Lal Salaam ಟೀಸರ್‌ನಲ್ಲಿ ಮಿಂಚಿದ ರಜಿನಿ; ʼಮೊಯ್ದೀನ್ ಭಾಯಿʼ ಲುಕ್ಸ್ ಗೆ ಫ್ಯಾನ್ಸ್‌ ಫಿದಾ

Team Udayavani, Nov 12, 2023, 3:21 PM IST

ಚೆನ್ನೈ: ಕಾಲಿವುಡ್‌ ಸಿನಿರಂಗದ ಪ್ರೇಕ್ಷಕರಿಗೆ ದೀಪಾವಳಿ ಹಬ್ಬಕ್ಕೆ ಸೂಪರ್‌ ಸ್ಟಾರ್‌ ರಜಿನಿಕಾಂತ್‌ ಅವರ ʼಲಾಲ್‌ ಸಲಾಂʼ ಚಿತ್ರದ ಟೀಸರ್‌ ಗಿಫ್ಟ್‌ ಆಗಿ ಸಿಕ್ಕಿದೆ.

ವಿಷ್ಣು ವಿಶಾಲ್ ಮತ್ತು ವಿಕ್ರಾಂತ್ ಪ್ರಧಾನ ಪಾತ್ರದಲ್ಲಿ ನಟಿಸುತ್ತಿರುವ ʼಲಾಲ್‌ ಸಲಾಂʼ ನಲ್ಲಿ ʼತಲೈವಾʼ ವಿಶೇಷ ಪಾತ್ರವೊಂದರಲ್ಲಿ ಕಾಣಿಸಿಕೊಂಡಿದ್ದಾರೆ. ಐಶ್ವರ್ಯಾ ರಜಿನಿಕಾಂತ್ ನಿರ್ದೇಶನದ ʼಲಾಲ್‌ ಸಲಾಂʼ ಈಗಾಗಲೇ ಪೋಸ್ಟರ್‌ ಗಳಿಂದ ಗಮನ ಸೆಳೆದಿದೆ. ಇದೀಗ ಟೀಸರ್‌ ರಿಲೀಸ್‌ ಮಾಡಿ ಪ್ರೇಕ್ಷಕರಿಗೆ ದೀಪಾವಳಿ ಹಬ್ಬಕ್ಕೆ ಕೊಡುಗೆ ನೀಡಿದೆ.

ಗಲಾಟೆಯೊಂದು ನಡೆದಿರುವ ದೃಶ್ಯವನ್ನು ತೋರಿಸಲಾಗಿದೆ. ಎರಡು ಪಾತ್ರದ ರೋಷದ ನೋಟವನ್ನು ತೋರಿಸಿದ್ದು, ಕ್ರಿಕೆಟ್‌ ಆಡುವ ತಂಡವನ್ನು ತೋರಿಸಲಾಗಿದೆ. ಕ್ರಿಕೆಟ್‌ ಹಾಗೂ ಇಬ್ಬರ ನಡುವೆ ನಡೆಯುವ ಸಮರದ ಕಥೆಯಲ್ಲಿ ಕುಟುಂಬ ಹಾಗೂ ರಾಜಕೀಯ ಸ್ಥಿತಿ ಟೀಸರ್‌ ಝಲಕ್‌ ನಲ್ಲಿದೆ.

ಟೀಸರ್‌ ನಲ್ಲಿ ಗಮನ ಸೆಳೆಯುವ ಮತ್ತೊಂದು ಅಂಶವೆಂದರೆ ʼ ಮೊಯ್ದೀನ್ ಭಾಯಿʼ ಆಗಿ ಕಾಣಿಸಿಕೊಂಡಿರುವ ರಜಿನಿಕಾಂತ್‌ ಫೈಟ್‌ ಸೀನ್‌ ಗಳು. ಮನೆಯ ಹಿರಿಯವನಾಗಿ ಇಲ್ಲಿ ʼತಲೈವಾʼ ಕಾಣಿಸಿಕೊಂಡಿದ್ದಾರೆ.

ʼಲಾಲ್‌ ಸಲಾಂʼ ಐಶ್ವರ್ಯಾ ನಿರ್ದೇಶನದ ಮೂರನೇ ಸಿನಿಮಾ. ಈ ಹಿಂದೆ ಅವರು ʼ3ʼ(2011), ʼ ವೈ ರಾಜಾ ವೈʼ(2015) ಸಿನಿಮಾವನ್ನು ಮಾಡಿದ್ದರು. ʼಲಾಲ್‌ ಸಲಾಂʼ ಸಿನಿಮಾದಲ್ಲಿ ವಿಷ್ಣು ವಿಶಾಲ್,ವಿಕ್ರಾಂತ್ ಪ್ರಧಾನ ಪಾತ್ರದಲ್ಲಿ ಕಾಣಿಸಿಕೊಳ್ಳಲ್ಲಿದ್ದು, ರಜಿನಿಕಾಂತ್‌ ಹಾಗೂ ಕಪಿಲ್‌ ದೇವ್‌ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

2024 ರ ಸಂಕ್ರಾಂತಿ ಹಬ್ಬಕ್ಕೆ ಸಿನಿಮಾ ರಿಲೀಸ್‌ ಆಗಲಿದೆ. ಇದೇ ಸಮಯದಲ್ಲಿ ಧನುಷ್‌ ಅವರ ʼಕ್ಯಾಪ್ಟನ್‌ ಮಿಲ್ಲರ್‌ʼ ಸಿನಿಮಾ ಕೂಡ ರಿಲೀಸ್‌ ಆಗಲಿದೆ.