ಮೊದಲ ಪತ್ನಿಯಿಂದ ವಿಚ್ಛೇದನ, 2ನೇ ಪತ್ನಿಯ ಭೇಟಿ.. ಮುಕ್ತವಾಗಿ ಮಾತನಾಡಿದ Ashish Vidyarthi

Team Udayavani, May 31, 2023, 12:18 PM IST

ಮುಂಬಯಿ: ಬಹುಭಾಷಾ ನಟ ಆಶಿಶ್ ವಿದ್ಯಾರ್ಥಿ ಇತ್ತೀಚೆಗೆ 2ನೇ ಮದುವೆಯಾಗಿದ್ದಾರೆ. ತನ್ನ 60ನೇ ವಯಸ್ಸಿನಲ್ಲಿ ಮತ್ತೊಮ್ಮೆ ಮದುವೆಯಾದ ನಟನ ಬಗ್ಗೆ ನೆಟ್ಟಿಗರು ನಾನಾ ಬಗೆಯಲ್ಲಿ ಕಮೆಂಟ್‌ ಮಾಡಿದ್ದಾರೆ.

ಈ ಬಗ್ಗೆ ಹಾಗೂ ತನ್ನ ಮೊದಲ ಪತ್ನಿಯ ಬಗ್ಗೆ ನಟ ಆಶಿಶ್ ವಿದ್ಯಾರ್ಥಿ ಸಂದರ್ಶನವೊಂದರಲ್ಲಿ ಮುಕ್ತವಾಗಿ ಮಾತನಾಡಿದ್ದಾರೆ.

ಪಿಲೂ (ರಾಜೋಶಿ ಬರುವಾ) ಮತ್ತು ನನ್ನ ಮದುವೆಯ ಬಂಧ ಒಂದು ಸುಂದರ ನೆನಪು. ಆಕೆ ನನ್ನ ಮಗನ ತಾಯಿ ಮಾತ್ರವಲ್ಲ, ಆಕೆ ನನ್ನ ಉತ್ತಮ ಸ್ನೇಹಿತೆ, ನನ್ನ ಹೆಂಡತಿಯಾಗಿದ್ದಳು, ಅವಳು ನನ್ನೊಂದಿಗೆ ಇದ್ದವಳು. ನಾವು ದೂರ ಆಗಿದ್ದೇವೆ. ಆದರೆ ಇದು ನೋವಿಲ್ಲದೆ ನಡೆದ ಸಂಗತಿ ಖಂಡಿತವಲ್ಲ. ಪಿಲೂ ಮತ್ತು ನಾನು ನೋವಿನಿಂದ ನೊಂದಿದ್ದೇವೆ. ಜೀವನದಲ್ಲಿ ಸದಾ ನಿಮಗೆ ನಿಮಗೆ ಆಯ್ಕೆಗಳಿರುತ್ತವೆ. ನೀವು ಅದನ್ನು ನಿಭಾಯಿಸಲು ಬಯಸುತ್ತೀರಾ ಅಥವಾ ಅದರೊಂದಿಗೆ ಕಾಲಹರಣ ಮಾಡಲು ಬಯಸುವಿರಾ? ಎಂದು ಹೇಳಿದ್ದಾರೆ.

ಇನ್ನು ತನ್ನ ಎರಡನೇ ಪತ್ನಿ ರೂಪಲಿ ಅವರನ್ನು ಭೇಟಿಯಾದ ಬಗ್ಗೆ ಮಾತನಾಡಿದ ಅವರು, ಪಿಲೂ ಜೊತೆಗಿನ ನೆನಪಿನಿಂದ ಆಚೆ ಬಂದ ಬಳಿಕ ವ್ಲೋಗಿಂಗ್ ಅಸೈನ್‌ಮೆಂಟ್‌ವೊಂದರಲ್ಲಿ ನಾನು ರೂಪಾಲಿ ಅವರನ್ನು ಭೇಟಿಯಾದೆ. ಈ ಭೇಟಿ ಸ್ನೇಹಕ್ಕೆ ತಿರುಗಿತು. ನಾವು ಚಾಟಿಂಗ್‌ ಮಾಡುತ್ತ ಹೋದೆವು. ಅವರು ತಮ್ಮ ನೋವನ್ನು ಹಂಚಿಕೊಂಡರು. ಅವರ ಗಂಡ ತೀರಿ ಹೋಗಿ 5 ವರ್ಷಗಳು ಕಳೆದಿದೆ. ಮತ್ತೆ ಮದುವೆಯ ಬಗ್ಗೆ ಅವರು ಯೋಚನೆ ಮಾಡಿರಲಿಲ್ಲ. ಆದರೆ ನಮ್ಮಿಬ್ಬರ ನಡುವಿನ ಚಾಟಿಂಗ್‌ ನಮ್ಮನ್ನು ಹತ್ತಿರವಾಗಿಸಿತು. ಜೀವನವನ್ನು ಹೊಸದಾಗಿ ನೋಡುವ ಮತ್ತು ಮದುವೆಯಾಗುವ ಸಾಧ್ಯತೆಯ ಯೋಚನೆ ಮಾಡಿ ಮುಂದಿನ ಹೆಜ್ಜೆಯನ್ನು ಇಟ್ಟೆ ಎಂದು ಅವರು ಹೇಳಿದರು.

ಆಶಿಶ್ ತನ್ನ ಮೊದಲ ಪತ್ನಿ ರಾಜೋಶಿ ಬರುವಾ ಅವರಿಂದ ಅರ್ಥ ವಿದ್ಯಾರ್ಥಿ ಎಂಬ ಮಗನನ್ನು ಹೊಂದಿದ್ದಾರೆ.