‘ಇದು ತಪ್ಪು’ ..ಪ್ರೇಯಸಿ ಫೋಟೊ ಕ್ಲಿಕ್ಕಿಸಿದ ಫೋಟೊಗ್ರಾಫರ್ ಮೇಲೆ ಆಕ್ರೋಶ

Team Udayavani, Mar 1, 2021, 3:44 PM IST

ಮುಂಬೈ : ಪ್ರೇಯಸಿ ಮಲೈಕಾ ಅರೋರಾ ಜತೆ ಕಾಣಿಸಿಕೊಂಡ ವೇಳೆ ಫೋಟೊ ಕ್ಲಿಕ್ಕಿಸಲು ಮುಂದಾದ ಫೋಟೊಗ್ರಾಫರ್ಸ್ ಮೇಲೆ ಬಾಲಿವುಡ್ ನಟ ಅರ್ಜುನ್ ಕಪೂರ್ ಗರಂ ಆಗಿದ್ದಾರೆ.

ಬಿಟೌನ್ ಲವ್ ಬರ್ಡ್ಸ್ ಅರ್ಜುನ್ ಹಾಗೂ ಮಲೈಕಾ ಪ್ರೀತಿ ವಿಚಾರ ಗುಟ್ಟಾಗಿ ಉಳಿದಿಲ್ಲ. ಕಳೆದ ಕೆಲ ವರ್ಷಗಳಿಂದ ಪ್ರೀತಿಯ ಕಡಲಿನಲ್ಲಿ ತೇಲುತ್ತಿರುವ ಈ ಜೋಡಿ, ಪಾರ್ಟಿ, ಡಿನ್ನರ್ ಗಳಲ್ಲಿ ಜತೆಯಾಗಿ ಕಾಣಿಸಿಕೊಂಡು ಸಖತ್ ಸುದ್ದಿಯಾಗಿದ್ದುಂಟು.

ನಿನ್ನೆ ( ಭಾನುವಾರ-ಫೆ.28) ಅರ್ಜುನ್ ಹಾಗೂ ಮಲೈಕಾ, ಬಾಲಿವುಡ್ ನಟಿ ಕರೀನಾ ಕಪೂರ್ ಅವರ ಎರಡನೇ ಪುತ್ರನನ್ನು ನೋಡಲು ತೆರಳಿದ್ದರು. ಈ ವೇಳೆ ಕಾರಿನಿಂದ ಇಳಿದ ಈ ಜೋಡಿಗಳತ್ತ ಕ್ಯಾಮರಾ ಕಣ್ಣುಗಳು ಧಾವಿಸಿದ್ದವು. ಇದರಿಂದ ಕೆರಳಿದ ಅರ್ಜುನ್, ‘ಇದು ತಪ್ಪು ಫೋಟೊ ತೆಗೆಯಬೇಡಿ’ ಎಂದು ಸ್ವಲ್ಪ ಸಿಟ್ಟಿನಿಂದಲೇ ವಾರ್ನ್ ಮಾಡಿದರು.

‘ಸ್ವಲ್ಪ ಅರ್ಥ ಮಾಡಿಕೊಳ್ಳಿ, ಅವಳು (ಮಲೈಕಾ ) ಫೋಟೊ ತೆಗೆಯಬೇಡಿ ಕೇಳಿಕೊಳ್ಳುತ್ತಿದ್ದಾಳೆ. ನೀವು ಹೀಗೆ ಮಾಡೊದು ತಪ್ಪು’ ಎಂದರು. ಇದೇ ವೇಳೆ ಕಾಂಪೌಂಡ್ ಮೇಲೆ ಏರಿದ್ದ ಫೋಟೊಗ್ರಾಫರ್ ಮೇಲೆ ಸಿಟ್ಟಾದ ಅರ್ಜುನ್, ನೀವು ಹೀಗೆ ಮಾಡಿ ಕಾಂಪೌಂಡ್ ಕಿತ್ತು ಹಾಕುತ್ತೀರಿ ಎಂದು ಸಿಡಿಮಿಡಿಗೊಂಡರು.