ಪ್ರೇಕ್ಷಕರ ಮನಗೆದ್ದ ಆಯುಷ್ಮಾನ್ ನಟನೆಯ “ಆರ್ಟಿಕಲ್ 15” ಬಾಲಿವುಡ್ ಸಿನಿಮಾ

Team Udayavani, Jun 27, 2019, 4:47 PM IST

ಮುಂಬೈ: ಆಯುಷ್ಮಾನ್ ಖುರ್ರಾನಾ ಮತ್ತು ಸಯಾನಿ ಗುಪ್ತಾ ನಟನೆಯ ಆರ್ಟಿಕಲ್ 15 ಬಾಲಿವುಡ್ ಸಿನಿಮಾ ಬಿಡುಗಡೆಗೊಂಡ ಮೊದಲ ದಿನವೇ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿದೆ.

ಅನುಭವ್ ಸಿನ್ನಾ ನಿರ್ದೇಶನದ ಆರ್ಟಿಕಲ್ 15 ಸಿನಿಮಾ ಉತ್ತರಪ್ರದೇಶದಲ್ಲಿ ನಡೆದ ಜಾತಿ ಮತ್ತು ಲಿಂಗತಾರತಮ್ಯದ ಕರಾಳ ಮುಖದ ಕಥಾಹಂದರವನ್ನು ಹೊಂದಿದೆ. ಹಲವಾರು ಕುತೂಹಲಕಾರಿ ಅಂಶಗಳನ್ನು ಬಯಲುಗೊಳಿಸುವ ಆರ್ಟಿಕಲ್ 15 ಪ್ರೇಕ್ಷಕರ ಹುಬ್ಬೇರಿಸುವಂತೆ ಮಾಡುವಲ್ಲಿ ಸಫಲವಾಗಿದೆ ಎಂದು ಸಿನಿ ವಿಶ್ಲೇಷಣಾ ವರದಿ ತಿಳಿಸಿದೆ.

ತೀವ್ರವಾದ ಪ್ರತಿಪಾದಿಸುವ ಸಿನಿಮಾ ಇದಾಗಿದ್ದು, ಆಯುಷ್ಮಾನ್ ಖುರ್ರಾನಾ ಪೊಲೀಸ್ ಅಧಿಕಾರಿಯಾಗಿ ಪ್ರೇಕ್ಷಕರ ಗಮನಸೆಳೆದಿದ್ದಾರೆ. ತನಿಖಾ ಕಥಾಹಂದರದ ಆರ್ಟಿಕಲ್ 15 ಸಿನಿಮಾ ಗ್ರಾಮೀಣ ಭಾರತದೊಳಗಿನ ಅಸಾಮಾಜಿಕ ಧೋರಣೆ ಮನಸ್ಸನ್ನು ಅಲ್ಲೋಲಕಲ್ಲೋಲಗೊಳಿಸುತ್ತದೆ ಎಂದು ವರದಿ ಹೇಳಿದೆ.

ಸಾಮಾಜಿಕ ಕಾಳಜಿಯ ಮನಮಿಡಿಯುವ ಆರ್ಟಿಕಲ್ 15 ಸಿನಿಮಾಕ್ಕೆ ಬಿಗ್ ಸ್ಟಾರ್ ನಟರಾದ ಶಾರುಖ್ ಖಾನ್, ಟಬು, ವಿಕಿ ಕೌಶಲ್, ಸಿದ್ದಾರ್ಥ ರಾಯ್ ಕಪೂರ್, ತಾಪ್ಸೀ ಪನ್ನು, ನೀನಾ ಗುಪ್ತಾ ಸೇರಿದಂತೆ ಹಲವರು ಶ್ಲಾಘಿಸಿದ್ದಾರೆ.