ಕಣ್ಣೀರಿಟ್ಟ ಐಶ್..ಇದು ಪ್ರೀಮಿಯರ್ ಶೋ ಅಲ್ಲ,ಫೋಟೋಗ್ರಾಫರ್ ಗಳಿಗೆ ಮನವಿ

Team Udayavani, Nov 21, 2017, 4:57 PM IST

ಮುಂಬೈ: ಹಾಲಿವುಡ್, ಸ್ಯಾಂಡಲ್ ವುಡ್ ಹೀಗೆ ಸಿನಿಮಾ ನಟ, ನಟಿಯರನ್ನು ಅಭಿಮಾನಿಗಳು, ಪತ್ರಕರ್ತರು, ಫೋಟೋಗ್ರಾಫರ್ ಗಳು ಬೆನ್ನತ್ತಿ ಹೋಗೋದು ಸಾಮಾನ್ಯ. ಅದೇ ನಿಟ್ಟಿನಲ್ಲಿ ಬಾಲಿವುಡ್ ತಾರೆ, ಮಾಜಿ ವಿಶ್ವಸುಂದರಿ ಐಶ್ವರ್ಯ ರೈ ಬಚ್ಚನ್ ಅವರನ್ನು ಪಾಪರಾಝಿಗಳು (ಖಾಸಗಿ ಫೋಟೋಗ್ರಾಫರ್ ಗಳು; ಇವರು ಗಣ್ಯಾತಿಗಣ್ಯರ ಫೋಟೋ ಸೆರೆಹಿಡಿಯುವವರು ಎಂದರ್ಥ) ಫೋಟೋ ಕ್ಲಿಕ್ಕಿಸಿದ್ದಕ್ಕೆ ಕಣ್ಣೀರಿಟ್ಟ ಘಟನೆ ನಡೆದಿದೆ.

ಸೋಮವಾರ ನಟಿ ಐಶ್ವರ್ಯ ರೈ, ಮಗಳು ಆರಾಧ್ಯ ಹಾಗೂ ತಾಯಿ ಬೃಂದಾ ರೈ ಜತೆ  ಸ್ಮೈಲ್ ಟ್ರೈನ್ ಫೌಂಡೇಶನ್ ಗೆ ಆಗಮಿಸಿದ್ದರು. ಅದಕ್ಕೆ ಕಾರಣ ತಂದೆ ದಿವಂಗತ ಕೃಷ್ಣರಾಜ್ ರೈ ಅವರ ಹುಟ್ಟುಹಬ್ಬದ ವಾರ್ಷಿಕ ಆಚರಣೆಗಾಗಿ ಆಗಮಿಸಿದ್ದರು.

ತಂದೆಯ ಹುಟ್ಟುಹಬ್ಬದ ಅಂಗವಾಗಿ ಸೀಳು ತುಟಿ ಸಮಸ್ಯೆ ಎದುರಿಸುತ್ತಿರುವ 100 ಮಕ್ಕಳ ಚಿಕಿತ್ಸೆ ವೆಚ್ಚವನ್ನು ಭರಿಸಲು ನೀಲಿ ಕಂಗಳ ಚೆಲುವೆ ನಿರ್ಧರಿಸಿದ್ದರು. ಜತೆಗೆ ತಂದೆಯ ಹುಟ್ಟುಹಬ್ಬವನ್ನು ಸೀಳು ತುಟಿ ಮಕ್ಕಳ ಜತೆ ಆಚರಿಸುವ ಇರಾದೆ ಐಶ್ ಅವರದ್ದಾಗಿತ್ತು. ಆದರೆ ಐಶ್ವರ್ಯ ರೈ ಆಗಮಿಸುತ್ತಿದ್ದಂತೆಯೇ ಛಾಯಾಗ್ರಹಕರು ಎಡೆಬಿಡದೆ ಫೋಟೋ ತೆಗೆಯಲು ಆರಂಭಿಸಿದಾಗ, ಕಣ್ಣೀರಿಟ್ಟ ಐಶ್ವರ್ಯ…ದಯವಿಟ್ಟು ಫೋಟೋ ಕ್ಲಿಕ್ಕಿಸಬೇಡಿ. ಫೋಟೋ ಕ್ಲಿಕ್ಕಿಸುವುದನ್ನು ನಿಲ್ಲಿಸಿ. ಸ್ವಲ್ಪ ಗೌರವ ಕೊಡುವುದನ್ನು ಕಲಿತುಕೊಳ್ಳಿ, ಇದು ಸಾರ್ವಜನಿಕ ಕಾರ್ಯಕ್ರಮವಲ್ಲ. ಇದೊಂದು ಚಾರಿಟಿ ಕಾರ್ಯಕ್ರಮ, ಇಲ್ಲಿ ಯಾವುದೇ ಪ್ರೀಮಿಯರ್ ನಡೆಯುತ್ತಿಲ್ಲ, ದಯವಿಟ್ಟು ಅರ್ಥ ಮಾಡಿಕೊಳ್ಳಿ ಎಂದು ಮನವಿ ಮಾಡಿಕೊಂಡರು ಎಂದು ವರದಿ ತಿಳಿಸಿದೆ.