದ ದೂರಿನ ಪ್ರಕಾರ, ಮಾಲ್ವಿ ಜತೆ ಸಂಬಂಧ ಹೊಂದುವ ಬಯಕೆ ವ್ಯಕ್ತಪಡಿಸಿದ್ದು, ತಾನು ವಿವಾಹವಾಗುವುದಾಗಿಯೂ ಪೀಡಿಸುತ್ತಿದ್ದ ಎಂದು ತಿಳಿಸಿದೆ. ಆದರೆ ಆತನ ಪ್ರಸ್ತಾಪವನ್ನು ಮಾಲ್ವಿ ತಿರಸ್ಕರಿಸಿದ್ದು, ಆತನ ಜತೆಗಿನ ಎಲ್ಲಾ ಸಂವಹನ, ಮಾತುಕತೆಯನ್ನು ನಿಲ್ಲಿಸಿಬಿಟ್ಟಿದ್ದು, ಇದರಿಂದ ಆಕೆಯ ವಿರುದ್ಧ ಸೇಡು ತೀರಿಸಿಕೊಳ್ಳಲು ಮಹಿಪಾಲ್ ನಿರ್ಧರಿಸಿದ್ದ ಎಂದು ವರದಿ ವಿವರಿಸಿದೆ.

ಆರೋಪಿ ಮಹಿಪಾಲ್ ವಿರುದ್ಧ ಕೊಲೆ ಯತ್ನ ಹಾಗೂ ಕಿರುಕುಳ ಪ್ರಕರಣವನ್ನು ದಾಖಲಿಸಿಕೊಂಡಿದ್ದು, ಆರೋಪಿಯನ್ನು ಬಂಧಿಸುವ ಪ್ರಕ್ರಿಯೆಯಲ್ಲಿ ತೊಡಗಿರುವುದಾಗಿ ಮುಂಬೈ ಪೊಲೀಸ್ ವಕ್ತಾರ ಎಸ್.ಚೈತನ್ಯಾ ತಿಳಿಸಿದ್ದಾರೆ.