Chhaava Teaser:‌ ʼಛಾವಾʼದಲ್ಲಿ ಛತ್ರಪತಿ ಸಂಭಾಜಿಯಾಗಿ ಅಬ್ಬರಿಸಿದ ವಿಕ್ಕಿ ಕೌಶಲ್

Team Udayavani, Aug 19, 2024, 4:05 PM IST

ಮುಂಬಯಿ: ನಟ ವಿಕ್ಕಿ ಕೌಶಲ್‌ (Vicky Kaushal)  ಅವರು ಭಿನ್ನ ಗೆಟಪ್‌ನಲ್ಲಿ ಕಾಣಿಸಿಕೊಳ್ಳಲಿರುವ  ‘ಛಾವಾ’ (Chhaava)  ಸಿನಿಮಾದ ಟೀಸರ್ ಸೋಮವಾರ(ಆ.19ರಂದು) ರಿಲೀಸ್‌ ಆಗಿದೆ.

2023ರಿಂದ ಅಂದರೆ ಸಿನಿಮಾ ಅನೌನ್ಸ್‌ ಆದ ದಿನದಿಂದಲೇ ʼಛಾವಾʼ ಸದ್ದು ಮಾಡಿತ್ತು. ವಿಕ್ಕಿ ಕೌಶಲ್‌ ಹಿಂದೆಂದೂ ಕಾಣಿಸಿಕೊಳ್ಳದ ಲುಕ್‌ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನುವ ವಿಚಾರ ಅವರ ಅಭಿಮಾನಿಗಳಲ್ಲಿ ಸಿನಿಮಾದ ಬಗೆಗಿನ ಕುತೂಹಲ ಹೆಚ್ಚಾಗುವಂತೆ ಮಾಡಿತ್ತು.

ವಿಕ್ಕಿ ಕೌಶಲ್‌ ಶಿವಾಜಿ ಮಹಾರಾಜ್‌ ಪುತ್ರ ಛತ್ರಪತಿ ಸಂಭಾಜಿ ಮಹಾರಾಜ್ ಪಾತ್ರದಲ್ಲಿ ವೀರ ಯೋಧನಂತೆ ಶತ್ರುಗಳ ಸಾಮ್ರಾಜ್ಯವನ್ನು ಸದೆಬಡಿಯುವ ಅವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ. ನೂರಾರು ಶತ್ರುಗಳ ನಡುವೆ ಯುದ್ಧ ಮಾಡುವ ಛತ್ರಪತಿ ಸಂಭಾಜಿಯ ಕಿಚ್ಚು ಹಾಗೂ ರೋಷ -ವೇಷವನ್ನು ಟೀಸರ್‌ ನಲ್ಲಿ ತೋರಿಸಲಾಗಿದೆ. ಟೀಸರ್‌ ಕೊನೆಯಲ್ಲಿ ಕಾಣುವ ಅಕ್ಷಯ್‌ ಖನ್ನಾ ನೆಗೆಟಿವ್‌ ಶೇಡ್‌ನಲ್ಲಿ ಬಣ್ಣ ಹಚ್ಚಿದ್ದಾರೆ.

ಲಕ್ಷ್ಮಣ್ ಉಟೇಕರ್ (Laxman Utekar) ನಿರ್ದೇಶನ ಮಾಡಿರುವ ʼಛಾವಾʼ ಮರಾಠ ಸಾಮ್ರಾಜ್ಯದ ಕೆಚ್ಚೆದೆಯ ವೀರನೊಬ್ಬನ ಕಥೆಯನ್ನೊಳಗೊಂಡಿದ್ದು, ಬಾಲಿವುಡ್‌ನಲ್ಲಿ ನಿರೀಕ್ಷೆ ಹೆಚ್ಚಿಸಿದೆ.

ಇದನ್ನೂ ಓದಿ: Shivanna 131: ಶಿವರಾಜ್ ಕುಮಾರ್ ಶೂಟಿಂಗ್‌ ಸೆಟ್‌ಗೆ ನಟ ಯಶ್‌ ಭೇಟಿ; ಫೋಟೋಸ್ ವೈರಲ್

ʼಛಾವಾʼದಲ್ಲಿ ಲವರ್‌ ಬಾಯ್‌ ಆಗಿ ಪ್ರೇಕ್ಷಕರ ಮನ ಗೆಲ್ಲುತ್ತಿದ್ದ ವಿಕ್ಕಿ ಕೌಶಲ್‌ ಸೈನಿಕನಂತೆ ಅಬ್ಬರಿಸಿದ್ದಾರೆ. ಅವರ ಅಭಿನಯವನ್ನು ʼಬಾಜಿರಾವ್ ಮಸ್ತಾನಿʼಯಲ್ಲಿನ ರಣ್ವೀರ್‌ ಸಿಂಗ್‌ ಅವರಿಗೆ ಹೋಲಿಸಲಾಗುತ್ತಿದೆ.

ಸಿನಿಮಾದಲ್ಲಿ ನಾಯಕಿಯಾಗಿ ರಶ್ಮಿಕಾ ಮಂದಣ್ಣ(Rashmika Mandanna) ಅವರು ಸಂಭಾಜಿಯ ಪತ್ನಿ ಯೇಸುಬಾಯಿ ಭೋನ್ಸಾಲೆ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಆದರೆ ಟೀಸರ್‌ನಲ್ಲಿ ಅವರ ಝಲಕ್ ತೋರಿಸಿಲ್ಲ.

ಈಗಾಗಲೇ ಚಿತ್ರೀಕರಣವನ್ನು ಮುಗಿಸಿರುವ ʼಛಾವಾʼ ಇದೇ ವರ್ಷದ ಡಿಸೆಂಬರ್‌ 6 ರಂದು ವರ್ಲ್ಡ್‌ ವೈಡ್‌ ತೆರೆಗೆ ಬರಲಿದೆ.

ʼಛಾವಾʼದಲ್ಲಿ ವಿಕ್ಕಿ ಕೌಶಲ್‌, ರಶ್ಮಿಕಾ ಜೊತೆಗೆ ಅಕ್ಷಯ್ ಖನ್ನಾ, ಅಶುತೋಷ್ ರಾಣಾ ಮತ್ತು ದಿವ್ಯಾ ದತ್ತಾ  ಮುಂತಾದವರು ನಟಿಸಿದ್ದಾರೆ.