Tollywood: ದಸರಾ ಹಬ್ಬಕ್ಕೆ ಸ್ಪೆಷೆಲ್‌ ಅಪ್ಡೇಟ್‌ ಕೊಟ್ಟ ಮಹೇಶ್‌ ಬಾಬು ʼಗುಂಟೂರು ಕಾರಮ್ʼ

Team Udayavani, Oct 24, 2023, 12:07 PM IST

ಹೈದರಾಬಾದ್: ಪ್ರಿನ್ಸ್‌ ಮಹೇಶ್‌ ಬಾಬು ಅವರ ಬಹು ನಿರೀಕ್ಷಿತ ಸಿನಿಮಾಗಳಲ್ಲಿ ಒಂದಾಗಿರುವ ʼ ಗುಂಟೂರು ಕಾರಮ್ʼ ಹೈಪ್‌ ಹೆಚ್ಚಿಸಿದೆ. ಮಹೇಶ್‌ ಬಾಬು ಲೋಕಲ್‌ ಹೈದಾನಂತೆ ಕಾಣಿಸಿಕೊಂಡಿರುವ ಪೋಸ್ಟರ್‌ ಗಳು ಈಗಾಗಲೇ ವೈರಲ್‌ ಆಗಿದೆ.

ʼ ಗುಂಟೂರು ಕಾರಮ್ʼ ಸಿನಿಮಾದ ಅಪ್ಡೇಟ್‌ ಗಳಿಂದಲೇ ಚಿತ್ರ ಪ್ರೇಕ್ಷಕರಲ್ಲಿ ಕುತೂಹಲ ಹೆಚ್ಚಿಸಿದೆ. ಸಿನಿಮಾದ ಮೇಲೆ ನಿರೀಕ್ಷೆ ಹೆಚ್ಚಾಗಲು ಮತ್ತೊಂದು ಕಾರಣವೆಂದರೆ ಇದು ಮಹೇಶ್‌ ಬಾಬು ಹಾಗೂ ತ್ರಿವಿಕ್ರಮ್‌ ಅವರ ಕಾಂಬಿನೇಷನ್‌ ನಲ್ಲಿ ಮೂಡಿ ಬರುತ್ತಿರುವ ಸಿನಿಮಾ. ಈ ಹಿಂದೆ ಮಹೇಶ್‌ ಬಾಬು ಹಾಗೂ ತ್ರಿವಿಕ್ರಮ್‌ ಅವರು 2010 ರಲ್ಲಿ ʼಖಲೇಜಾʼ ಸಿನಿಮಾವನ್ನು ಮಾಡಿದ್ದರು. ಇದೀಗ ಮತ್ತೆ ಸೂಪರ್‌ ಹಿಟ್‌ ಕಾಂಬಿನೇಷನ್‌ ಜೊತೆಯಾಗುತ್ತಿರುವುದು ಪ್ರೇಕ್ಷಕರ ಕುತೂಹಲಕ್ಕೆ ಕಾರಣವಾಗಿದೆ.

ದಸರಾ ಹಬ್ಬದ ಪ್ರಯುಕ್ತ ಮಹೇಶ್‌ ಬಾಬು ಅವರು ತನ್ನ ʼ ಗುಂಟೂರು ಕಾರಮ್ʼ ಸಿನಿಮಾದ ಹೊಸ ಪೋಸ್ಟರ್‌ ವೊಂದನ್ನು ರಿಲೀಸ್‌ ಮಾಡಿ ಹಬ್ಬದ ಶುಭಾಶಯವನ್ನು ಕೋರಿದ್ದಾರೆ.

ಮಾಸ್‌ ಲುಕ್‌ ನಲ್ಲಿ ಮಹೇಶ್‌ ಬಾಬು ಅವರು ಧಮ್‌ ಎಳೆಯುತ್ತ ಕೂತಿರುವುದನ್ನು ಪೋಸ್ಟರ್‌ ನಲ್ಲಿ ನೋಡಬಹುದು. ಶೀಘ್ರದಲ್ಲಿ ಸಿನಿಮಾದ ಮೊದಲ ಹಾಡನ್ನು ರಿಲೀಸ್‌ ಮಾಡುವುದಾಗಿ ಪೋಸ್ಟರ್‌ ಮೂಲಕ ತಿಳಿಸಲಾಗಿದೆ.

ಅಂದಹಾಗೆ ಸಿನಿಮಾ ಮುಂದಿನ ಸಂಕ್ರಾಂತಿ ಹಬ್ಬಕ್ಕೆ ರಿಲೀಸ್‌ ಆಗಲಿದ್ದು,ಈ ಸಿನಿಮಾದಲ್ಲಿ ಜಯರಾಮ್, ಶ್ರೀಲೀಲಾ, ಮೀನಾಕ್ಷಿ ಚೌಧರಿ, ಜಗಪತಿ ಬಾಬು ಮತ್ತು ರಮ್ಯಾ ಕೃಷ್ಣ ಮುಂತಾದವರು ನಟಿಸಿದ್ದಾರೆ.

ಈ ಸಿನಿಮಾದ ಬಳಿಕ ರಾಜಮೌಳಿ ಅವರ ʼಎಸ್‌ ಎಸ್‌ ಎಂಬಿ29ʼ ಸಿನಿಮಾದಲ್ಲಿ ಮಹೇಶ್‌ ಬಾಬು ಕಾಣಿಸಿಕೊಳ್ಳಲಿದ್ದಾರೆ.