ಪದ್ಮಾವತ್‌ ಚಿತ್ರಕ್ಕೆ ನಿಷೇಧ ಇಲ್ಲ; ಸುಪ್ರೀಂ ಕೋರ್ಟ್‌ ತೀರ್ಪು

Team Udayavani, Jan 23, 2018, 12:15 PM IST

ಹೊಸದಿಲ್ಲಿ : ಸಂಜಯ್‌ ಲೀಲಾ ಭನ್ಸಾಲಿ ಅವರ ಐತಿಹಾಸಿಕ ಕಥಾ ಚಿತ್ರ ಪದ್ಮಾವತ್‌ ಬಿಡುಗಡೆಗೆ ನಿಷೇಧ ಹೇರಬೇಕೆಂದು ಕೋರಿ ಮಧ್ಯ ಪ್ರದೇಶ ಮತ್ತು ರಾಜಸ್ಥಾನ ಸರಕಾರಗಳು ಸಲ್ಲಿಸಿರುವ ಮನವಿಯನ್ನು ಸುಪ್ರೀಂ ಕೋರ್ಟ್‌ ಇಂದು ಮಂಗಳವಾರ ತಿರಸ್ಕರಿಸಿದೆ. 

ಪದ್ಮಾವತ್‌ ಚಿತ್ರದ ದೇಶಾದ್ಯಂತದ ಬಿಡುಗಡೆಗೆ ತಾನು ಕಳೆದ ಜನವರಿ 18ರಂದು ನೀಡಿದ್ದ ಆದೇಶಕ್ಕೆ ಎಲ್ಲ ರಾಜ್ಯ ಸರಕಾರಗಳು ಬದ್ಧವಾಗಿರಬೇಕು ಎಂದು ಸುಪ್ರೀಂ ಕೋರ್ಟ್‌ ಕಟ್ಟುನಿಟ್ಟಾಗಿ ಹೇಳಿದೆ.

ಪದ್ಮಾವತ್‌ ಚಿತ್ರ ಪ್ರದರ್ಶನದಿಂದ ಯಾವುದೇ ರೀತಿಯ ಕಾನೂನು ಮತ್ತು ಸುವ್ಯವಸ್ಥೆಯ ಸಮಸ್ಯೆ ಉಂಟಾದಲ್ಲಿ ಅದನ್ನು ಆಯಾ ರಾಜ್ಯ ಸರಕಾರಗಳೇ ನಿಭಾಯಿಸಬೇಕು; ಹಾಗೆ ಮಾಡುವುದು ಅವುಗಳ ಕರ್ತವ್ಯವಾಗಿರುತ್ತದೆ ಎಂದು ಕೋರ್ಟ್‌ ಹೇಳಿತು.

ಜನರು ಇಂತಹ ವಿಚಾರಗಳಲ್ಲಿ ಶಾಸನಾತ್ಮಕ ಸಂಸ್ಥೆ ಇದೆ ಎಂಬುದನ್ನು ಮರೆಯಕೂಡದು; ಪದ್ಮಾವತ್‌ಗೆ ಕೇಂದ್ರ ಸೆನ್ಸಾರ್‌ ಮಂಡಳಿ ಸರ್ಟಿಫಿಕೇಟ್‌ ನೀಡಿದೆ. ಅಂತೆಯೇ ಸರ್ವೋಚ್ಚ ನ್ಯಾಯಾಲಯ ಅದರ ದೇಶವ್ಯಾಪಿ ಬಿಡುಗಡೆಗೆ ಅನುಮತಿ ನೀಡಿದೆ ಎಂದು ವರಿಷ್ಠ ನ್ಯಾಯಮೂರ್ತಿ ದೀಪಕ್‌ ಮಿಶ್ರಾ ನೇತೃತ್ವದ ಮೂವರು ಸದಸ್ಯರ ಸುಪ್ರೀಂ ಕೋರ್ಟ್‌ ಪೀಠ ಹೇಳಿತು.