Bigg Boss OTT 2: ಫಿನಾಲೆ ವೇದಿಕೆ ಹತ್ತುವ ಮುನ್ನವೇ ಆಸ್ಪತ್ರೆಗೆ ದಾಖಲಾದ ಸ್ಪರ್ಧಿ

Team Udayavani, Aug 14, 2023, 2:54 PM IST

ಮುಂಬಯಿ: ಸಲ್ಮಾನ್‌ ಖಾನ್‌ ನಿರೂಪಣೆಯ ಬಿಗ್‌ಬಾಸ್  ಓಟಿಟಿ-2 ಫಿನಾಲೆ ಹಂತಕ್ಕೆ ಬಂದಿದೆ. ಫಿನಾಲೆಗೆ ಸ್ಪರ್ಧಿಗಳು ಅಂತಿಮವಾಗಿದ್ದಾರೆ. ಇನ್ನೇನು ಫಿನಾಲೆ ವೇದಿಕೆಯಲ್ಲಿ ಪ್ರದರ್ಶನ ನೀಡಬೇಕೆನ್ನುವಾಗಲೇ ಸ್ಪರ್ಧಿಯೊಬ್ಬರು ಆಸ್ಪತ್ರೆಗೆ ದಾಖಲಾಗಿದ್ದಾರೆ.

ಬಿಗ್‌ ಬಾಸ್‌ ಓಟಿಟಿ-2 ವಿನ ಫಿನಾಲೆ ಸೋಮವಾರ ರಾತ್ರಿ (ಆ.14 ರಂದು) ನಡೆಯಲಿದೆ. ಕಾರ್ಯಕ್ರಮದಲ್ಲಿ ಪ್ರಬಲ ಸ್ಪರ್ಧಿಯಾಗಿ ಗುರುತಿಸಿಕೊಂಡಿರುವ ಫಿನಾಲೆ ಸ್ಪರ್ಧಿಗಳಲ್ಲಿ ಯೂಟ್ಯೂಬರ್ ಅಭಿಷೇಕ್ ಮಲ್ಹಾನ್ ಕೂಡ ಒಬ್ಬರು.

ಬಿಗ್‌ ಬಾಸ್ ಓಟಿಟಿ-2 ಮನೆಯಲ್ಲಿ ಅಭಿಷೇಕ್‌ ಅವರು ಅಪಾರ ವೀಕ್ಷಕರ ಮನ ಗೆದ್ದಿದ್ದಾರೆ. ಆದರೆ ಮನೆಯ ಚಟುವಟಿಕೆಯಲ್ಲಿ  ಅವರ ಆರೋಗ್ಯ ಹದಗೆಟ್ಟಿದೆ. ಕಳೆದ ಕೆಲ ದಿನಗಳಿಂದ ಅವರ ಆರೋಗ್ಯದ ಸ್ಥಿತಿ ಬಗ್ಗೆ ಬಿಗ್‌ ಬಾಸ್‌ ಮನೆಯಿಂದ ಯಾವ ಅಪ್ಡೇಟ್‌ ಕೂಡ ಬಂದಿರಲಿಲ್ಲ.

ಒಂದು ವಾರಕ್ಕೂ ಹೆಚ್ಚಿನ ದಿನಗಳಿಂದ ಅನಾರೋಗ್ಯದಿಂದ ಮನೆಯಲ್ಲಿ ಕಾಣಿಸಿರಲಿಲ್ಲ. ಟಾಪ್‌ -5 ಫಿನಾಲೆ ಸ್ಪರ್ಧಿಗಳಲ್ಲಿ ಅಭಿಷೇಕ್ ಅವರ ಹೆಸರನ್ನು ಸಲ್ಮಾನ್‌ ಘೋಷಿಸಿದ್ದರು.

ಇದೀಗ ಅಭಿಷೇಕ್‌ ಅವರು ಅನಾರೋಗ್ಯದಿಂದ ಆಸ್ಪತ್ರೆಗೆ ದಾಖಲಾಗಿದ್ದಾರೆ ಎನ್ನುವ ಬಗ್ಗೆ ಅವರ ಸಹೋದರಿ ಟ್ವೀಟ್‌ ಮಾಡಿದ್ದಾರೆ.

“ಅಭಿಷೇಕ್ ಅನಾರೋಗ್ಯವಾಗಿದ್ದಾರೆ. ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಆ ಕಾರಣದಿಂದ ಅವರು ಫಿನಾಲೆಯಲ್ಲಿ ಪ್ರದರ್ಶನವನ್ನು ನೀಡಲು ಸಾಧ್ಯವಾಗುವುದಿಲ್ಲ. ಅಭಿಷೇಕ್‌ ಈ ಸೀಸನ್‌ ಇಡೀ ಮನರಂಜನೆ ನೀಡಿದ್ದಾರೆ. ಶೀಘ್ರದಲ್ಲಿ ಅವರು ಗುಣಮುಖರಾಗಲಿ ಎಂದು ಪ್ರಾರ್ಥಿಸೋಣ” ಪ್ರೇರಣಾ ಮಲ್ಹಾನ್‌ ಟ್ವೀಟ್‌ ಮಾಡಿದ್ದಾರೆ.

ಈ ಟ್ವೀಟ್‌ ನೂರಾರು ಮಂದಿ ಪ್ರತಿಕ್ರಿಯಿಸಿ ಅಭಿಷೇಕ್‌ ಗುಣಮುಖರಾಗಲಿಯೆಂದು ಪ್ರಾರ್ಥಿಸಿದ್ದಾರೆ.

ಎಲ್ವಿಶ್ ಯಾದವ್, ಮನೀಶಾ ರಾಣಿ, ಪೂಜಾ ಭಟ್ ಮತ್ತು ಬೇಬಿಕಾ ಧುರ್ವೆ ಅಭಿಷೇಕ್‌ ಅವರೊಂದಿಗೆ ಫಿನಾಲೆಯಲ್ಲಿ ಸ್ಪರ್ಧಿಸಲಿದ್ದಾರೆ.