ನಟಿ ಸನ್ನಿ ಪತಿ ಕಾರಿನ ಡುಬ್ಲಿಕೇಟ್ ನಂಬರ್ ಬಳಸಿ ಸಿಕ್ಕಿಬಿದ್ದ ಉದ್ಯಮಿ..!  

Team Udayavani, Feb 25, 2021, 7:52 PM IST

ಮುಂಬೈ : ಬಾಲಿವುಡ್ ನಟಿ ಸನ್ನಿ ಲಿಯೋನ್ ಅವರ ಪತಿ ಡೇನಿಯಲ್ ಕಾರಿನ ಡುಬ್ಲಿಕೇಟ್ ನಂಬರ್ ಬಳಸುತ್ತಿದ್ದ ಉದ್ಯಮಿಯೋರ್ವನನ್ನು ಮುಂಬೈನ ವರ್ಸೋವಾ ಪೊಲೀಸರು ಬಂಧಿಸಿದ್ದಾರೆ.

38 ವರ್ಷದ ಪಿಯೂಶ್ ಸೇನ್ ಬಂಧಿತ ಆರೋಪಿ. ಈತ ತನ್ನ ಮರ್ಸಿಡಿಸ್ ಗೆ ಸನ್ನಿ ಲಿಯೋನ್ ಕುಟುಂಬದ ಕಾರಿನ ನಂಬರ್ ಬಳಸುತ್ತಿದ್ದ. ಸಂಖ್ಯಾಶಾಸ್ತ್ರೀಯ ಪ್ರಕಾರ ಈ ನಂಬರ್ ಆತನಿಗೆ ಲಕ್ಕಿಯಾಗಿತ್ತಂತೆ. ಈ ಉದ್ದೇಶದಿಂದ ನಂಬರ್ ಡುಬ್ಲಿಕೇಟ್ ಮಾಡಿದ್ದೆ ಎಂದು ಪೊಲೀಸರ ಎದುರು ತಪ್ಪೊಪ್ಪಿಕೊಂಡಿದ್ದಾನೆ.

ಬೆಳಕಿಗೆ ಬಂದಿದ್ದು ಹೇಗೆ ?

ಟ್ರಾಫಿಕ್ ನಿಮಯ ಉಲ್ಲಂಘಿಸಿದ್ದಕ್ಕಾಗಿ ಹಲವು ದಂಡದ ಚಲನ್ ಗಳು ಸನ್ನಿ ಲಿಯೋನ್ ಮನೆಗೆ ಬಂದಿದ್ದವು. ಈ ಕುರಿತು ಅವರು ಪೊಲೀಸ್ ಠಾಣೆಗೆ ಮಾಹಿತಿ ನೀಡಿದ್ದರು. ಈ ಬಗ್ಗೆ ತನಿಖೆ ಕೈಗೊಂಡಿದ್ದ ಪೊಲೀಸರು ಪಿಯೋಶ್ ಸೇನ್ ಬಂಧಿಸಿ, ಐಪಿಸಿ ಸೆಕ್ಷನ್ 420,465 ಹಾಗೂ 468ರಡಿ ಪ್ರಕರಣ ದಾಖಲಿಸಿದ್ದಾರೆ.

ಇನ್ನು ಕೆಲ ತಿಂಗಳ ಹಿಂದೆಯಷ್ಟೇ ಉದ್ಯಮಿ ರತನ್ ಟಾಟಾ ಅವರ ಕಾರಿನ ಡುಬ್ಲಿಕೇಟ್ ನಂಬರ್ ಬಳಸುತ್ತಿದ್ದ ಆರೋಪದಲ್ಲಿ ಮಹಿಳೆಯೋರ್ವಳನ್ನು ಮುಂಬೈ ಪೊಲೀಸರು ಬಂಧಿಸಿದ್ದರು. ಈಕೆಯೂ ಕೂಡ ಸಂಖ್ಯಾಶಾಸ್ತ್ರೀಯ ಪ್ರಕಾರ ಲಕ್ಕಿ ಎನ್ನುವ ಕಾರಣಕ್ಕೆ ರತನ್ ಟಾಟಾ ಅವರ ನಂಬರ್ ಬಳಿಸಿರುವುದಾಗಿ ಹೇಳಿದ್ದಳು. ಜತೆಗೆ ಆ ನಂಬರ್ ಟಾಟಾ ಅವರ ಕಾರಿನದು ಎಂದು ನನಗೆ ತಿಳಿದಿರಲಿಲ್ಲ ಎಂದಿದ್ದಳು.