Rashmika Mandannaಗೆ ಅದೃಷ್ಟ ತಂದ ಡಿಸೆಂಬರ್…: ಬಿಡುಗಡೆಯ ಸಿನಿಮಾಗಳು ಹಿಟ್ ಲಿಸ್ಟ್ ಗೆ

Team Udayavani, Aug 14, 2023, 4:43 PM IST

ಚಿತ್ರರಂಗ ಅನೇಕ ಸ್ಟಾರ್ಗೆ ಕೆಲವೊಂದು ನಂಬರ್‌, ದಿನ ಮತ್ತು ತಿಂಗಳ ಮೇಲೆ ವಿಶೇಷವಾದ ಆಸಕ್ತಿ, ಕುತೂಹಲ ಮತ್ತು ನಂಬಿಕೆ ಎಲ್ಲವೂ ಇರುತ್ತದೆ. ತಾವಂದುಕೊಂಡಿರುವ ಇಂಥ ದಿನ ಅಥವಾ ತಿಂಗಳಲ್ಲಿ ನನ್ನ ಸಿನಿಮಾ ರಿಲೀಸ್‌ ಆದರೆ ಸೂಪರ್‌ ಹಿಟ್‌ ಗ್ಯಾರೆಂಟಿ ಅನ್ನೋದು ಅವರ ಬಲವಾದ ನಂಬಿಕೆ. ಇನ್ನು ನಟಿ ರಶ್ಮಿಕಾ ಮಂದಣ್ಣ ಕೂಡ ಡಿಸೆಂಬರ್‌ ತಿಂಗಳ ಮೇಲೆ ಇಂಥದ್ದೊಂದು ನಂಬಿಕೆ ಇಟ್ಟುಕೊಂಡಿದ್ದಾರಂತೆ!

ಹೌದು, ರಶ್ಮಿಕಾ ಅವರೇ ಹೇಳಿಕೊಂಡಿರುವಂತೆ, ಡಿಸೆಂಬರ್‌ ಅಂದ್ರೆ ಅವರಿಗೆ ಅದು ಲಕ್ಕಿ ತಿಂಗಳಂತೆ. ಈ ಬಗ್ಗೆ ಮಾತನಾಡಿರುವ ರಶ್ಮಿಕಾ ಮಂದಣ್ಣ, “ಡಿಸೆಂಬರ್‌ ಅಂದ್ರೆ ನನಗೆ ಯಾವಾಗಲೂ ಲಕ್ಕಿ ತಿಂಗಳು. ನಾನು ನಟಿಸಿದ ಮೊದಲ ಸಿನಿಮಾ “ಕಿರಿಕ್‌ ಪಾರ್ಟಿ’, “ಚಮಕ್‌’, “ಅಂಜನಿಪುತ್ರ’, “ಪುಷ್ಪ’ ಸೇರಿ ಅನೇಕ ಚಿತ್ರಗಳು ಇದೇ ತಿಂಗಳಲ್ಲಿ ರಿಲೀಸ್‌ ಆಗಿವೆ. ಡಿಸೆಂಬರ್‌ನಲ್ಲಿ ತೆರೆಕಂಡ ಈ ಎಲ್ಲ ಸಿನಿಮಾಗಳೂ ಸೂಪರ್‌ ಹಿಟ್‌ ಆಗಿ ನನಗೆ ಸಾಕಷ್ಟು ಹೆಸರು ತಂದುಕೊಟ್ಟಿದ್ದವು. ಇದೇ ಡಿಸೆಂಬರ್‌ನಲ್ಲಿ ನಾನು ಅಭಿನಯಿಸಿರುವ “ಅನಿಮಲ್‌’ ಸಿನಿಮಾ ಕೂಡ ರಿಲೀಸ್‌ ಆಗುತ್ತಿದೆ. ಈ ವಿಷಯದಲ್ಲಿ ನಾನು ಥ್ರಿಲ್‌ ಆಗಿದ್ದೇನೆ’ ಎಂದು ಹೇಳಿಕೊಂಡಿದ್ದಾರೆ.

ಅಂದಹಾಗೆ, ರಶ್ಮಿಕಾ ಮಂದಣ್ಣ ಮತ್ತು ರಣಬೀರ್‌ ಕಪೂರ್‌ ಅಭಿನಯದ “ಅನಿಮಲ್’ ಸಿನಿಮಾ ಇದೇ ಡಿಸೆಂಬರ್‌ 1ಕ್ಕೆ ತೆರೆಗೆ ಬರುತ್ತಿದೆ.

“”ಅನಿಮಲ್‌’ ಈಗ ಡಿಸೆಂಬರ್‌ನಲ್ಲಿ ರಿಲೀಸ್‌ ಆಗುತ್ತಿರೋ ನನ್ನ 5ನೇ ಸಿನಿಮಾ. ನನ್ನ ಲಕ್ಕಿ ತಿಂಗಳಿನಲ್ಲಿ ರಿಲೀಸ್‌ ಆಗ್ತಿರುವುದರಿಂದ ಇದರ ಮೇಲೆ ನಿರೀಕ್ಷೆ ಹೆಚ್ಚಾಗಿಯೇ ಇದೆ. “ಅನಿಮಲ್’ ಸಿನಿಮಾದಲ್ಲಿ ನನ್ನ ಪಾತ್ರ ಯೂನಿಕ್‌ ಆಗಿದೆ. ನಾನು ಎಂದೂ ಈ ತರಹದ ಪಾತ್ರದಲ್ಲಿ ನಟಿಸಿಲ್ಲ. ನನಗೆ ಇದೊಂದು ಕಠಿಣ ಪಾತ್ರವಾಗಿದ್ದು, ನಾನು ಈ ರೀತಿಯ ಪಾತ್ರ ಮಾಡುತ್ತೇನೆ ಎಂದು ಭಾವಿಸಿರಲಿಲ್ಲ. ಪ್ರೇಕ್ಷಕರ ಅಭಿಪ್ರಾಯ ತಿಳಿದುಕೊಳ್ಳಲು ನಾನು ಕಾಯುತ್ತಿದ್ದೇನೆ. ಅನಿಮಲ್‌ ಸಿನಿಮಾ ತೆರೆಗೆ ಬರಲಿ ಎಂದು ನಾನು ಕೂಡ ಎದುರು ನೋಡ್ತಿದ್ದೇನೆ. ಈ ಸಿನಿಮಾದಲ್ಲಿ ವಿಭಿನ್ನ ಕಥೆಯಿದ್ದು, ಪ್ರೇಕ್ಷಕರಿಗೆ ಮನರಂಜನೆ ನೀಡುತ್ತದೆ. ಅಭಿಮಾನಿಗಳು ನಿಜಕ್ಕೂ ಈ ಸಿನಿಮಾ ಇಷ್ಟಪಡುತ್ತಾರೆ’ ಎಂದಿದ್ದಾರೆ ರಶ್ಮಿಕಾ ಮಂದಣ್ಣ.

ಈಗಾಗಲೇ ರಿಲೀಸ್‌ ಆಗಿರುವ “ಅನಿಮಲ್’ ಸಿನಿಮಾದ ಟ್ರೇಲರ್‌ಗೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದ್ದು, ಸಿನಿಮಾ ಹೇಗಿದೆ ಎಂಬುದು ಡಿಸೆಂಬರ್‌ ಮೊದಲ ವಾರ ಗೊತ್ತಾಗಲಿದೆ.