ಮಗ-ಸೊಸೆ ಸಂಸಾರ ಸರಿ ಪಡಿಸಲು ನಟ ನಾಗಾರ್ಜುನ್ ಪ್ರಯತ್ನ

Team Udayavani, Sep 13, 2021, 6:28 PM IST

ಹೈದರಾಬಾದ್: ತಮ್ಮ ಮಗ ನಾಗಚೈತನ್ಯ ಹಾಗೂ ಸೊಸೆ ಸಮಂತಾ ನಡುವೆ ಉಂಟಾಗಿರುವ ವೈಮನಸ್ಸು ಸರಿಪಡಿಸಲು ಹಿರಿಯ ನಟ ನಾಗಾರ್ಜುನ್ ಅಕ್ಕಿನೇನಿ ಮುಂದಾಗಿದ್ದಾರಂತೆ.

ಟಾಲಿವುಡ್ ಸೂಪರ್ ಜೋಡಿ ಎನ್ನಿಸಿಕೊಂಡಿದ್ದ ಸಮಂತಾ ಪ್ರಭು ಮತ್ತು ನಾಗಚೈತನ್ಯ ನಡುವಿನ ವೈವಾಹಿಕ ಬದುಕು ಮುರಿದುಬಿದ್ದಿದೆ ಎಂಬ ಸುದ್ದಿ ಕಳೆದ ಕೆಲ ದಿನಗಳಿಂದ ಕೇಳಿ ಬರುತ್ತಿದೆ. ತಮ್ಮ ದಾಂಪತ್ಯ ಜೀವನಕ್ಕೆ ಫುಲ್ ಸ್ಟಾಪ್ ಹೇಳಿ ಪರಸ್ಪರ ದೂರವಾಗಲು ಈ ಜೋಡಿ ಮುಂದಾಗಿದೆಯಂತೆ. ಸೋಷಿಯಲ್ ಮೀಡಿಯಾ ಅಕೌಂಟ್ ಗಳಲ್ಲಿ ಅಕ್ಕಿನೇನಿ ಹೆಸರು ಕೈ ಬಿಟ್ಟಿರುವ ಸುಮಂತಾ, ಇತ್ತೀಚಿಗೆ ನಡೆದ ತಮ್ಮ ಮಾವ ನಾಗಾರ್ಜುನ್ ಅವರ ಬರ್ತ್‍ಡೇ ಕಾರ್ಯಕ್ರಮಕ್ಕೂ ಗೌರು ಆಗಿದ್ದರು. ಈ ನಡೆ ಬ್ರೇಕಪ್ ವದಂತಿಗೆ ಮತ್ತಷ್ಟು ಪುಷ್ಠಿ ನೀಡಿದೆ.

2017 ರಲ್ಲಿ ಪ್ರೀತಿಸಿ ಮದುವೆಯಾದ ಈ ಜೋಡಿಯನ್ನು ಒಂದುಗೂಡಿಸಲು ನಾಗಚೈತನ್ಯ ಅವರ ತಂದೆ ನಟ ನಾಗಾರ್ಜುನ ಇನ್ನಿಲ್ಲದ ಪ್ರಯತ್ನಪಡುತ್ತಿದ್ದಾರಂತೆ. ಇಬ್ಬರ ನಡುವೆ ಸಮಸ್ಯೆಯೇನೆಂದು ತಿಳಿದುಕೊಂಡು ಅದನ್ನು ಸರಿಪಡಿಸುವ ನಿಟ್ಟಿನಲ್ಲಿ ನಾಗಾರ್ಜುನ್ ಪ್ರಯತ್ನ ನಡೆಸಿದ್ದಾರಂತೆ. ಆದರೆ ಇಬ್ಬರೂ ಎಲ್ಲೂ ಅಧಿಕೃತವಾಗಿ ತಾವು ಬೇರೆಯಾಗುತ್ತಿರುವ ಸುದ್ದಿಯನ್ನು ಹೇಳಿಕೊಂಡಿಲ್ಲ.

ಇನ್ನು ಸಮಂತಾ ಹಾಗೂ ನಾಗಚೈತನ್ಯ ಸಿನಿಮಾಗಳಲ್ಲಿ ಬ್ಯುಝಿ ಆಗಿದ್ದಾರೆ. ಸಮಂತಾ ಅವರ ವೆಬ್ ಸಿರೀಸ್ ಹಾಗೂ ಕೆಲವು ಟಾಲಿವುಡ್ ಸಿನಿಮಾಗಳಲ್ಲಿ ನಟಿಸುತ್ತಿದ್ದರೆ, ನಾಗ ಚೈತನ್ಯ ಬಾಲಿವುಡ್ ಸೇರಿದಂತೆ ಹಲವು ತೆಲುಗು ಸಿನಿಮಾಗಳಲ್ಲಿ ಅಭಿನಯಿಸುತ್ತಿದ್ದಾರೆ.