OMG 2: ನಾನು ಯಾವುದೇ ಧರ್ಮವನ್ನು ನಂಬುವುದಿಲ್ಲ.. ಮತ್ತೆ ವೈರಲ್‌ ಆದ ಅಕ್ಷಯ್‌ ಹಳೆ ವಿಡಿಯೋ

Team Udayavani, Jul 11, 2023, 5:27 PM IST

ಮುಂಬಯಿ: ಕಿಲಾಡಿ ಅಕ್ಷಯ್‌ ಕುಮಾರ್‌ ಅಭಿನಯದ ʼ ಓ ಮೈ ಗಾಡ್‌-2ʼ ಚಿತ್ರದ ಟೀಸರ್‌ ರಿಲೀಸ್‌ ಆಗಿ ಸದ್ದು ಮಾಡುತ್ತಿದೆ. ಶಿವನ ಅವತಾರದಲ್ಲಿ ಅಕ್ಷಯ್‌ ಕುಮಾರ್‌ ಕಾಣಿಸಿಕೊಂಡಿದ್ದಾರೆ.

2012 ರಲ್ಲಿ ʼ ಓ ಮೈ ಗಾಡ್‌ʼ ಸಿನಿಮಾ ಬಂದಿತ್ತು. ಸಿನಿಮಾದಲ್ಲಿ ಪರೇಶ್ ರಾವಲ್ ಜೊತೆ ಅಕ್ಷಯ್ ನಟಿಸಿದ್ದರು. ಈ ಸಿನಿಮಾ ಬಾಕ್ಸ್‌ ಆಫೀಸ್‌ ನಲ್ಲಿ ಒಳ್ಳೆಯ ಕಮಾಯಿಯೊಂದಿಗೆ ಪ್ರೇಕ್ಷಕರ ಮನಗೆದ್ದಿತ್ತು. 11 ವರ್ಷದ ಬಳಿಕ ಸಿನಿಮಾದ ಎರಡನೇ ಭಾಗ ತೆರೆಗೆ ಬರಲು ಸಿದ್ಧವಾಗಿದೆ.

ಸಿನಿಮಾದ ಟೀಸರ್ ರಿಲೀಸ್‌ ಆದ ಬೆನ್ನಲ್ಲೇ ಅಕ್ಷಯ್‌ ಕುಮಾರ್‌ ಈ ಹಿಂದೆ ಆಡಿದ ಮಾತೊಂದು ಮತ್ತೆ ವೈರಲ್‌ ಆಗುತ್ತಿದೆ. ‘ಸೂರ್ಯವಂಶಿ’ಸಿನಿಮಾದ ಪ್ರಚಾರದ ವೇಳೆಯಲ್ಲಿ ಅಕ್ಷಯ್‌ ಕುಮಾರ್ ಧರ್ಮದ ಕುರಿತಾಗಿ ಹೇಳಿಕೆಯೊಂದನ್ನು ಕೊಟ್ಟಿದ್ದು, ಕೆಲವರ ಕೆಂಗಣ್ಣಿಗೆ ಗುರಿಯಾಗಿತ್ತು.

ಹೇಳಿದ್ದೇನು?:

“ನಾನು ಯಾವುದೇ ಧರ್ಮವನ್ನು ನಂಬುವುದಿಲ್ಲ. ನಾನು ಭಾರತೀಯನಾಗಿರುವುದರಲ್ಲಿ ಮಾತ್ರ ನಂಬುತ್ತೇನೆ ಮತ್ತು ಅದನ್ನೇ ಚಿತ್ರವೂ ತೋರಿಸುತ್ತದೆ. ಒಬ್ಬ ಭಾರತೀಯ ಎಂಬ ಕಲ್ಪನೆಯೇ ಹೊರತು ಪಾರ್ಸಿ ಅಥವಾ ಹಿಂದೂ ಅಥವಾ ಮುಸಲ್ಮಾನ ಎಂಬುದಕ್ಕೆ ಅಲ್ಲ, ನಾವು ಅದನ್ನು ಧರ್ಮದ ಆಧಾರದ ಮೇಲೆ ನೋಡಿಲ್ಲ” ಎಂದು ಹೇಳಿದ್ದರು.‌

ಇದನ್ನೂ ಓದಿ: ʼTOBYʼ ಗೆ ಪ್ರತಿಷ್ಠಿತ ಪ್ರೊಡಕ್ಷನ್ ಸಂಸ್ಥೆ ಸಾಥ್‌: ಬಿಗ್ ಅಪ್ಡೇಟ್ ಕೊಟ್ಟ ನಟ

ʼಓ ಮೈ ಗಾಡ್‌-2ʼ ಚಿತ್ರದ ಟೀಸರ್‌ ಬಳಿಕ ಅಕ್ಷಯ್‌ ಕುಮಾರ್‌ ಅವರ ಹಳೆಯ ಹೇಳಿಕೆ ಮತ್ತೆ ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿದೆ.

ಅಕ್ಷಯ್‌ ಕುಮಾರ್‌ ಜತೆ ಯಾಮಿ ಗೌತಮ್, ಪಂಕಜ್ ತ್ರಿಪಾಠಿ ಮತ್ತು ‘ರಾಮಾಯಣʼಖ್ಯಾತಿಯ ಅರುಣ್ ಗೋವಿಲ್ ಪ್ರಮುಖ ಪಾತ್ರಗಳಲ್ಲಿ ಸಿನಿಮಾದಲ್ಲಿ ನಟಿಸಿದ್ದಾರೆ.

ಆಗಸ್ಟ್‌ 11 ರಂದು ಸಿನಿಮಾ ತೆರೆಗೆ ಬರಲಿದೆ.